I Navigli a Milano
Milano, 12 gennaio 2020 - Milan l’è on gran Milan? “ Lassa pur ch’el mond el disa/ Ma Milan l’è on grand Milan/ Porta Cicca e la Bovisa / che d’intorni propri san/ e la nebbia che belezza/ la va giò per i polmon/e quand fiocca che gioia gh’è el parco e I bastion/ per scià senza andà al Mottaron/fa nagott se poeu pioeuv a andem giò a tomborlon/ in la pucia a puccià el panetton.” Quand te la cantet in ambient magari anca minga trop milanes la gent in coro la te ven adrè e a la fin del spettacol gh’è semper on quaivun ch’el te domanda “ma perché te cantet no la canzonetta per inter? Gh’hinn di vers che i stranger dovarissen sentì e imparà”. El comincia a cantà da “El Carobi e la via Brisa/ el carett di ciappa can/ se te vet sul Monte Merlo/ par de vess a San Venssant…” Hoo fa’ domand anca a quej che spanteghen de vess milanes da sett generazion. Pocch sann cossa e doa el sia Montemerlo. Se te ciappet i bastion da piazza de la Repubblica te troeuvet l’entrada su la toa destra. Andavom de fioeu a giugà, a fa’ roccia pensand de vess su la Grigna, fermà da la recinzion del zoo in doa per entrà te dovevet pagà el bigliett. Gh’era on ristorant che a numm el sembrava de lusso perché te vedevet i camerer in giacca bianca. ‘Sta immagin, Bracci, l’ha paragonada a San Vincent (Venssant) per poeu tirà a man la solita bausciada cont on frase ironic-umoristica: “cosa l’è Montecarlo Sanremo e Menton in confront de l’Olona e el Tombon?/ A Paris gh’è La Senna el Danubi l’è blu, ma a Milan gh’è el Navili e poeu pùu.” Convalidada da on finalin che inneggia a la cusina milanesa (forsi i duu, autor e compositor, saveven giamò che el Teater Smeraldo el saria diventà Eatitali): “On bel piatt de Busecca cont dent i borlott e on oss bus cont intorna el risott/e on litrott de quel bòn cont’on bel minestron fan content ogni milaneson”. Ona volta gh’era ona trattoria a l’Ortiga che se ciamava El Gatto Nero in doa te trovavet ‘sti delizi mangiativ. L’Attilio, el propietari coeugh, tutt padellent, l’era specializzaa in cusina spiccia, senza tanti menad a la Cracco, Marchesi e Master Chef chissessia. Morta la mièe l’ha comincià a mollà el local fin che l’ha vendù. Ades la se ciama “trattoria del General”, perché par che Radezky el fodess on abituè. E l’è li che hoo mangià come piatt tipich milanes, l’alter dì’, i polpett ciamà “mondeghili a la calabresa”. L’integrazion la comincia dal food, disarissen i linguisti.