Un'immagine della Milano che fu: la galleria delle carrozze in stazione Centrale
Milano, 4 aprile 2019 -
Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Cominciom a parlà de Giuseppe Ferdico che a on certo ponto de la soa vita el s'è trovà a vedegh pu. Lassoma 'sta i causi. Voeurom minga addentrass in di specifich de la medesina, ma parlom de vun che improvvisament o anca annunciaa el se troeuva a vedegh no. La vita la cambia, minga per el baston, ma per tutt. E meno mal che el po' immaginass quell che ghe sta' intorna. Se te gh'heet de drè ona vita de ricordi e soratutt de immagin te vet avanti cont sicurezza. Te se feet ona reson confortà dal fatto che quand vun el dis el Domm de Milan, denter le ved. Scusa Ferdico se foo questi considerazion per parlà poeu del to liber ma t'el sett che me pias inquadrà l'argoment nel contest de la vita che la va su e giò per semitoni. Ah, l'è chi che vorevi fermamm. La musica. Fortuna che el Giusepp mastegava el jazz. 'Sta virtù, per vun (mi) che l'ha laorà tanti ann cont Lino Patruno, che l'ha conossù fin dai primm temp Paolo Tomelleri, che l'ha comincià la carriera presentand per l'Umanitaria i concert de Gill Cuppini insema a Basso-Valdambrini, che l'ha incis ona canzon musicada da Azzolini, che l'ha registrà i primm disch cont el nomm de Roberto BI sotta la direzion de Giorgio Gaslini, ma sora tutt che el gh'ha on pader , in cabaret, cont el nomm de Enrico Intra, fondator del gener a Milan, e amis e collaborator, direttor de ona scola de Jazz parificada al Conservatori, el Jazz l'è 'na virtù. E hoo nominà personagg conossù anca dal Giusepp Ferdico che on bel dì el se mett a scriv de Jazz e confortà dai presentazion fa' cont i amis jazzman, tipo Vittorio Castelli, vun di pocch che el gh'a la forza de sfilà per i strad cont ona band.
L'hoo conossù quand fasevi i dischi de prosa per la Ricordi. El laorava lì, insema al Patruno, a Ruggeri, a Santgiùst. Quand el Tito Fontana el gh'aveva el fantastich Studio 7 in cors Venezia al 7 in doa te trovavet tutti i dì quej che diventerann i grandi del Jazz e de la Canzon, tipo Franco Cerri, tipo Umberto Bindi, e anca dello sport tipo Lea Pericoli, che la sarà depoeu anca la soa miè. Propri el Tito l'aveva pensà insema a Carlo Cattaneo, in quel temp innamorà de Lina Volonghi ( soa miè on quaj ann depoeu)e me socio nell'impresa de registrà romanz de prosa per fann Lp, de pubblicà on 45 giri cont do' canzon senza paroll cantaa, domà musica, ma cont ona traccia amorosa recitada da ona vos calda e suadente (la soa), ona vòs che fà vegnì la pell d'oca quand la se infila nel cervell. Spantegàda la vòs, gh'eren attor del temp che se allenaven a parlà col cervellee visin a la sala de registrazion. Diseven (peccàa che podi minga fav sentii el registraa) cont ona vòs cavernosa “ un etto di mortadella da mettere in questo pane”. El mena-roeuda le guardava divertii e el rispondeva, conossend i so' merli, con el diaframma sbassà sul piloro, “ come la vuoi, tagliata grossa o sottile ”. Ferdico el gh'avevi mai vist. Eppur da la soa bio leggi che l'è nassù nel '47. El ghe ved pù dal 2006. El gh'ha avù i so' trascors in television: con la Goggi (Loretta in Quiz) l'è sta' campion per trii settimann de fila. Poeu, dall''86 l'è sta' conduttor per Radio Studio Milano in ona trasmission intitolada “L'Ora dello Swing”. In di ann '80 el diventa sostenidor de Europa Radio Milano diretta da Elda Botta e Sergio Leotta, el fa' l'illustrador umoristich, l'autor de programma radio, insomma on bel, come se dis incoeu, beckraund de vita lavorativa e artistica, compres el premi letterari de Pontremoli che gh'ha dà a “L'Opera Jazz a Milano”, on so' liber (Pegasus editor), on “riconoscimento prestigioso”.
Poeu in questi ann el s'è miss in co' de scriv racconti gialli con on protagonist che el ghe ved no come lù, ciamà Sergio Porta, ex ispettor de Banca, appassionaa de Jazz, giornalista e investigator dilettant. On ruolo, ironich, che ghe piasarìa ai sceneggiator d'America-Usa-Hollywood, insomma veggia manera. In on comunicaa che l'ha mandà in gir, Ferdico alias Joe Ferri, so' pseudonimo giall, el se domanda “ come el po' vun che el ghe ved no (non vedente) affrontà i pericol che se presenten in di soggett) ” e mi ghe gionti i viagg, i personn che l' incontra, i avventure, perché da bravo zero zero sett, senza esagerà come fann Scion Connery e tutti i so' discendent, Sergio Porta, senza vedegh, el se moeuv come ona saètta. Joe Ferri el rispond “perché ghe stann visin la miee Luisa, l'amis giornalista Franco Bianchi, el simpatich commissari Domenico Romano, insèma a ona bonna dòse de incoscienza ma senza profitta' de la disabilità”. Incoscienza dimostrada anca in la pubblicazion de trii storii cùntà su in manera de suscità la voeuja de vedè come che la va' a finì, ma cont quaj error che on bon èditor l'avarià giustà. Per la verità gh'è ona storia che implica i correzion. La par on giall (se dovariss scriv giald, ma voeuri tegnì separà el color dal gener). L'autor el se rivolg a la Fulvia Serra (la mai desmentegada direttora de Linus che adess la se occupa de cartoon animaa: IQBAL, Bambini senza paura, l'è giamò on success internazional). L'esperta , che ha inventaa anca Milo on fumett de grossa caratura, per el pocch temp, l'ha daà l'incarich a Federika Brivio attrice, doppiatrice e scrittora (el so' ultim liber “Cuore di Pancia” ediz. Gelmini, l'è sta' on best seller in di ann noeuv e des, tanto che Albert Wise gh'ha faa ona sceneggiadura teatral rappresentada per on poo de ann tra el Teater La Scala de La Vita, quell de la Memoria, e in gir per la Lombardia). Compit portà a coo cont professionalità a giudizi de la Serra e de on para de èditor che hann leggiù i story cont interess. Joe Ferri l'ha vorsù tegnì la version original e pubblicalla col so vecc editor (Pegasus) inscì come l'ha dettada. Nient de mal. Anca numm Gufi gh'emm vorsù tegni “El ridicol matrimoni” come l'emm registraa la prima volta, con denter i error e i improvvisazion del moment. Ma almen ringrazia minga, per esempi Federika Brivio, che m'ha mandà ona nota informativa, per sottolineà che la soa collaborazion ai testi, depoeu vess stada pagada, Joe Ferri l'ha tegnuda in del cassett. Forsi la voeur mandà al Sergio Porta perché in ona riedizion del liber ne tegna cunt. brivio.roberto@yahoo.it