Mai desmentegass del D’Anzi

Milano, 29 agosto 2019 - M’ha telefonà Tony Martucci semper pien de iniziativ per dimm che el 9 settember gh’è la scernida di canzonett che parteciperann al Premio D’Anzi 2019, a la Curci, la ca’ discografica che ha ospità el grand autor per ann. Lì gh’hinn i tesor de la musica italiana detta “vegia” ; tanto vegia che i cantant ogni tant ne tiren foeura voeuna e la rilancen con success mondial. Anca mi i e canti. Hoo trovà la manera, senza cambià musica né paroll, de faj entrà nel mond del Cabaret, quell che ‘l faseva Paolo Poli, numm Gufi, Franco Nebbia, la Velia Mantegazza col so’ marì Tinin, giornalista e umorista, Jannacci. El Cabaret che l’è sta’ inventà a Milan da Enrico Intra. Parli de “Non dimenticar le mie parole” “Abbassa la tua radio per favor” “Tu non mi lascerai” “Ma l’amore no” “Bambina innamorata” “Saran belli gli occhi neri”, best seller del Rabagliati e de tutti quej che i hann cantà depoeu. Se me gira el gherbin per ottobre ghe foo ‘na arrangiada e metti foeura un Cd per Nadal. Quest’ann, come da trii o quatter ann a ‘sta part, el Premio gh’avarà la soa final all’Hilton Garden Inn de via Columella (vial Monza prima de la Martesana). El President, Direttor, Senator Della Frera l’ha miss a disposizion l’Hilton Club, ona sala granda e ospital, per el svolgiment de la manifestazion. Ne parlaremm Giovedì 12 Dicembre in anticip su Sabet 14, data fissada per la proclamazion del vincitor.

 incuriosiva. Me domandavi “l’è un’associazion che la fa’ i scherz?, che gioga a giogà? che la se propon de fa’ divertì’ la gent? che l’è formada da chi sa no se fa e va in gir a ridd, a fa’ ridd? che la fa’ simposi per cuntà barzellett? o impres degn de vess ricordà perché hinn fonda’ su la comicità?” Nient de quest. Con sorpresa ho scopèrt in l’unica soa cartella storica che se tratta de on rosc de imprenditor milanes che a la fin del 1800 (1898), in ona pausa del laòr, hann decis de sfruttà i lòr capacità de capitan d’impresa per iuttà chi n’aveva bisogn. Gh’è minga on liber che el ricorda i atti de beneficenza . Se sa che i bonn azion hinn pussè bon se resten nel coeur de chi j a faa. ‘sta società de solidarietà ambrosiana l’ha avù tra i fondator Achille Brioschi, bontempon, famos per la soa vitalità, i so’ ideii, la soa capacità de mettej in pratica ( l’unica pagina che fa’ la storia dell’associazion mett come aggettiv “effervescente”). E adess el President l’è Massimo Santi de “I Santi”. Da temp insema al Martucci, colonna de Milan (gh’hann propost de fall diventà ona Guglia), presentador, ideator, organizzator el porta avanti cont Gino Frojo e i Amis Musica on festival, che tutti i ann el par all’ultima soa presentazion e che invece ‘miracolosament’ el torna in pè viscor e fort. Mi ne farìa anca ona trasmission televisiva. Minga ‘na ripresa che porta avanti nient, ma on po’ de trasmission, combinaa, anca pover se voeurom, per dimostrà che gh’hinn no domà i canzonett napoletan (primm nel mond e le dis on milanes), ‘musica divina’ come le dis el D’Anzi, ma anca i milanes e poeu sull’onda i torines, i veneti, i genoves, i bolognes.

Pensa che serie de trasmission: canzon e cusina, canzon e paesagg, canzon e prosa local, canzon e folklore, canzon e attor e cantant celebri ma de la region o della città che la ven trattada. Se gh’è on quaj capp, direttor de la melonera che inveci de fa’ soa l’idea el voeur scrivom o ciamamm, gh’è ona serie de scalett tutt pront. Chi l’è che po’ sponsorizzà? A part industrii e commercio local, el massimo sforz el sarìa quell di Region. Per vessigh. Per laòragh. Per perfezionà l’idea. Ecco. La soc. dei Buontemponi presenta…(beh, almen el titol mèttemel in de la privacy)…Chissà che ghe sien Santi che me leggen. Ne ciamj minga vun, ne ciamj tanti. Minga quell di caramell : San-agola; quell di tribunal : San-cito dalla legge; di pedoni: s’an-dava di frequente; di scontent: s’an-noia; di disperaa: s’an-goscia; di fraa: san-dalo; di purgant: s’andrà di corpo; di stitich: san fa minga; di scansafadigh: san minga se fa’; di smemoraa: san no doa andà; el sant di michètt imbottii: san-guiss; imprecazion:sanformento. E ghe n’è alter. Basta trovà el liber “Meglio bastardi che mai dal diario di una cane” di Roberto Brivio & Augusto Mazzotti ediz. William (1974), in doa nomini Franco Cerri, el Sant ch’i j ha pensà con mi, nel ’62, a Castiglioncello, in barca, intant che Intra e compagnia faseven el bagn. Ma per conclud el discors di Buontemponi cunti al President de l’associazion Massimo Santi el sant che hoo sentì da la miè de vun ch’el se buttava da ‘na finèstra del primm pian “Aiuto, me marì el borla giò! El “san-sacca!”.brivio.roberto@yahoo.i