Programmi in televisione
Milano, 11 ottobre 2020 - La mia mamma la me diseva a la fin de ona settimana de TV - a S.Paolo al Tagliamento, ona frazioncina de Morsano in provincia de PN, se te podevet fa’ dai desdott (6) in avanti - che l’aveva scritt al direttor de la Rai, al tal segretari, a talaltri attor, presentador, giornalist, per fa’ i so’ compliment o rimostranz. Eren pussè i ultimm che i primm. E mi ghe disevi “ Chi l’è che te dà a tra’, mamma. I tò letter finissen in del ruff. Gh’è nissun chi e legg”. E lee “Lassa sta’, a quaivun ghe capiten in man”. E adess voraria scriv anca mi. Per esempi a la Ferrari, quella del 90° minuto: “Te set bella, perché te studiet no on look pussè sempi? Te parlet in ona trasmission sportiva. Quell trucch lì el va a dagn di to’comment.” Voraria scriv a chi trà in pè la trasmission de la Carlucci “Ballando sotto le stelle” “… I stori a la Mussolini che la litiga cont la Lucarelli fan spettacol ma domà per on quai minutt. Vint minut de ciaccer stufissen. Te metten voeuja de cambià programma. E inscì i menad cont Mariotto,quel ch’el fa’el smorfiosett, la sninfia. Che ball! La trasmission la podaria snelliss de almen mezz’ora”.
Voraria scriv a Fazio “… Bella la prima part del programma cont intervist interessant. La Litizzetto la stufiss on poo cont la soa vos che la te penetra in del co’, ma pazienza. Però basta cont la taolada final. Gh’hinn a la taola sciori artist? Che faghen di numer svelt come Ale e Franz, come Forrest, squas semper tropp longh, però”. Voraria scriv a Mara Venier “Te seet brava, simpatica, vulcanica, cont la ridada che la se trasmett anca foeura del schermo ma basta cont l’incensamente del bell, de la bella”. Voraria scriv a la Rai, a Mediaset a La 7. “…Se se tratta no de la storia de on personagg (quella de Mennea insegna) o de ona macchina o de on campion, o de ‘na fabbrica, tucc i filer hinn istèss, i poliziesch a volt cambien nanca situazion, se ne fann do de fila te set nanca quand la finiss voeuna e la comincia l’altra, e se la pubblicità interromp l’azion, a volt te credet che macchin, mudand, assorbent, salamm e birra sien part del telefilm. Forsi l’è ona strategia. Per tantissim la serv a nient. Hoo sentì dì “ Mi, quella roba lì la compraroo mai!” .