Elon Musk (Ansa)
Milano, 13 settembre 2020 - Oggi propri in ‘sto giornal on articol intitolà “L’ultima fantasia di Musk- Il cervello collegato al Pc”. L’è el seguit de la prima fantasia de Roberto Vacca? Serom in di ann ‘60 quand in libreria troeuvi el primissim romanz de on autor che, podom dill, l’è l’Asimov italian. Avevi fa’ ona riduzion radiorai de: L’esame, Il Veldt, Il Duello, L’ultimo dei marziani, Nove volte sette, mai registrada perché diseven che la fantascienza l’era argoment de bassa categoria al de sotta di giall e inscì cancellaven Bradbury, Shekley, Brown, e company. Beh, per tornà a Roberto Vacca, vedi in vedrina on so’liber dal titol “Il Robot e il Minotauro”.
Hoo ciamà subit i me amis collaborator de quii temp: Gigi Vesigna, giornalista, e Gici Ganzini Granata, commediografa, per scriv ona riduzion teatral del liber. Gh’èmm leggiù la commedia tratta dal romanz a Roberto Vacca e me sont miss a la ricerca del protagonist: Mino Dauro. On scienziàa che se occupava de robottica e che l’aveva inventà (1960) on moeud de collega’ el cervell cont la telescrivente (el pc l’era ancamò sui nivol): ona morsettiera impiantada al pols come ona presa elettrica e collegada cont la telescrivente. Uei, ‘sto Mino el podeva legg, scriv, parlà, fa’ di cunt, in del stess temp, a ona velocità impensabil, allora. Hoo portà la commedia al Bramieri, al Mazzarella, a Macario, al Buazzelli. So’ nanca se l’hann leggiuda. L’unich l’è sta’el Piero Mazzarella che l’ha vorsù radunà la compagnia per sentìlla recitada da mi. Eren al Teater Odeon con la commedia de Gigi Lunari “Per un paio di mutandine” intitolada pussè avanti “L’Incidente”.
Al second temp riva el Franco Friggeri, so’ amministrador, a informà de on incident de macchina capità all’antagonista. Doveven girà i part, preparass per la sera, provà. Lettura bloccada. L’è mai stada ripresa. Finissi de cuntalla: ‘sto Mino Dauro el prepara ‘na conferenza stampa per dimostrà al mond la soa scopèrta. El va da on amis costruttor de robot cont poca voeuja de fa’ l’amor, s’innamora de la miè e per on mes (la politica la gh’entra no) la impalma senza tregua. La sera de la conferenza, el fa flop. El final l’è de gran fantasia. Dauro el va in sciambola cont la miè insema a on robot d’appoggio, el marì cont al pols la presa collegada cont la telescrivente el se sprofonda in on amor cibernetich.