Programmi in televisione
Milano, 3 novembre 2019 - Vorevi scriv l’articol per domenega e m’era capità sott mann “La Lombardia di Gianni Brera” on liber regalaa dall’Assessor ai Identità e Cultura de la Region Lombardia, Stefano Bruno Galli. Uei, l’è minga on liber de pocch. Gh’è denter tutt: storia, geografia, leggend, personagg. Coi so’ 146 pagin, formato tascabile, el var squas on enciclopedia cunt la differenza che i notazion hinn de on scrittor che l’ha insegnà a mezza Italia e anca de là de la cadena di Alpi a scriv come se dev per minga noià, stuffì. Quest però el sarà on argoment de voeuna di prossim colonn.
Me intriga incoeu parlav de la television e di so’ programm. Lunedì: el commissari Montalbano: In alternativa, quand le fann, su la 8 (vott) gh’è 007 la Saga. El primm se fodess parlà anca pussèe in italian saria ona bella roba. Tanti el guarden per el protagonista, tanti senza capì nient de quand parlen el dialett strett, tanti perché speren de vedè ona quai scena erotica (ghe n’hann miss denter anca tropp. Minga per fa el puritan). Se poeu voeurom guardall cont i oeucc critich (adess me lapiden) se po’ rilevà che cambien i stori ma i azion per trii quart di filmaa hinn semper: lu ch’el mangia o a ca’ soa o in trattoria, l’uffizi del commissariaa, el questurin ch’el sbat su la porta dell’offizi tri o quatter volt per puntada, telefonad a la soa donna gelosa, la scalinada de la gesa, la spiaggia, lu ch’el fa duu o trii noad, on para de moment in carna, senza vestii. Se te capissen no quell che disen te par de vedè semper el medemm giràa.
Ma i statistich parlen de na media de 4.800.000 telespettator! Montalbano l’ha faa de traino a Imma Tataranni – Sostituto procuratore. Anca quell cont moment incomprensibil. Disen che devom abituass. E perché minga in genoves ? In torines? In venet? In emilian? Hoo saltà apposta el milanes per minga famm dì che scrivi de part. E semm a Lunedì. Gh’hoo pu de spazi. Gh’è n’hoo in ment mi, voeuna di trasmission possibil. Noeuva. Anca la Tv la dev risc’ià. L’ha faa el cinema?! Sostegnù da la stessa Rai! Gh’è tutta ona generazion rinnovada. Dirigent giovin. Se te domandet quajcoss, fann el sorris de circostanza. E parlen de Audience. Incoeu var domà quella, olter a spend danè su danè magari sui cachet. E cont questa rima ve saludi.
mail: brivio.roberto@yahoo.it