Juliette Greco in un'immagine del 2005 (Ansa)
Milano, 4 ottobre 2020 - Uei! Hann decis de fa’ i concert in Paradis che vann là vun a drè all’alter? Eh, già, giò in terra i e fann no fina al 2021 per via de la Pandemia che l’è anca toa soa nostra vostra e lor, e allora vann tra i nivol. Inveci de fa’ la quarantena, che poeu l’è nanca ona donzena, van là. Pussè all’aperto del ciel in doa, disen, se sta’ mej e gh’hinn no i vizi e i stravizi. Canten tucc,da la mattina a la sera. L’è per quell che l’è andada anca lee. La Juliette Greco’! On simbol de l’esistenzialismo. Chissà se davanti a San Peder l’ha cercà el Dossena, “balloeur”de l’Aretosa a Milan. Mi, la Grecò, l’hoo scritturada nell’83. Senti giamò i vos: “ohi, t’è fa’ tutt ti, adess! Figuress.L’ha scritturada! E doa? Te l’è portada a Bereguard a mangià i ran?”
“No, l’hoo fada vegnì al Cristallo, el teater de via Castelbarco, che addess l’è diventaa prima Auchan e depoeu Conad, eh, minga domà i teater cambien nomm, anca i Super. “Uei fa’minga el grass de rost, foeura ’sta storia cont la Grecò al Cristallo”. Prima avevi fa’ vegnì giò dall’Inghiterra i “Rocky Horror Show”. L’impresari Cameron el m’ha portà chi on edizion del musical fantastica. So no quanti volt i me fioeu l’hann vist. Poeu hoo fa’ laorà “Les follies Bergère de Paris”, poeu ancamò “Bobbling Brown Sugar”; Carreras, che l’ha minga podù fa’ el concert perché l’è sta’ mal e, udite udite, Juliette Greco’. Duu dì. Mi per onoralla gh’hoo da’ el me offizi cont la moquette noeuva. La entra denter, la se mett a vosà, a ciamà l’impresari, el so’ seguit. Hoo fa ‘na corsa, al primm pian, da la part destra de palchscenic.
Entri in offizi senza piccà e la vedi smòrta, settada su la poltrona de la me scrivania, cont i pè sollevà e posà su ona cadrega. La me vosa in frances. “La moquett, la moquett. Porta via la moquette o stasera canti no” “ e la gh’ha?“ domandi mi, “L’è sporca? L’ho appena cambiada!” “L’è verd. El porta mal.“ T’è capi? El verd per la Grecò l’era come el vioeula per numm. Sont’ sta’nanca a pensagh doo volt. Lee presente hoo comincià a streppà via la moquette coi man, poeu cont tutt quell che trovavi. Intant che liberavi, l’offizi pareva Grigna e Resegon taccaa vuna a l’alter. Juliette Grecò sgombrada la superstizion l’ha cantà do or de fila. Per falla desmett gh’hoo buttà in proscenio on tocchel de moquette verd. brivio.roberto@yahoo.it