El premi pussée bell? Ona lettera

Milano, 17 ottobre 2019 - Giovedì, venerdì e Sabet gh’hinn i premiazion del Tenco all’Ariston de San Remo e m’hann invidà a cantà per on quart d’ora i me canzon, quei che hoo scritt per I Gufi. Anzi per mi. Doveven ancamò nass che mi cantavi per la Voce del Padrone cont el nomm de Roberto Bi. Hoo mai pensà de andà al Tenco. Credevi che el concors el se svolgess in trii giornad direttament là. Invece premien quii canzon che la giuria l’ha giudicà degn de concorr e che hinn stà cantà tutt l’ann. Finida ‘sta buriana, me foo arrangià la canzon “Invecchiare con te” paroll de Roberto Brivio musica de Alberto Anelli, la registri in ona sala professional, la metti in on Cd singol, la foo passaa (disen che l’è difficilissim, squas impossibil) per i radio nazional, i network privaa e la metti in lista per l’ann che vegn. I ca’ discografich metten sota on para de uffizi con chi el gh’ha i conoscenz giust per fa’ passà i canzon minga ona volta sporadica ma tanti volt inscì de fa’ sta’ in testa el motiv. Oddio, datosi che de motiv ghe n’è pu e l’è tutta ona rincorsa cont la batteria e on quai effett sonoro, i canzon hinn ancamò canzon? Devi dì che se ricognossen facil per i versasc che ghe metten, ciamà ‘la mia musica’, per caratterizzala. E allora ‘na volta l’è ‘na tromba cont la sordina, ‘na volta l’è ona introduzion cont el contrabbass, on’organada, ona schitarrada, on assolo de Arpa, on ocarina, ona slittada de tast cont la fisa magara col son musette. Gh’hoo de cantà trii canzon. Hoo scelsii: Non maledire (impegnada), on pot pourri di me e Porta Romana, come final. Giuri che ie foo cantà tucc. L’alter di’ leggevi i medai, i targh, i premi e i benemerenz che hann ciappà tanti me collega. E el premi a la carriera, e quel di sponsor, e per ona trasmission i pomm d’or, i tomates d’argent, i pecor de bronz, i campanil de legn... Roba che te tegnet a fa’ polver. Per mi i premi pussè comod hinn i letter. Ti e mettet in on dossier, in ona cartella, e poden restà lì tutta la vita, anca do, trii generazion. I nevud a la scoperta di robb vecc di avi, i e trovarann e allora sì che la sarà ona commemorazion importanta, da liber. brivio.roberto@yahoo.it