Al “Giorno” insemma ai lettor

Milano, 16 settembre 2018 - Che giornada! La visita guidada a Il Giorno l’è stata per on cert vers entusiasmante. Quand sont rivaa gh’era giamò la gent che l’aspettava. Squas tutti quej che aveven fissàa el pontell per sentì Roberta Ferraro de la promozion che la cuntava vita mort e miracol de la Ingegnoli band, e da quand l’ha comincià a costruì el palazz a quand l’hann vendù, e i quader che gh’hinn denter, e i soffit, e la genìa di coltivator che han fa’ on impero smangià dal temp. Son restà impressionà a senti che eren proprietari di terren fina a la stazion central, lotizzà per fa’ di ca’ sotta on important disegn de Ingegnologia. I giornai hinn pu quej de ‘ na volta.  El Direttor Sandro Neri l’ha spiegà in ona dissertazion colta quel che Il Giorno l’ha rappresentà in tutti questi ann, quell che l’ha inventà, quell che l’ha comincià prima che alter giornal se mettessen a seguill. E la cronaca, e la prima pagina variegada, e l’inserto, e i fumetti, e Oreste del Buono da ona part e Gianni Brera dall’altra a portà innovazion. Adess l’è tutt pussè, men che i disegn, ma spetta ti, se sa mai. Sandro l’è anca lù on Vulcann, propenso al noeuv, a provà, esperimentà. Proeuva la sia “l’angolo di Milano”, ona pagina tutta in milanes. Mi me senti orgoglios de fa’ part de ‘sta volontà de trasmett la voeuja de parlà e legg el linguagg de questa città che come ho ditt in ona canzon ami e odi nel stess temp. E on dì ve spiegaroo el significà di do termini. E me sont sentì important a vess ciamà stamattina a la presentazion de tutt el giornal, che, come hoo dit in ona pagina de giovedì, conossi dal dì de la soa prima sortida. L’è on mond che hoo semper vorsù, che me sarìa piasù fann part: ma la vita l’ha vorsù diversament.

Però, mai scoraggiass. Son rientraa nel giornalismo da la porta granda e cont el me dialett, quell che per ann, e ancamò adess, porti in palchscenic. Capissi no perché numm milanes semm osteggià da i solon de la television. Tucc, attor, comic (el so, l’è ‘na parola grossa per la veggia guardia ) , giornalist, scrittor, fan quel che voeuren e cont la Lingua (guarda la sparizion del congiuntiv) e del Dialett, depoeu che disen de salvall, de dagh maggior importanza, de portall su la bocca anca di extracomunitari, men che cont el milanes e ghe gionti el torines, el genoves, el veneto, el furlan, linguagg usaa domà per mett in berlina ruoli in di film giamò da la sceneggiatura. E allora el me plauso, per quanto el po’ vess valid, a l’organizzazion che incoeu l’ha tratt in pè ‘sto gibilèe per tutta la città e ai duu che hann portà pubblic a Il Giorno. Vun del pubblic l’ha domandà quanti copj el tira. El direttor l’è sta’ cjar. Cont tutti i edizion e i quatter giornaj miss insema, QN, ne tira pussèe de tucc. E mi sont orgoglios, ripèti, de savè che ona piccola part de l’alta tiradura l’è dovuda anca ai articol in milanes. Hoo fa’ ona conclusion cuntand duu a trii story de la mia vita artistica. Speri che prima che finiss l’estàa ghe sia la possibilità de fa’ on spettacol nel cortil dell’ex Ingegnoli. Mi, la Grazia Maria Raimondi, Sergio Ferrari all’accordèon e poi Enrico Intra e la soa storica scola de Jazz. brivio.roberto@yahoo.it