Milano, 12 dicembre 2019 - l se ciama “Ciù Ciù” e el gh’ha anca on sottitol: “bollicine musicabaret”. L’è l’ultim local derbì come cabaret. Bancon in fond visin all’ingress, fil de taol, ciaschedun per quatter person sentà giò vuna de front all’altra fina arrivà a la pedana in doa ghe stan i strument musical, on para de cadregh, lus e microfoni. Se disaria che l’è on post spartano, scomod, propri come l’era l’Intra’s Derby prima manera. I spettador beveven l’un tacca’ all’alter, cantaven, rideven, staven cito quand in pedana se diseven robb de tutti i color ma cont ona “seriezza” da impressionà. Quand hoo traa in pè el Refettorio gh’hoo pensaa de dagh la medemm scomodità. Cadregh de gesa, panch, sgabei per mett i biccer.
El Ciù Ciù l’è on tantin pussè còmod. In sui taol se ponden gabaré col mangià e bev. L’è pien cont settanta personn. Quand ghe sont entraa per la prima volta, per la festa di novant’ann de Vito Molinari, regista TV cont ona vita vissuda all’ombra di telecamer, me sont trovà come la prima volta, nel lontan 1960, quand cont el nomm de Roberto BI cantavi i canzon che avevi scritt e che speravi de commercializzà. Ma po’ vess che podessen diventà commercial vers che diseven “vorrei tanto suicidarmi”? o “bevi Rosmunda bevi nel cranio vuoto del tuo papà”? Tutt quest el me domandarà stasera Enzo Iacchetti che olter a vess quell’attor de la madocina che l’è, l’è anca el patron del local. El me diseva che le voeur tirà su come i vecc cabaret di temp passaa, in doa se diseven robb che te restaven in del co’.
T’è capì l’Enzino?! Me diseva che on cont l’era fa’ tucc i dì “striscia la notizia” on cunt l’è tirass a drè on local e fall diventà on ver cabaret. El m’ha dit che el 27 presenterà el me ultim liber “Canzoni popolari milanesi” su “Striscia”, e che el 12, incoeu, stasera el me farà on intervista “faccia a faccia” che la spazierà dall’inizi del cabaret cont la Milan che la stava per entrà in del Boom, fin quand l’è entrada in del Crac a adess che l’è anmò proiettada vers on futur sberlusent. El cabaret con tanti gabarè l’è in via Ricciarelli al trii. De cabarettisti che laoren e che mangen gabarè pien de fett de salamm e formagg ghe n’è semper on para. Ma Iacchetti el dis che stasera bastemm numm duu. E allora cosa aspettii. Ve leggiaroo in milanes l me articol, inscì podaremm comincià a intendess con sta meraviglia de dialett. N’est pas?