Luigi Lunari con Ernesto Calindri durante le prove di “Le furberie di Scapino” di Molière
Milano, 18 agosto 2019 - L’ann passaa e quest’ ann gh’è stada ona falcidia de attor e personagg ciamà foeura da ‘sta vita confusionaria e per certi vers pocch sostenibil. La mort, che la guarda in faccia nissun e quand la decid de rivà se ne sbatt dell’età, l’è stada on po’ barbina e beffarda. L’ha sparà sul mucc e l’ha portà via chi ha vorsù senza riguardo all’età. Tra i tanti, propri el dì de Ferragost, l’è andà Luigi Lunari ciamà Gigi dai amis. Chi l’era? Su Wikipedia gh’è abbondanza de notizi, sto’ minga chi a ripètt da chi l’è nassù, quand, come l’ha passà l’infanzia , quand l’ha comincià a scriv, quand l’ha pubblicà la soa prima opera, quanti commedii l’ha scritt, quanti saggi, el bordell de collaborazion, la soa permanenza al Piccolo Teatro, perché l’è vegnù via puttòst clamorosamente, cossa l’ha faa depoeu e cossa a 85 ann l’aveva intenzion de scriv? Umorist, caustich, osservator imparzial tant de la politica che del social l’ha scritt i do commedi che I Gufi hann miss in scena e che hann segnaa el lor grand success in di ann ’60, insema a canzon e battud che ancamò adess gh’hann el pregio de l’attualità.
El vedeva lontan el scior Lunari e anca come fantasia per i dispositiv scenich l’era avanti de ona vintena de ann insema a quei quatter (I Gufi) che hann lassà viv el ricordo al ponto che i pader hann regalà disch, foto e testi ai fioeu i qual a lor volta hann fa la stessa roba con i lor de fioeu. Quatter amis, quatter malnat, che hinn diventà cinq quand el Lunari l’ha scritt per lor, e ses quand on regista (Beppe Recchia) i ha fissà in l’obiettiv per ‘na tv privada. Nissun el s’è fermaa. Né i Gufi che hann continuà l’attività singolarment, né el Lunari che l’ha scritt per la radio, per la Tv, per l’editoria, per el teater, cont i laòr voltà anca in cines. El gh’aveva on difett. Quell de sentiss ‘nemo profeta in patria’ e di tant in tant el scriveva sollecitazion a legg quella commedia o quell’altra o informava el pubblich quand el ciappava on premi o gh’era ona rappresentazion straordinaria all’estero, marcànd che la doveva svolgess anca in in Italia.
El gh'aveva reson ma, sincerament el podeva anca contentass di risultà che l’aveva ottegnù. Probabilment el voreva el gran success a maggia d’oli, minga tant per i danè, anca se hinn semper benvegnù, ma per l’immagin, la figura de grand, l’alloro ch’ el meritava per tutt quell che l’ha scritt e rappresentà. Cont I Gufi l’ha podù inventà el linguagg del cabaret e portall in scena, cont i alter commedii l’ha trovà ‘na misura comica e che la piccava in del stess temp , cont i sceneggiaa Tv l’interess de i telespettador e l’ audiences alta, cont i canzon la forza, la critica, la trasgression. Come “Non Maledire questo nostro tempo” “E’ la domenica il giorno del Signore” “Era Natale” “Socialista che va a Roma” “Non spingete scappiamo anche noi” “Il Cimitero di guerra” “Non so non ho visto se c’ero dormivo”. Canzon musicaa dal Lino Patruno che quand l’ha inventà i arii l’è sta’ toccà dal Signor, tanto hinn bell anca a cinquantann de distanza. A ‘sti canzon vann giontà i parodii critich ( El Museo delle cere, La piccola vedetta Lombarda, el Teatrino del Viet Nam) e i grand verità del parlà giust e a temp. On para d’an fa’ i edizion Book Time hann pubblicà i do’ success de I Gufi e alter commedi da ciappà in considerazion. Brivio histess quand el gestiva el Teater La Scala della Vita, l’ha rappresentà on trittico per omaggià l’autor, el scrittor, el drammaturgo, el commediografo. Tra i oper rappresentà “El Garofano Rosso” in doa emergeva el penser socialista utopich, quel socialismo che tucc desideravom e che el s’è mai podù realizzàa per l’insipienza di òmmen, la famm de cadreghin, el podè che ona volta ciappà l’era impossibil gestì.
Adess el Gigi Lunari el gh’è pu. Tutti i noster discors faa davanti a on aperitiv resterann sogn. Hoo minga trovà i danee per realizzaj. E anca mi sont in discesa pur cont tanti moviment, invenzion, realizzazion. L’idea principal, però, la resta, anca se la missa in opera la resultarìa postuma. On teater minga cont el so’ nomm, ma che per duu o trii an el rappresentass domà i so’ oper magara cont l’importazion de quei ch’hinn sta’ recità in russo, in ingles,in tedesch, in olandes e alter lenguagg. Ciao, Gigi, mi sont chi, in del solit vulcan, in attesa che on quaidun el destini ‘na part de la soa eredità, minga domà ai can, ma anca al to Teater che, se voressom andà in fond a quel general, de can ghe n’ha tanti: allestitor, regist, attor. brivio.roberto@yahoo.it