Matthau e Jack Lemmon ne “La strana coppia”
Milano, 21 febbraio 2019 -Pensa ti come hinn i dialett. Numm disom, con riferiment ai compit de la giornada, “Quèll che devom fa”. I romam disen “… che s'a' da fa'”. I napoletan “…c'aggiu a fa'” , i furlan a disen “… se vin di fa'”. Me sont minga informà per come disen i genoves, i toscan, i calabres, i puglies. Se gh'è on quaivun de 'sti region ch'el capiss el milanes di me articol oppur vun de quej che el leggen per imparall vist che se usa no in cinema e in radiotelevision, ch' el me le scriva. L'indirizz el gh'è semper. Sotta.
Tutt quest per div che el m'ha scritt el me amis Giorgio Zennaro, omm de straordinaria cultura, mandandom el regolament per ona “sana giornada de palta”. Prima regola mangià on pomm per el fèrr, ona banana per el potassio, ona naranza (pensii che nel milaevottcent la ciamaven”portogall”) per la vitamina C, ona tazza de the verd senza zuccher, contra el diabete e per combatt i radicali liberi. Seconda regola bev duu liter de acqua per lavass internament. Quand ti e cascet foeura, a la solita manera, te ghe mettet la metà del temp che t'è impiegaa a mandai giò (Giorgio el dis el doppi ma mi sont minga d'accord).
Terza regola (pussèe avanti faroo domà i numer per risparmià caratteri) mangià on yogurt… (al post di pontitt ghe voraress la marca, pardon el Brand.El metti no per fagh minga la pubblicità a gratis.)... Perché Per avè i “L.Casei Defensis”. Nissun el sa cossa hinn ma par che se te ne mandet minga giò almen on milion e mezz (bacilli ) tucc i mattin, te comincet a dovè mett a foeugh i to oecc. 4 - Tucc i dì ciappà la Cardioaspirina come prevenzion per l'infarto , on biccer de vin ross e anca on biccer de vin bianc per el sistema nervos, e anca on biccer de birra per …so no, ma giamò che ghe semm giontemela. 5- Desmentegass minga de mangià la fibra, tanta de podella trasformà in remissèll de lana. 6 - Se dev mangià quatter o ses past legger (ma sia i quatter che i ses ghe stan minga nel portafoeuill!) e mastegà cent volt per boccon. Ovhèi! Domà per mangià van via cinq or. 7- Depoeu se dev lavàss i dent. Semper. Anca se te manget ona caramella. E desmentegass minga de usà el fil interdental, massaggià i gengiv, fa' el risciacquo cont on colluttori. 8 - Se deven dormì vott or de fila, laorà alter vott, Cinq per mangià , te ne avanzet trii . Salvo el traffic. Poeu ghe voeuren trii or per la tele, mezzora de camminada, mezza per legg i giornai, on' ora per el telefonin, on quart d'ora per 'na sveltina, on quart per la doccia, e poeu i amis, porta già el can, la ruera, dagh a tra' ai fioeu.
Insomma minutt pussè minutt men la giornada la dovaria vess de 29, 99 or e forsi anca 30 se te consideret el temp liber ( !) per ona giogada a cart, golf, tennis, ballon, basket. Giorgio Zennaro el consiglia de fa' di robb contemporaneament: doccia cont l'acqua freggia e la bocca averta per bev i do litter de acqua, lavass i dent e intant che te feet l'amor guardà la tele, laorà cont el P.C. legg i giornal, finì el liber, fumà, mangià, andà al bar (ma me par che quaivun le faga giamò), bev acqua, vin ross, bianc, birra, on biccer de drè a l'alter e de seguit andà in bagn a fa foeura tutt, vestiss intant che te se sughet el sudor de l'amor, che te scambiet quatter paroll cont la toa miè ancamò sconvolta, che te telefonet ai amis e che te sentet i esigenz di to' fioeu. Lavass i dent in continuazion. Saltà in macchina e intant che te se mettet in fila legg i ultim notizi, i letter, registra i to 'pensèè, telefona a quaivun che te set desmentegà, chi se ne sbatt di mult tant ti e paghet no. Guardà on film in metrò cont i auricolar e el to' smartpone. Dormì ogni tant inscì te se liberet dell'incombenza del sogn e te gh'heet la nott per da' el mej de ti medèmm.
Dal moment che ogni tant te passet on periodo all'ospedal per curass el corp e a volt la ment.. te disi on metodo infallibil per vinc la noia. Passàa i dottor a la mattina fa' on moviment cont i infermer, parla al telefonin, varda la television sull'orelògg, va' su e giò per el corridor, mangia, e corr in bagn a lavass i dent e, l'è minga obbligatori, fa'on quaicoss d'alter. A la biancheria, ghe pensa la miee la tosa Se te gh'heet nient alter de fa' mangia el pomm e la banana e va a lavass i dent. Se legg continuament che imperversen i attach de panich. Alter che panich. Per ti l'è on stress continovo, ona battalia; 30 or te basten no perchè bisogna studià la programmazion del dì' depoeu, i assolutamente sì' e i assolutamente no, i or de passà in farmacia o in anticamera del dottor de base. Meno mal che propri lì' te podet fass ona cultura nel legg i rivist, i settimanal, di mes passaa. Vigliacca se ghe n'è vun attual. E allora te podet finalment schiscià ona dormidina. Porco sciampin de solit stann denter ona vita. Incoeu no. Fann tucc a la svelta. T'è nanca sarà i oeucc che tocca a ti. Va' denter mezz indormentaa e dorma intant che el dottor te fa' dì trentatre. ECCO, SÌ, la giornada perfetta la dovarìa vess de trentatrii or. Trentatrii, trenta,trent,trrrron,ron… “sst, svegliel minga se de no chissà fina a quand el scriv…” brivio.roberto@yahoo.it