Raimondo Vianello nei panni di Tarzan
Milano, 27 febbraio 2018 - On famos moeud de dì el dis (l’è squas on pleonasmo) “mai vègh prèssa nel rispond, spetta on quai minut dopo ona question”. Sì ma in quel minutt l’interlocutor el po’ anca andà via e fat restà lì ‘me on ciolla nel to’ spettà. Second mi el var la pena de rispond subit, se de no te se desmenteghet e la domanda la resta lì per aria senza savè cossa fa’, se andà via, spostass e aspettà che la vegna bona, o sperà che chi dev dà ‘na risposta el se decida a falla subit. Quaivun l’osserverà “dipend da la domanda” “cià dai” el fa on alter “ femm no del cabaret cercand ona battuda de ridd come final de la conversazion”. Podarissom andà avanti per tutt l’articol e fa’ incassà el lettor perché a la fin de la pagina el se rendariss cont che hoo dì nient e in del stess temp hoo di’ tant “Ma varda quest chi. Pussè passa el temp pussè e va a somejà al Marzullo.” “Intant prepàress ona bella risposta. Perché in di articol el scior Brivio el se mett semper in mezz? Podaria minga vess pussè discret e cjamass minga in continuazion?!” Podariss respond che me tiri a man dato che i argoment che tratti a hinn semper ligà a la mia vita passada, quella presente e la futura. Parli de la Darsena e me ven in ment la canzon del Navili de Ivan della Mea, che mi, semper mi, hoo cantaa in di spettacol de cabaret e anca in quej de selezion di Operetta. La casciavi denter quand disevi al pubblic che gh’avevi intezion de derbì on teater propri denter in l’acqua. L’hoo giamò scritta in on articol passàa. Se on quaivun el voeur ascoltalla e vedella ch’el vaga su you tube, I Gufi a colori. Ne troeuva 150, olter a quella. “ T’è parlaa de Operetta...” “Certo. Ma ghe sont semper mi denter. Se ciamava “Compagnia Stabile di Operette Città di Milano”. Semm andà avanti ona vintena de ann a rappresentà Operett intèr, selezion di ari pussè bell in on spettacol ciamà “Profumo di Operetta” che l’era la quintessenza di teatral dedicaa al gener.” “Sì, ma cossa gh’entra la canzon del Navili?” “a gh’entra, la gh’entra. El teater che vorevi derbì in darsena l’era ona specie de Show Boat. Avevi trattàa l’acquist de du barcon de cement che staven sott al pont de La Becca, Pavia. Avevi nanca comincià a portaj a Milan quand m’han bloccà tutti i pratic burocratric che ghe voreva per moeuvej. Do barconi miss l’on visin a l’alter, ona quaj martellada per sbatt giò i do paret interni,fina al pont, e peu el Teater. 700 post. Progetto Ferri su mia indicazion. Hoo fa anca la conferenza stampa per lancià l’idea.” “ Ma in Darsena gh’era stà on Cabaret in d’on barcon!” “Dopo. Depeu. L’aveva fàa la Feldmann. In d’on vecc barcon che invece de scaregà sabbia, come el solit, l’era ancoràa. In la tolda avevom faa el local.”
“ E i spettacol?” “ Tutti in milanes” “Chi gh’era?” “Liliana Feldmann, Evelina Sironi, el sonava Sergio Gamberini, fisa scompars da temp, e mi” “ Figuremes se lu el gh’era no!” “L’era per via della richiesta, se gh’hoo de faa. L’è lì ch’hinn nassù i do story a sostegn d’on discors ch’el finiva con la canzon del Navili” “ Che story?” “Quej che cunti semper… Tarzan el se sveglia in piena foresta e per dimostrà che l’è el re el vosa “eeehhh!”, el ciappa on liana, el donda, el se molla e el và a finì contra on leon, ghe ciappa la testa, ghe la gira vosand “Chi sono io, chi sono io?” El leon cont la gola nel brasc del forzuto el dis cont vos rotta “Tu sei Tarzan il re della forestaaa.” “Aaahhh!” Tarzan el ciappa on’altra liana, el vola per cent meter, el finiss adoss al coll de ‘ na pantera vosand “Chi sono io, chi sono io?” La pantera cont la vos flebile la riess a pronuncià “ Tu sei Tarzan, il re della foresta.” “Aaahhh!” Altra liana, on vol de centcinquanta meter e Tarzan el finiss nel de drè de on elefant mas’c. El ciapp i do affari, ie sbatt l’ona contra l’altra intant ch’el vosa “chi sono io, chi sono io?” L’Elefant el se gira: “Quest chi, uè, el se ricorda pu’ el nomm e el vegn chi a romp i ball a mi.” I storj nasseven semper in relazion a ona quaj roba che la capitava. El final l’era semper in battuda comica come ai temp di grand comic: Carletto Dapporto, Renato Rascel, Ugo Tognazzi, Raimondo Vianello, Billi e Riva, Lucio Flauto, Tino Scotti, e soratucc el re del palch scenic Walter Chiari. E mi gh’hoo avu l’onor de fagh Compagnia per el debutto al Teater Cristallo in via Castelbarco de la commedia in musich “Scusate è tutto qui’” “Cast?” “ Roberto Brivio, Patrizia Caselli, Walter Chiari, Grazia Maria Raimondi, “e ona orchestra de dodes element diretta da Gino Bettoni.” “Produzion?” “ Mia, oh bella. Fasevom i legionari, mi e lu. In pien deserto. Lu el vosava , el vegniva invers de mi che bevevi da ona borraccia gelada, ghe disevi «dimmi un buon motivo che mi giustifichi il perché dovrei darti acqua», el se metteva in mezz al palch e el cantava «Strager in del night!». L’inizi del spettacol entravi per spettall. Guardavi l’orologg. Quel cretino, disevi, non viene. Peu el casciava denter la testa “ Vieni avanti cretino” disevi. La passava la Caselli ancheggiando. La lumava. Walter el se staccava i barbis, mi e metteva sora el laver e el diseva “Adesso il cretino sei tu” el ciappava sotto brasc la Caselli e via foeura in quinta. Gh’era sintonia. El ciamava la Raimondi «la mia Debbie Reynolds». On bel dì l’è borlà giò dal palch in platea, el se lussà on genoeucc. El podeva no camminà. Semm andà a fa’ ‘na Domenega Inn per dì’ al Baudo, in trasmission «Facciamo la pubblicità a uno spettacolo che non verrà più fatto». Ho rappresentà per on mes “In attesa di Walter” ma l’è pu vegnù. Speri inscì de avè soddisfà la lettera che la me voeur no protagonista di me articol. In 58 ann de Teater te gh’heet tanti memory de andà avanti on altra vita per contaj. Come quand al Manzoni hoo faa ona settimana cont on spettacol intitolaa “La 6 giorni di Brivio”. Ognì sera ona rappresentazion divèrsa. E avevi impiegaa metà del me repertory. Ma questa l’è ‘naltra storia.