L'ospedale Fatebenefratelli
Milano, 19 novembre 2019 - Trii volt a l’ann Mr. (podom ciamall inscì ormai) Renato dal Compare el raduna la soa squadra de “giogador” e i e lancia in ona kermess che se fodessen vess pagà la farien nanca per el tripli de quell che ciappen: nient. Questa volta el radun-spettacol l’è staa all’Auditorium Testori, Palazzo della Regione, ier desdott (18) novembre ai vintun (21). Voeuri desmentegà nissun: Alberto Anelli, Silvia Annichiarico, Roberto Brivio e Grazia Maria Raimondi, Piero Cotto e Beatrice. Giovanna, Packy, Sante Palumbo, Gian Pieretti, Tonino Scala, Viganò Brothers, Luca Virago. Special Guest MaryMary. Hann presentà Maria Teresa Ruta e Memo Remigi. Present Giulio Gallera assessor al Welfare.
Ma perché sta radunada di bej nomm? Quand Renato Dal Compare el se moeuv gh’è semper de mezz el sang, important come tutti i organizzazion che sotta Nadal, a Magg quand gh’è de destinà el 3-5-8xmila, e in squas tutti i stagion, domanden ai cittadin de vess minga stemègn e de versà on obolo per sostegnì quest o quell. Beh, in tanti ann che senti ‘sta solfa hoo mai leggiù de spantegabotton. La generosità l’è ona dote. Ma Dal Compare, president de l’Associazion Donatori di Sangue dell’HSOS (Ospedale Sacco Obiettivo Sangue), el domanda minga danèe. Domanda sang. E adess che se po’ no donal per strada el dis a la gent de ancà al Sacco, ma anca al Fatebenefratelli, al Buzzi e a la Macedonio Melloni, ospedal ligà. La serada l’è stada ona festa de canzon, de story. Gh’è stà, però, ona nota ironica: meno mal che gh’era minga el Food, taol cont roba mangereccia cusinada sul palchscenich e coeugh pien de fama a questionà, i allev che speren domà de fa’ altrettant ona volta bollà cont l’imprimator dei Maester. Scomettom che per i prossim elezion i e mettaran anca a Montecitorio? Tant per consolidà la fama del mangià a ufo che i umoristi destinen a quell canton dell’Italia. Per mi che faghen quell che voeuren, basta che donen el sang.