Memo Remigi autore dell'indimenticabile Innamorati a Milano
Milano, 25 ottobre 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Quand foo i me spettacol, ona volta pagaa ben, adess domà de beneficenza, me desmenteghi semper de propagandà i me Cd e i me liber, specialment i ultim. Rivi a la fin, depoeu la canzon Porta Romana e l'esortazion final ad amass “ amatevi a qualsiasi età, in qualsiasi posto, anche qui se volete, faccio spegnere le luci e… (ridada del pubblich), Però l'uomo sia più gentile con la sua partner. La guardi negli occhi e le dica “se tu mi farai vedere i tuoi due occhi azzurri io ti farò vedere io miei due marroni”. On dì, a la television, Costanzo show, me par, la prima ripresa minga quella de adess, me ven on scioppon. Jacchetti, ospite de qualità, el ciappa la chitarra e canta voeuna di so' mini canzon. L'era 'sta frase, la stessa, ma voltada in musica e cantada. So no in doa l'aveva sentida, ma mi olter che recitalla a la fin d' ògni spettacol, l'hoo pubblicada nel liber “Attenti al Gufo” ediz. Meravigli. Certo l'aveva sentida, gh'era piasuda, ed eccola in TV, in on programma… de nient! Per on poo de recit hoo cambià el final e sont tornà a la mia veggia “Spiga di grano” cantada anca dal pubblich. 'Ndemm al Piccolo Teatro Studio per la presentazion del documentari del Svampa. Semm tutti sul palch, Brivio, Patruno, Svampa, Oreglio e… Jacchetti. El voeureva cantà cont numm. Final, Porta romana. Foo, come al solit, cantà el pubblic, rivi al final, blocchi tucc e rivolt intenzionalmente all'Enzino disi pubblicament la storia dei “marroni”, poeu foo ona gionta.
“Adess” disi semper rivolt all'Enzo Jacchetti “ te regali on altra storia de mett in musica in di to' mini canzon. E tiri a man quella del Scion Connery che quand l'entrava in di negozi, in perfetta sintonia con la pubblicità fatta in TV, faseven finta de riconossel no. Entra al Gin Rosa che ona volta l'era in Piazza San Babila. Se al post de on stilist che fossi sta' mi, vista la tradizion, tenevi all'interno el bar per da' el Gin Rosa come aperitiv ai client. Entra, disevi, Scion Connery el ordina appunto on Gin Rosa. El camerer nanca ghe dà a tra'. Scion el se guarda in gir. Gh'è on avventor poggià al banc che ghe gira la s'cena. Scion ghe bat el medio de la man su la spalla. El tizio se gira. Scion ghe dà la man intant che el dis “Bond! Geims Bond!”. L'alter ghe la string cont simpatia intant che el rispond “Sepp! Giuuusepp!”. L'era noeuva per tucc. Hoo vist piegass anca i me compagn. El pubblich squas me fa' ona “standing”.
