El mes di vacanz ignorant

Milano, 4 agosto 2019 - I fioeu de Alberto Sordi, in d’on film, gh’aveven organizzà ai genitor i vacanz intelligent sia come mangià che come percors. Ricordi che l’Alberton l’era inscì orgoglios del fatto, che le diseva a tucc. El contrappost de l’intelligenza l’è l’ignoranza, per quest se se parla de vacanz intelligent ghe sarann anca quei ignorant, che l’è la roba che la gent preferiss perché hinn pussè facil, men impegnativ, preveden la coa in autostrada cont la speranza de minga incontralla, che te fan mangià a morsej on sanguiss, dormì quand te vegn sogn, cercà la femme perché se te la cerchet no te set pussè pirla che omm, vestiss a la barbòna per di’ che l’è on casual firmaa, andà in di local a la moda, sta’ in ona città de vacans on para de ueek senza accorgess se te sett in ona città d’arte, se gh’è ona ‘pala’ de vedè in ona quaj gesa, o on quader sistemà magari de sora on confessional del ses’cent.

A 'sto ponto me vegn in ment la storia ligada a ona cittadina visina a Milan. La se cjama Casatenovo Brianza e la gh’ha duu ges, quella de San Lorenz e quella del San Gervas (i nomm hinn fittizzi per via de la privacy). Nella gesa de San Gervas sora el confesional gh’è on quader attribuì niendemen che a Masaccio. On Masaccio in Brianza l’è ona straordinarietà. Se gh’è on turist che el voeur vedell po’ capità che el senta la confession che on quaj fedele el fa’ al prevost. Me n’è capitada voeuna. “Padre sont staa a ‘na festa” “a ca’ del Nino” “Come fa a savell?” “La voce corre” “ Gh’èmm mangia’ e bevu “ “Alla salute” “Gh’èmm miss su on sceike” “Bianch secch?. Me auguri gelaa:” “No, no, el sceike l’è on ball” “ Peccaminoso” “No, no. E’ scevro.””Peccaminoso scevro. E’ un peccato mortale.” “ No, no, serom tra ommen. Faseva cald e se semm desbiottà da la camisa” “Petto nudo?” “Petto nudo. S’ erom tra ommen!” “Petti muscolosi” “Ad un certo ponto, hoo minga capì perché, me sont trova’ in lett biott con el prevost de San Lorenz” “ Ah, figlio che brutto peccato. Ego te absolvo, per ‘sta volta. Ma ricordess che la tua parrocchia l’ è questa.” El se ciama parlà cjar.

E certi volt parlen cjar i cartei pubblicitari in sui vedrinn di negozi. Ghe n’e’ vun in via Vigevano, la movida seconda, cont ona vera e propria novità. Per tirà el sguardo di passant e faj entrà nel negozi a consumà on quajcoss, on gestor l’ha inventà el termine “Panino Ignorante”. Prima gh’era el Panino Giusto e me pareva che fodess giamò on nomm tirà de la soa. Te entravet e te gh’avevet de pensà a nient. Qualsessia dei sanguiss elencà te ordinasset l’era semper “giusto”. L’era semper bon. Cont el ‘panino ignorant’ comincerann i domand. Ignorant in cos’è?Matematica? Storia?Geografia?Italian? Ingles? Frances? Politica? Fisica?

Sotta el termine e la materia scelta gh’è de solit la didascalia cont i ingredient. Anca nel menù del ‘panino ignorante’ gh’hinn. Sotta l’ignoranza de la fisica, per esempi, gh’è scritt: salame alla majorana, crema alla pannisperna, trucioli di burro alla einstein e poeu “può contenere avanzi di cocco- scorie di tabaccoalgebrato – raggomitolati di mela- sapori di buchi neri…”. S’eri lì che leggevi e hoo vedù on client che l’ha ciappà el panino, l’ha fa’ su in la stagnola lassand foeura el classich boccon e invece de dagh ona sgagnada l’ha provà a pizzal. “Com’è l’è minga a la mariuana?” “Majorana! Majorana! L’era on fisic de la squadra del Fermi” “ Com’è squadra del fermi. Giugaven al baloon e staven fermi?” “ Sent, lassa perd. Mangia on toast se te voeuret minga …” “No, no. Me sont mai drogà, voeurevi comincià adess! Ten la toa maggioriuana che la fa’ fadiga anca a pizzass. Mi voo dal cervellee e me foo faa ona michetta cont on etto de giambon cott”.

E la finiss minga chi. Incuriosii dal nomm hinn entraa in trii cont la sbeffa pitturada su la bocca. “Voressom savè cossa voeur dì “Panino ignorante?” “Che se te ghe fett ona domanda 99% di cas el sa minga rispondet.” “E quel vun per cent? S’el te rispond gh’è on premi?” “Toeu! Gh’hoo minga pensà. Eh, già. On premi s’el te rispond. Ona specie de Portobello, el pappagall che se t’el fasevet parlà te premiaven. On premio!”. El gestor vedeva giamò el negozi pien de gent che mangiava e beveva per fass fa’ i domand da on panino ignorant. La soa donna, mamma cont duu fioeu de 10 e 12 ann, la diseva cont saccenteria “I meè fioeu? Sann tutt. El panino? El sa nient. Lu el pensa domà a fass mangià. Eh, hinn pu i panini de ‘na volta. I sanguiss cont dent la salamella a la griglia. Quest chi el sa nanca cossa l’è la griglia. Vero ciccino? Savevi mi. El rispond no. I panini d’incoeu, ignorant o intelligent, pensen domà a impienì la bocca di client”. brivio.roberto@yahoo.it