Flavio Oreglio
Milano, 12 novembre 2019 - L’altra sera a Roma, finì de registrà in diretta Stracult, la trasmission andada in onda a mezzanott, on Taxi m’ha portà insema a la Raimondi a la stazion de Tiburtina in doa el treno l’è rivà cont trii or de ritard. Mi capissi che l’è stada forza maggiore per via del terremott ma quel che capissi no l’è el comportament de la direzion de la stazion. Ai noeuf de la sera saren i bar, saren i cess. Te fann sta’ al frecc, in pè, a spettà, ai binari. Gh’è minga de post in doa riparass. E intanta i quindes minut de ritard passen ai dusent. Te ghe l’et no per el ritard del treno, ma cont i servizi ch’hinn sarà. E ti te rimpianget i temp quand gh’era el carrell del caffè. Se te va ben e te la troeuvet gh’è la macchinetta ma ghe voeuren i “spiccioli”. Quaivun te dis che i servizi gh’hinn sotta la stazion. Te corrett. Hinn sarà su, ma denter gh’è on quaivun. Te picchet per ciamà l’attenzion, “E’ chiuso” “El vedi, ma gh’avaria de liberass…” “È chiuso” “E allora la foo chi in terra?”.Dal moment che se paga anca per “liberass” perché metten minga ona persona fin quand ‘riven i treni? Ecco el noster l’è sui binari. Te corrett. T’el perdet no. Oh, finalment, cald e fila davanti a la toelette.. A Milan, vers i quatter la stazion l’è deserta. A sinistra l’è sarada, a destra anca. Al centro gh’è ona porta averta. L’è come vess in Parlament in doa senz’alter i cess mancaran no.
Vorevi parlav anca de la festa che Flavio Oreglio m’ha organizzaa sul palch scenich del De Sica a Peschiera Borromeo per i me sessant’ann de teater e la sintetizzi in ona parola sola: fantastica. Trii compagn de ventura Oreglio, Patrucco, Riondino, pussè giovin ma de grand esperienza nel calcà i scèn, trii battutist, e ona pergamena, creada su ispirazion de mia mièe, da mett in ca’ in mostra insema ai cimeli. Motivazion: A te che che a sessant’anni porti sul palco il tuo estro, la tua genialità, la tua follia… A te e al tuo grande cuore che in quarantanove di convivenza (…tre figli e quattro nipoti) ha reso la mia vita qualcosa di speciale… sappi che ti ho affiancato con orgoglio sul lavoro… Mi sei indispensabile. A proposito, quando hai finito di festeggiare, guarda che c’è da fare la spesa e metter fuori la spazzatura. Grazia Maria Raimondi
mail: brivio.roberto@yahoo.it