Una foto d'epoca
Milano, 21 marzo 2019 - La mia mamma se la fudess anmò viva la sarìa ‘preoccupada’ per tutti i preoccupazion che gh’hinn in gir: i grand de tutta la terra hinn distratt, gh’hann el coo per ari, hinn strafalari perché la GB, Gran Bretagna, la voeur andà foeura dall’Europa. La famosa Brexit. Bre la sta’ per Bretagna, …exit, la sta per uscita, sortida. Prima hann faa on gran baccan, on baccaneri, on bordèll, casin, gibiléri, gasaghee, spuèll, frecass (ghi hoo miss tutti inscì el se lamenta nissun) per entrà, adess hinn minga content e voeuren andà foeura. Credeven de vess tutti d’accord e inveci s’hinn accort (varda ti cossa significa a volt ona t al post de la d) che gh’è minga accord. La mia mamma l’avaria criticà anca la costruzion d’on mur «Ma com’è?» la disarìa «hann fa’ ona fadiga de la madocina per sbatten gio’ vun in Europa e pensen de fann on alter per poeu sbatt giò anca quell?», Almen fasessen come i Cines che cont la Grande Muraglia hann miss giò on opera d’arte ad usum turistich. Scommetti che i occidentaj nel cas de on mur ch’el traversa l’Europa le cjamarien “cineseria”.
E el mur che fa' confin cont el Messico come le chiamerann, Messicaneria o Americanada? Gh’hoo ancamò de andalla a visità la Muraglia. Ghe tegni perché voeuri cuntà quanti ristorant hann derbì i Cines in di slargh ch’hinn sora i portal. Almen come quej che hann faa a Milan. A proposit de Cina hoo vist on poo de immagin de Shangaj. Colossal. De la veggia Cina gh’è pù nagott. Nunc sèmm chi a discut e lor vann avanti, demolissen, costruissen, progetten, realizzen, ammodernen e vegnen chi a mostrà quel ch’hinn sta’ bon de fa’ intant che numm segutom a dass de ‘fa’ per ‘fa’ pocch e nient. Che vergògna. L’Italia l’è come la vignetta del Feiffer che hoo semper portà a dimostrazion de come se resta indrè. Lù l’è ferm su on basell cont scritt burocrazia, tucc le sorpassen voltandes indrè a guardall, a sbeffeggial. La mia mamma la sarìa preoccupada per la Tav. «Com’è», la disaria, «voeuren fa’ l’Alta Velocità, adess che i paes stranger ghe l’ann giamò da temp, e i treni hinn semper in ritard, sia quei che partissen che quei che ‘riven. E gh’hann la sfacciataggine de dì in di altoparlant che el ritard l’era “previsto”» “La mia mamma la sarìa preoccupada per el Corona che el gh’ha i proeuv del tradiment de la miee de vùn di Pù.
«Magari i e perd e inscì el perdarìa la faccia. Tant el metten in prima pagina istess. Incoeu per avèggh ona copertina te devet robà, copà o ciollà». E poeu ghe el problema migranti, el problema de andà in la jonosfera come se ghe fudess giamò pront el treno de la Tav. Fra pocch tireran via anca l’aperitiv. “No Dry, no Tav”. Basta che de fianch al Dry ghe metten anca el Gin Rosa! Quell’aperitiv che ona volta el se beveva nel negozi che stava sul canton del passagg che portava al Gallery e al cinema Rivoli trasformà da tanti ann in tavola calda, pardon ristorant, pardon loeugh per buoni pasto. Ona volta hoo incontrà , al Gin Bar, Scion Connery giò de gir perché la gent la faseva finta de cognussel no a la stessa manera de la soa pubblicità. “Gin Rosa, please”. El barman nanca ona piega. “ Gin Rosa,please” Nient come el fudess invisibil. Allora el se fa visin a vun poggià al banc e el ghe picca el medio in sulla spalla. Quest el se volta e Scion el ghe dis “ Bond, James Bond” L’alter le guarda incuriosii e con on colp d’ala el ghe rispond «Sepp, Giuuusepp».
Se l’avessi giamò cuntada domandi scusa. L’è inscì bella che la ripeteria in tucc i articol. Per desmentegass di alter robb che reclamen vendetta: la corruzion che la dilaga, la ‘ndrangheta’ in nel Nord e la mafia sora tutt. Gh’hinn complott
e depoeu complott sui complott, tant che a la fin se te complottet no te set on pirla. Come quell dell’Albano che l’ha faa ‘na confidenza al Putin per digh che la Romina l’è anmò innamorada de lu, puglies s’cètt. La Romina, semper sorridente la sembra che la disa «Sì, confessi, el me noeuv amor l’è el vecc». L’Albano, che el voeur minga vess considerà vecc ma el se mett el cappel de on contadin vecc, el voeur anca no perd la possibilità de entrà in Ucraina o Ucraìna perché par che in di farmacii se troeuva on Cialis o on Viagra al 100%.. Ho compra’ ona confezion, inscì per provà i emozion di trent’ann. Come l’avaria dit el me pianista Augusto Mazzotti, riportà nel noster liber «Meglio bastardi che mai dal diario di una cane» , el fa’ nanca tirà i madonn). All’Albano ghe ‘l dann domà se el canta “Felicità” in coppia e cont l’accento in su la “a” final, e minga in su la “e”, come fann de solit. «E la Lecciso?» Gh’el domandaress a la mia mamma. Risposta: «A la Lecciso gh’hann dà la part de la Mata Hari, ma anca quella de la portinara».
Lee la voeur no falla, la portinara, noblesse oblige, anca perché in su la question l’è puttost riservada. E pensà che forsi l’è in possèss de informazion precis su la fin del fumetto “Adrian”. Voeuren pù mandall in onda? L’opposizion questa volta podaria vess de la miee. La voeur no che se sappia in gir de la potenza organolettica del marii, e di idei che hann tirà foeura per convinc quej de canal 5 a fa’ la produzion de ona trasmission che la sembra ona predica dal pulpit, anca in di disegn, a men che i protagonist staghen in del lett, sbiottaa come Dio i ha faa, e in azion. La mia mamma la gh’è pu ma se la fudess anmò la disaria «Intant lor risveglien la curiosità di lettor e hann trovà el moeud de vess semper in copertina di tanti settimanal che fann i reunion per decid de pubblicà i stess notizi inscì che quand te ghe n’heet leggiù voeun ti è leggiù tucc».