La scavezzatura meccanica della canapa
Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Milano, 28 giugno 2018 - “…De tant píscinin che s'eri mi ballavi volentera e ballavi in sú on quattrin E scisciavi el me ciuccin garza e insema zuccherin de tant che s'eri píscinin (2v) L'era temp ma si de guerra Sont sfollà a la ventura Sont andà senza torment In sui riv del “tiliment” Me ciamaven el rattin De tant che s'eri piscinin…”
Sont a dré a cambià la canzon originale e adattalla a mi, dopo che l'ho cantada tanti di quei volt che el numer el ricordi pu. Certo minga come Porta Romana version I Gufi, o come Addio Lugano Bella, o come El gallo è morto, o S.Antonio o Il Neonato; “de tant piscinin che l'era” l'hoo fada in cabaret, in teater, in piazza, e minga semper l'era capida. Eppur la cantavi in certi sit in doa el milanes l'era ona parlada giornaliera. La cantava anca el Tino Carraro in Milanin Milanon, insema a la Milly. E quand faseven el coro gh'eren denter tucc i primm protagonist del spettacol che depoeu “Siamo Tutti Milanesi” con el Nino Besozzi, el gh'ha avu trii ann de replich semper esaurii. El cast Enzo Jannacci, Alberto Rossetti che l'ha movù i primm pass al Refettorio quand la gestion l'era mia, l' Anna Nogara e alter che gh'hoo pù in del co'.
La canzon la m'è vegnuda in ment nel legg “cannabis, il business non vuole morire”. E perché Perché in temp de guerra, sfollà nel Friuli, s'eri talment piscinin che el piscinin de la canzon al me confront l'era grand, anca se el ballava su on quattrin. Me ricordi che la mia nonna l'aveva fittà on camp des per trii ( trenta meter quader) e la coltivava Canapa. Minga per fumalla, scommetti che la saveva nanca se voreva dì' drogass fumand quella che ciamen erba ma erba l'è no, dato che la gh'ha on fust piccol ma lung e dur. Cossa la faseva la nonna cont la Canapa La usava come ingrediente per certi aliment Come pomada per cùrass Come farina per fa i biscott No. la faseva lenzoeu. Lenzoeu che quand te andavet in lett te daven la grattiroeula perché bèsiaven (pungevano), specialment i primm giornad che te ne fasevet uso. Squas bianc i lenzoeu eren on po' indigest a la pell delicada de numm fioeu. Ma cont el passàa del temp diventaven moll, perdeven la rigidèzza, e te dormivet cont ona sensazion de benessere.
Per forza! El disarà on quajvun. Te dormivet cont la maria giovanna! Se la pias a fumalla, figuremes a mettegh de sora el corp, fragil e delicàa d'on fioeu. On bel dì la mia mamma ma anca la nonna, la zia, la decid de famm fa' la prima Comunion. Foo l'istruzion, facilitaa dal fatto che s'eri on cereghet provaa (servivi Messa cont el rito romano e ambrosiano) e, dal moment che l'era el 44 o giò de lì, che ghera stada l'offensiva sul fiumm, che tanti giovin andaven a laorà cont la Tot, che el Pippo el passava tutti i ser, che gh'eren anmo' i bombardament, che i tedesch, come hoo giamò dit, m'aveven mitraglià addoss senza colpimm - hoo sentì i pallottol fis'ciamm in di orecc - dal moment che serom ancamò in guerra, che el me papà l'era internaa in Svizzera, che la mamma l'andava e vegniva da Milan cont i camion de patati, insomma che serom poveritt, la me nonna l'ha ciappà on lenzoeu, ghe l'ha dà al sart del paes per famm on vestì bianc de canapa.
L'avarìa mangiada tant me vergognavi. Me pareva che tucc savessen che el me vestì de Comunion l'era stà ricavà da on lenzoeu, nanca fresc de confezion, usàa, perché gh'aveven dormi i me barba, (zii). Adess col vintage el vestì de Canapa, quel vestì, vararia ona cifra. Squas el rimpiangi. Capissi el sacrifizi che l'ha faa la me nonna,donna de ferr. L'avea allevàa 5 fioeu, senza marì, mort ne la prima guerra mondial. Contadina de sacra tradizion la me voreva on ben dell'anima. Mi s'eri on po' ruffian. Ghe leggevi i storj, ghe recitavi i poesii, fasevi spettacol copiand da ona compagnia de guitti, cont i vestii de carta. Quell de canapa l'era, dopo la Comunion, stà disfaa e giontà per fagh ancamò on lenzoeu da ona piazza. Capìi come l'era la vicenda de la Canapa L'era minga indiana. A quei temp l'India l'era lontana. La te diseva on quajcoss domà cont la lettura di romanz de Emilio Salgari. Se parlava no de canapa indiana. Disen che l'è liberalizzada, come robba de farmacia.
Disen, a dagh a tràaa a tucc quej che te dann di consili, che la mariagiovanna la te fa' sta' ben. Mi ris'ciaria a coltivalla domà per confezionà vestii per l'estaa, ne la speranza de minga vess fermà per strada, spoglià e vedè giacca e bragon andà in fumm su la bocca de on quaj branco de vizios che, par, in 'sto moment de corsa all'oro, pardon a l'erba, pardon a la canapa, faghen faa i danè a negoziant, ambulant, commerciant, e cont la scusa che dann de laorà a tanta gent, distribuissen vizi de per tutt anca cont el cosiddetto food a la faccia de la malavita che senz'alter la trovarà el moeud de sostituì la mariagiovanna cont la mariateresa. brivio.roberto@yahoo.it