Milano, 14 novembre 2019 - Buon giorno Francesca, come la va’? «Se l’andass mej di insci saria pussè contenta. Gregorio». «Perché, Francesca?» «Eh , Gregorio. El mond l’è drè a morì». «El mond el moeur e ti set viva o me sbagli?» «Sont viva per miracol. Spara de chi e copa de là, process su process, cald e frecc, ma in prevalenza umid. T’el set in doa el va tutt ‘sto umid, Gregorio?» «In del guazzett che t’è faa ier sera, Francesca. Guarda i finester, hinn ancamò panaa». «Vergognes, Gregorio. Mi parli come voeuna de Cambrigge e ti te fet del volgare umorismo. Dovarissen dammm la medaja e el titol de osservatrice internazionale». «Ma che osservatrice. I robb che te diset, ti heet leggiù sul Grand Hotel o ti ha miss in co’ la portinara». «Ti faccio osservare che la sciora Giulia frequenta i corsi universitari». «De la terza età!» «Terza o quarta fa poca differenza. Io parlo di cultura». «Che nomm la gh’ha la sciora cultura?» «Perché te set inscì selvatigh? Perché te legget nient? Nanca i giornalett». «El me pà el diseva che eren diseducativi». « Ma ‘sti disegn caro Gregorio, alimenten la fantasia». «E la fantasia a volt la dà foeura, con ‘sti disegn, come cont i film e i telefilm. Mej legg no, Francesca».
«E inveci mi leggi giornal, liber, manifest, scritt sul mur…» «Insomma te legget, per fa part de quella percentual di intellettual che… «Che leggen». «Ona risposta pussè completta d’inscì...». «Sì, Gregorio, so come rispond ai baggianad». «Te savarett anca che i librerii saren su. A Milan hànn serà, da pocch, la Partipilo de via Tunisia. La stava lì da quand mi s’eri fioeu e abitavi in Lazzaro Palazzi. La se ciamava Libreria Internazionale e la gh’aveva tutt, come el Libraccio». «Se l’è el libraccio? On liber scritt malament, pien de refusi? Mi te le disi in faccia, Gregorio. De librasc n’hoo mai leggiù. Come l’Amante di Lady Chatterley, Cioccolata per colazione, come el Bucascia». «Chi l’è el Bucascia, Francesca?». «Ma dai, Gregorio, che te’l set: Giovanni Boccaccio, no? L’ha scritt roba scandalosa. E l’insegnen a scola, Gregorio». «Francesca! le letture che hai fatto mi sconvolgono. Rivelano una donna che non conoscevo. Ti comunico che adirò ai miei legali e ti porterò davanti al giudice a Forum perché condanni la tua dualità». «Gregorio!!!». «No, Francesca hoo scherzaa».