Milano, 24 ottobre 2019 - Venerdì 25/10 ai or 21 (vintùn) al Teater Bonoris de Montichiari (Bs) la Compagnia BOP cont Roberto Brivio (I Gufi), Flavio Oreglio (el Katartico), Alberto Patrucco (el socialpolitich) sarann insema per el spettacol “Invenzioni a tre voci” creà apposta per canta i canzon di Gufi che ancamò incoeu hinn de ona attualità sconvòlgente. El disnoeuv Brivio l’è stà ospit al Premio Tenco e l’ha podù verificà de persona l’attenzion che el pubblic gh’ha vèrs ‘sti canzon che a distanza de 50 ann da quand hinn sta’ scritt e cantà presenten ona freschèzza de sbalordì chi i a sent per la prima volta e chi cont piasè i riascolta. I trii artisti, cabarettisti, attor, cantant, s’hinn miss de lèna a mett insema canzon con la qualità che I Gufi spantegaven in di lor spettacol. El trio che el voeur no vess ciamà Nuovi Gufi, ma, che per i caratteristich che gh’hann i component, la lor storia, i success che gh’hann avù hinn a tutt diritt Nuovi e insema Gufi- Owls- Hibou, prometten, nel 2020 de vess in quatter, come in la formazion original.
Ona bella compagine che da Montichiari comincia ona tornèe in provincia per codà i cortej de tirà vers tucc. Ghe sarà de ridd? Si, anca amar, I battud, i monologhi, i riferiment, hinn semper comic, ma minga de quella comicità becera che de tant in tant se sent a la television e in teater. Ridd de la povertà d’animo che gh’emm incoeu, ridd di vizi che metten giovin e minga giovin in condizion de fa’ cazzad, ridd de on mond che el va’ in stondera senza proposit de migliorà ma domà quej de cambià. Cambià cos’è? Ridd de la libertà che i popol hann conquistaa e che la sbatten in ruera per l’egoismo, el desideri de settà in ona poltrona qualsiasi basta che la sia ona poltrona. Ridd de l’umanità che la dovarissa ragionà e che imveci la se comporta come ona bestia, la ragiòna no e la voeur avegh reson.