Enzo Iacchetti
Milano, 9 gennaio 2020 - E mi gh'el do, a Cesare, che in 'sto cas l'è Arnaldo Ciato, maester conclama', musicista de la madocina, arrangiator, direttor d'orchestra, l'homme che la dis l'ultima sul rigo. La musica che accompagna squas tutti i moment de la rivista “Non ci resta che ridere”, l'è lu che l'ha componnùda, come l'ha faa in tanti alter ann, per pussèe dell'80%. On alter che el gh'ha diritt al “dare a Cesare quel ch'è di Cesare” l'è Enzo Jacchetti, Enzino per i amis. El local ch'el dirig artisticament, el Ciù Ciù Bollicine Musicabaret, de via Ricciarelli al 3 (trii), a CiaoMilano, come disen i cantant in piazza del Domm quand presenzien ai concerton frequentaa senza pagà on ghell.
El gh'ha avù el pregio de fass on local veggia manera cont i principi de la noeuva. On salon, tanti tavolin che a la fin diventen tavoloni, e la gent, el pubblich ch'el va per bev on gottin da 'i, per dilla a la bergamasca, e intant la varda cont interess el spettacol semper all'altezza de la situazion rappresentada da 'na pedana ses per quatter illuminada e cont on para de cadregh per l'intervista che Jacchetti el fa' a l'ospite, nel cas de Venerdì des ai squas des, Roberto Brivio. Hoo semper invidiaa quej che hinn intervistaa e che risponden a tono senza scaggia. Brivio l'è ormai 'na faccia de palta abituà a salvass in ògni situazion. E quand ch'el ved che la situazion la po' perd interess el canta 'na canzon di Gufi e el se salva.
Adess che i giornal parlen de “venti de guerra” ne tiri foeura almen trenta dal noster repertori compresa la famosa “Il Ponte”, scritt insema a Giorgio Gaslini, in doa metti in mostra la cattiveria di certi official che la guerra la voeuren fa' per mantegniss in forma e dagh ona lustrada a la divisa tegnuda in naftalina. Son sicur che Jacchetti el savarà toccà i tast giust cont el Brivio. Tucc e duu hann faa seriament el teater e se sa che teater e cultura hinn on bastion contra la facinorosità de certi testi cald che creden de mandà avanti el mond cont la prepotenza. E allora, pubblich, prenota al Ciù Ciù per doman, Venerdì des. L'è on occasion unica per uniss al coro de la protesta grottesca. Domà col ridd se evita de piang. mail: brivio.roberto@yahoo.it