Mina (Ansa)
Milano, 25 febbraio 2020 - Me resta sul gozz ‘gni volta che vardi la television. Se se tratta de on programma politich i nomm de chi parla vegnen foeura senza paura. Se se tratta de on programma de TG mej ancamò. ‘Gni volta che vun l’è inquadràa, basta ch’el disa on quaicoss, subit gh’è sotta el nomm, scritt cont el fond giust, minga bianc su bianc come in certi didascalii di film. Per i dirigent, i tecnich, i registi, la gent che la ved on programma qualsiasi la cunta come il duu de picch, salvo interessass domà di audience per dì che vun l’è pussè vist de on alter e ciappà on quaj merlo da “reclame” come dis la Clerici. Disi quest perché se on quajvun vardass da ca’ tutt se accorgerìa che ògni tant l’audio el se sbassa, che gh’è on sfarfallament e che manchen in di varietà i nomm sotta el cantant, l’attor, el fantasista, el comic. “Ma i e disen i presentator!”. Chi sta’ el busillis. Quand se tratta de dì i nomm, pensand che chi varda la trasmission i e conossa, le fann inscì de pressa che la maggior part di volt se sbrodolen e se capissen no. Se ghe voeur a pronunciai cjar? se ghe voeur mettegh sotta la scritta? I titol de la fin se leggen no. O el rullo i e mett prima e se ti e vardet te perdet la scèna, o el va inscì de corsa che se legg nient e me domandi ògni volta perché i sponsor che paghen fior de danè per apparì se incassen no e se refuden de saldà la fattura.
Anzi, perchè fann no causa a la TV in question? Mi sont sicur che la vincerien. Voerì di nomm? Sont minga tacca’ a la television or e or, ma al programma de Marzullo te se domandet de spess chi l’è l’intervistaa. Ruggeri/Guaccero, minga mal perchè i presentador se parlen pocch adòss e gh’è on bell ritmo salvo quaj incensament da insulina, i nomm di interpreti i e fann volà. “ Chi l’è?” te domandet. Ma scrivel! Cossa te costa? E gh’è de l’alter che riguarda i autor de “Ona storia da cantare”, in la puntada de Mina. Desmenteghen robb important. Per esempi el nomm dell’impresari Gigante che la seguiva in di ann ’60 in tutti i serad, i nomm di artisti che ghe preparaven el terren nel primm temp, i nomm di autor e compositor di so’ canzon, in che manera l’andava in tour. Minga come adess cont i TIR pien de effettistica e on impiant de la madocina. Per quèst l’era doppiament brava e insema a lee tucc i cantant che giraven l’Italia a fa’ spettacol d’estaa.