Andavom in piazza Cavour

Milano, 13 novembre 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Donca, via Palestro 2, e te set davanti alla Società Svizzera che l'è lì dal 1883. Pensa ti che l'ha vist tutt quell che l'è success in Piazza Cavour in 135 ann. Mi me ricordi domà la Gran Birreria in on capannon in doa adess gh'è on caseggiàa cont la galleria. Ghe sont mai andà perché seri fioeu ma m'hann dit che gh'era on gibilè (chiasso confusionale) de la madontena. Inveci me recordi propri in quel sit quand han derbì el Cinema e la libreria Cavour de Renzo Cortina che l'ha faa cont mi i Cabaret Letterari, che in la soa galleria d'Art hoo leggiù per la prima volta i poesii de la mamma de Luca Vernizzi (el pittor Treccani, per la partecipazion, m'ha regalà on acquerell che tegni semper in esposizion). Nel palazz ciamà de la stampa, in alt, gh'era l'Acting Studio, cont el so' Maester el Marches Arardo Spreti. L'ha miss in scena al Santerasmo Il Ballo dei Ladri di Anouhill subit depoeu la gestion del Carlo Lari e de la Lida Ferro.

Quand serom fioeu andavom in piazza Cavour a guardà, da la part giusta, in temp de pioeuva o de sluscia (acquazzone) la statoa in bronz del Cavour che la par che pissa. L'e' minga on effetto ottico, ma la man che vista da ona particolar angolazion la sembra el pisell ch'el spand acqua. Nel palazz di giornai gh' eren i agenzii stampa e anca l'offizi del Mario Casalbore, on personagg important nel giornalismo. Gh'èren anca i offizi del primm direttor de Historia, Alessandro Cutolo, personagg televisiv de la prima ondada cultural cont el programma, “Una riposta per voi”, replicà a la RaiTv per 12 ann. Si, Lunedì 12, ore 18.30, pien de sti immagin sont andàa a la Società Svizzera in doa Giuseppe Ferdico, on amis, el presentava el so' liber intitolaa Jazz a Milano, concerti, dischi, radio, interviste, momenti di vita e incontri dell'autore, ediz. Pegasus. L'hoo no sott man, anca se la copertina me risveglia on ricord, ma i protagonsiti a hinn de importanza mondial: Ella Fitzgerald, Louis Armstrong, Chet Baker, Gorni Kramer, Bruno de Filippi, Franco Cerri e Enrico Intra.

Son semper felis de ritrovamm cont lu, maester, inventor del Cabaret a Milàn, musicista formidabil e semper col sorris amichevol, direttor de ona scola Jazz comparada al Conservatori . Mamma mia, hinn passàa cent trentacinq ann da la fondazion del Centro, 73 da quand hoo comincià a passà per Piazza Cavour. Me ricordi la bancarella del librèe Tarantola in doa hoo comprà i primm liber a prezzi strascontaa, ona mia compagna de Accademia (Signorelli !) che l'abitava in Palestro e che al primm ann la se presentava dimessa e al second inveci pitturada, vestida a la Moda, petto in foeura panscia in denter, tett all'avanguardia e minga siliconaa. Ona cartolina disegnada. De quei ambietaa tra i militar che sifolen (fischiano) in ammirazion de ona bionda sbottenta (prorompente). In alt del palazz sede de El Corriere Lombardo e La Notte, gh'era on teatrin, Ho incontrà lì per la prima volta Walter Pinetti, che l'ha ciappaa poeu el nomm de Walter Valdi, ch'el provava ona rivista goliardica col so' famos monologo “Galeazzo el pilota del… razzo” . Ultim temp de la Goliardia, che la sarà cancellada dopo el sessantott, e de ona compagnia semi professionista cont on comic irrefrenabil “Gigi Carletti” allev come mi de Esperia Sperani e la Maris Arcudi, subrett, che quand l'entrava in scena mezza biotta la scatenava on putiferio come la Gagarella del Biffi Scala. Gh'aveven in scena al Manzoni ona rivista. L'è li che hoo sentì per la prima volta Ifigònia col so' vers principal “Noi siamo le vergini dai candidi manti , siam… di dietro e … davanti. El Centro Svizzero, per tanti de la mia generazion, l'era on ponto de riferiment in la città.

Ier hann presentà el liber de Giuseppe Ferdico, “Jazz a Milano”, cont l'introduzion de Vittorio Castelli che, credi, in la soa vita l'abbia giràa tutta Milàn almen des volt a sonà cont la band “in cammino”. L'è passaa propri in piazza Cavour ona settimana de Carneval, dopo che l'aveva lassà la Ricordi. Al tavol del bar de fianc a la libreria, recitavi su richièsta de Renzo Cortina, el me monologo in frances su la fabbricazion de “Le Champagne ou Champignon che dir si vueille” a “Ruggero Orlando da New York”. Vers la fin, d'on bòtt (improvvisamente) el se recorda che el gh'aveva de fa ona presenza a la Società Svizzera. El salta su 'me 'na bissa. El ciappa on taxi al postegg de faccia vosand “via Palestro 2”. El taxista abituà ai stravaganz de la gent sbassa la stanghetta del tassametro, infila la prima e se moeuv per girà el semaforo e imboccà la Palestro dall'inizi ( i numer partissen semper dal centro) . Cortina el vosa all'Orlando (dialogh girà in milanes): “ma l'è chi, denanz a ti. Basta traversà la strada!” e el Ruggeron dall'interno del taxi cont i man come fudess a la television “ sì, adess ghe disi che s'eri in ritard per colpa del Champagne del Brivio. Vegni dal Forlanini e gh'era traffic!” Ecco el perché del taxi. El dì dopo me telefona Renzo Cortina. “Te voeuret savè come l'è andada a finì la storia del ritard al Centro Svizzero La presenza l'era no per quella sera. El taxista, l'ha pretes el tragitto Forlanini – Cavour. L'Orlando l'è partì cont el dispiasè de minga avè sentì el final”. Tel chi de seguit per i curios ( pensa che se la storia la succedess incoeu el Ruggero el podaria leggel sul Uattsapp): “ Nous connessons plusieurs de marque de champagne. Le Don Perignon, le champagne clericall, de le Vaticaine. Le Tettinger, le champagne sexuell. Le Piper, le champagne de l'homme soleil. E le Moet Chandon elancè par on compagnie de chansonnier francais qui s'appelle: “Les compagnons de la chandon e lorsqu' il boivent il chant: allons chandon de la Patrie, le jour de boire est arrivè.” brivio.roberto@yahoo.it