Treno in ritard, controllor precis

Storia vera su la linea Saronn-Albairàa tra resun e rigor

TRENO

TRENO

Milano, 14 febbraio 2019 - Sont on appassionà di transport pubblic. Quand podi ciappi el tram, el metrò, l'autobus in città, el treno foeura, preferissi che toeu la macchina. Me stressi de men, leggi intant che se viaggia, gh'hoo no la fever del sorpass, gh'hinn minga camions che me dann fastidi, se me ven sogn dormi domà cont la preoccupazion de svegliamm a la mia fermada o la stazion destinataria, e quand rivi me senti riposaa anca se hoo fa' on viagg de mila o domila meter. “Perché ” senti giamò ona vòs ironica “ se po' straccass per on percors de 2 chilometri che podarien vess anca camminaa ”. “Certi volt sì” rispondi preparaa all'interlocuzion fada con l'espression intelligente “fa' 2000 meter in fila indiana, cont i tubi de scappament che fann scappà el gas davanti, de drè, a destra e a sinistra; incasses per el traffic a cròs, quand te se blocchet anca per dusent meter; ferma la macchina se l'acqua la va' in ebollizion; passa col giald per snèllì el traffic e ciappa' na multa, e poeu te vedet se te sògnet el mezzo pubblico. Poeu te se incasset perché el tram riva no per on quart d'ora quand el dovariss avè la frequenza de ses, sett minutt, e poeu ne riven do, el primm pien pien e el second mezz voeuj. Quand la linea verde che la va' a Gessaa o a Cologno Nord la te sbatt in mezz treni che se fermen a Cassina Gobba e te spettet el to', in certi orari anca vint minutt anziché se o vott perché gh'è quel “Gobba” che el voeur dì nient e che te complica la vita.

Con la ferrovia te se incasset quand cancellen i treni depoeu che t'han annonzià on primm ritard de cinq minutt, che el diventa de des, de quindes e poeu el treno ven sostituì cont el successiv. Hoo giamò trattaa l'argoment. La storia che m'è capitada ier var la pena de savella. Donca. Mi squas tutti i dì ciappi el treno per Trezzan in sul Navili da Lambraa. L'è la linea Saronn Albairaa che fa' el servizi come ona metropolitana. Ogni mezzora on treno passa da Lambraa e riva a Trezzan 35 minutt depoeu, quand l'è minga in ritard. Roba che succed squas tutti i dì. E l'altoparlante el se scusa cont i viaggiator per el “ritardo previsto”. De solit se salta la fila de la biglietteria comprand el bigliett all'edicola sotterranea del Metrò. E se po' saltà anca la obliterazion basta scriv data e ora sul bigliett. Disen de fall prima de montà in vettura. Ma in 'sto cas l'è mej usà la macchinetta. Però se te obliteret e poeu cancellen el treno e te podet no ciappà el successiv te sbattet via i danèe! E allora mej fall a penna (biro, chè la matita la var no). E se per via de 'na telefonada o ona distrazion te se desmenteghet de scriv data e ora Ecco, chi entra la storia che voeuri cuntav. Tredes e cinq, mi e on alter vegget de circa 80 ann, corrom dall'edicola sotterranea del metrò fina al binari trii (hinn pussèe de 500 meter) per ciappà el treno giamò annunziaa. “Il treno Saronno Albairate delle 13.05 è in arrivo al binario 3. Vietato superare la linea gialla.” Confidom sul fatto che dall'annunzio all'arriv sul binari trii passem squas 5 minut. Saltom sul treno e se sentom giò mi a sinistra e lu a destra del corridor. Mi scrivi el bigliett. Lu l'è taccaa al telefono. El treno riva a Forlanini quand passa el controllor. El veggett se sbatt i man in la front, tira foeura da la sacoccia el bigliett e ghe dis al controll “ch'el scusa, s'eri al telefono e me sont desmentegaa”. E controllor invece de sorrid e de dì “fa nient ghe pensi mi, ma se recorda 'nantra volta de obbliterall”, cont la supponenza de la divisa el fa “ Non posso fargliela passare”. Te capìì. La ciappà el veggett per on evasor, on lader, on delinquent che el voreva falla franca. “Va ben “ el fa' “ quanto l'è Ghe de paga' on vint per cent sul prezzi “Hinn bigliett da vun euro e quaranta centesim” “No” el fa quell'alter cont on sorris trionfal “A hinn cinq euro e on quaicoss !” “ E mi cinq euro i e troeuvi in terra “ el fa' el vegget “ Gh'hoo chi 80 centesim, pussè del vint per cent del bigliett” “E allora ghe foo la multa. Favorissa la carta d'Identità.” L'evasor lader la tira foeura dal portafoeuj, ghe la dà, el controllor se lontana perché intant el treno l'è rivà a Romolo.

L'alter ghe vosa a drè “Speri che ghe vegna el rimors quand domandarà minga el bigliett, come l'ha faa cont mi, a on quai viaggiator che se ved da la faccia che l'è on menagramm.” Depoeu on quai minutt, el treno l'è per rivà a San Cristofen, el controll el torna, ghe restituiss la C.I. e fa' per 'nda' via. “ Com'è El me dà minga la ricevuda ” “Per daghela el me la dev firmà.” “Ghe firmi, ghe firmi” El controll cont la macchinetta in dotazion da la Trenord, ona ferrovia ancamò pièna de disservizi, ghe faà finalment el bigliett. El vegget el firma, el controll ghe dà la ricevuda e el va via lassand in sul sedil tocchej de carta da ruera. El vegget le cjama. “Ehi, scior, ch'el netta el so' sporch, El vorarà minga che le fassa mi o lassal sul sedil come fann tanti che ghe domanda no el bigliett. Lassen giò bottili ancamò mezz voeuj, giornal, cartinn de tabacch, bigliett vecc, fazzolett pienn de nariggia.L'ha fa' la soa multa Ch'el netta anca se el se cred on P.U. “ Toccà in sul viv el controllor sbatt la carta de malavoeuja in del portaruff sotta el finestrin. El vegget, intant che el treno partiss de Cesan Boscon, ona stazion prima de Trezzan S.N., el varda el bigliett. “Verbale di accertamento. 11785233. Treno 24131, data 11/02/2019 - 13e.19, ho accertato ecc. ecc. la seguente violazione Sprovvisto di titolo di viaggio ecc. ecc. Trovato seduto con biglietto non vidimato ecc. ecc. (l'è chi ch'el doveva mett ona cròs). Importo da pagare 1.40, sanzione 32.50, spese di proc. 10, tot. 43,99. Se te paghet de chi a 5 dì. Entro 60, la cifra la diventa 57,90. Perché quel vegget el gh'aveva no 5 euro. Ciolla! I ferrovii se venden a caro prezzo. Perche' fann minga 57 e 99 Come l'outlet del funeral che el gh'ha la medemm pubblicità dei supermercaa.

Hoo tegnù el bigliett. Gh'el pagaroo diman. Ma mandaroo ona domanda al numer dell'accertator inflessibil cont chi educatament l'ha dit “scusa me sont desmentega', s'eri al telefono” Se el gh'aveva minga 5 euro, come farà a pagann des volt tanto El PU risponderà: Inscì l'impara a obliterà! Cèrto quand i treni a rivàrann semper in orari inscì i viaggiator se fidarann e inveci de la biro o della matita copiativa userann i obliterador… se sarann minga ròtt come succed de spess!