Beh, a proposit de standing ovazion, l'ultima che hoo vist l'è stada quella a Memo Remigi quand al Testori, sotta la Region, per ona manifestazion organizzada dal Del Compare e i Donatori de Sang dell'Ospedal Sacco, Cesare Cadeo l'ha ciamà in scèna. Mi voo in gir de chi e de là, come ne la canzon La Balilla, a di' che i me canzon hinn semper attual. Lu' el dis nient. Basta dumà dì el titol de Innamorati a Milano ed ecco che la gent la se alza in pè. L'è ona grande canzon. Ma lù, anca se l'è minga tant alt, l'è pussè grand anmò. El se bauscia per nient. El se parla mai addoss. El cerca nanca de vess simpatich perché l'è in natura. El dis do' paroll e la gent l'è subit da la soa. Potenza de la personalità. Gh'è gent che la faria i salt mortal per accattivass el pubblich e lu' senza ona forzadora ghe l'ha indoss subit, come se fa' vedè. La stessa forza del Tony Renis, dell'Enrico Intra (che l'è on poo che el me scriv pù), del Piero Mazzarella e, second propri quest'ultim, de Grazia Maria Raimondi. Poeu el mett i man su la tastera, el comincia a sonà i so' composizion e te se levet el cappel. Gh'hoo ditt, on dì che l'hoo incontràa “Femm 80 ann nel desdott tucc e duu, perché se mettom minga in on teater e i festeggiom insema” L'ha dit subit de sì inventand el titol sui do pè “Ot..tanta voglia di vivere”. Sarà perchè l'ha dit in on moment particolar (serom ai funeral del Piombi), sarà perché hoo scritt i canzon macabro-cimiterial, l'hoo trovà spiritos. Titol cità in vun de questi articol l'ann passàa. Cont la scusa valida de on intervista per el me documentari che sont a drè a girà da on para d'ann cont Guido Veronesi, coregista e autor con me, l'ho vist in la ca' del so' fioeu a Monza, insema a la miè Lucia, per intervistall e eternal in quella che ona volta la se cjamava pellicola e che adess l'è domà ona serie de scatti da travasà su ona roba cjamada Link e che gh'ha no bisogn de sviluppo e stampa, ma che cont la stessa girada te podet fa' i montagg, doppialla, insonorizzalla e ottegnì el prodotto finito da mandà, guarda, guarda, via uotts app in doa te voeuret, anca in Cina. La riceven semper in temp real. L'è on miracol. A l'è ona trasmission cont la velocità de la lus. Ona scomposizion e ricomposizion portentosa.
Tra on quai ann, v'el disi mi e ona centena de scienzià, avaran inventà el moeud de teletrasportà i personn e allora, addio ai macchin, ai treni, ai aereoplani, ai nav, ai biciciclett, moto, tandem, tram e metrò. Ciaschedun el se teletrasporterà personalment. La noeuva generazion dei telefonin. Bisognerà stà attent ai numer. Se vun el se sconfond el ris'cia de entrà in di mollecol de on alter E ghe sarà on casin de indentità difficil a sgarbial anca per el Signor. Squas squas ghe scrivi ona canzon la do' al Memo Remigi per musicalla. Comincen inscì i collaborazion. Nell'intervista l'ha cuntà de quand el D'Anzi le faseva sonà e inventà canzonett tutt el dì, el m'ha mostrà la soa idea per el spettacol. Lu el canta quattordes (14) canzon e mi quattordes (14)scènn tra canzon e monologhi, intramezzaa ai so', squas a fa' contrast con quel ch'el canta lù. E l'è tant precis che el m'ha daà i titol e el contenù. La prima la dis: “quando suona la sveglia/ mi butto giù dal letto controvoglia/ fuori c'è ancora buio/ è già mattino/ Milano gira intorno a un “Cappuccino” a mezdì la gira intorna a on: Panino.
La sera “c'è tanta tenerezza nel mio cuore, Milano gira intorno al nostro Amore.” Mi ghe metti subit ona canzon che la fa' part de filon “colazion, disnà e zèna”. Ohei. El m'ha fa sentì tutti i canzon in ordin de sortida: “Emme come Milano” “Tra i Gerani e l'Edera” “La verginità” “ Io sono di Milano e tu ” “ Ma pensa a te” “Enne come Napuletanella” “ Innamorati a Milano” “La traversata di Milano” “Amami Alfredo” “Tra tre milioni di persone” “ Il Carnevale di Milano” “In Africa”. Mi ghe metti …'sto minga a fa on elench. Basta el sò per el moment e tranne “Innamorati” L'è tutt noeuv. Spetti domà che on quaivun el me daga el Dal Verme e depoeu “Milan slarga i brasc che i milanes correran a ròsc (frotte)”. Prezzi indicativ € 30/20/15. El surplus tirà via i spes, el sarà per i Donator del Sacco e per I Martinitt del Trivulzio. La data Dicember. Se ghe fudess liber el teater, anca el 31. Inscì festeggiariom i 80 (tucc duu), i '60 de palchscenic(mi), e insema l'ann noeuv (2019). Forza Memo, come el Binda e el “Gibrardengo” tirom la volada per anmo' trent' ann. Inscì tant Beh, mettom minga limit a la Provvidenza.