Ona settimana de foeugh. L’è già Nadal

Semm al quindes (15) de Dicember, metà mes e gh’è de mezz el Mes che el Governo voeur mett a post, e ona selva de sardin che camminen, protesten, cont on pensèe nascost

Pranzo di Natale

Pranzo di Natale

Milano, 15 dicembre 2019 - Semm al quindes (15) de Dicember, metà mes e gh’è de mezz el Mes che el Governo voeur mett a post, e ona selva de sardin che camminen, protesten, cont on pensèe nascost: El Nadal. La festa che Papa Giulio l’ha obbligà a fa’ el 25 del mes cont on bambinel ch’el nass al frecc in ona stalla riscaldàa dal fiaa de on boeu e d’on asin. Gh’era de ciappà ona polmonite da ospedal, ma dato che i H eren minga stà inventà ancamò, la tradizion la parla no de toss, de raffreddor, de temp d’attesa long me la famm e nanca de vaccini antinfluenza. L’è cressù san me on pess san, intant che «Maria lavava, Giusepp el stendeva, el Bambin el piangeva pel frecc ch’el gh’aveva, taci mio figlio, che adesso ti piglio, la neve dai monti cadeva quaggiù, Maria col velo copriva Gesù».

Ah! l’ingenuità contadina. Nell’ultim me liber “Canzoni popolari milanesi” scritt a quatter man con Luigi Inzaghi, l’ho minga citada ‘sta canzon che cognussen tutti. Perché l’era minga in milanes. Ma in compens in del spettacol ch’hoo faa depoeu mezdì, 6-7-8, all’Auchan de Monza e 13-14-15 all’Auchan de Vimodron, n’hoo cantà, insema a Grazia Maria Raimondi, a Maria Brivio e Federika Brivio, on bordelleri. “Ohei, sciora Cesira, l’è lee che l’ha inventà i ravioeu de Nadaa?” “M’era vanzada ona sfoeuia de pasta. N’ho fa’ di listej cont ona rondella. Poeu gh’hoo miss sora tocchelin de carna de la sera prima. Datosi che dai listej colava el condiment i hoo quattaa con alter listej. La pasta la se taccava. Hoo dit: Va’ fioeu! Han capì: Ravioeu”. “El Nadal pussè bell l’è quell fa’ in ca’ di alter”. “Uei, Francesca cossa t’è preparà per el cenon de Nadal? – Oeuv in ciappa – Speremm de fa’ minga indigestion!”/ “Cervellee, ch’el me daga 30 gramm de giambon”, “Gh’el porti a ca’?”, “No gh’hoo foeura el camion”. “ Te voeuret on consili? A la sira sara i gelosii. Ai des or te veden tutt biòtt che te carezzet e te baset toa miè”, “Ai des or? Impossibil. A quell’ora sont semper al bar a giugà al biliardo!”... E adess che gh’avii ona quaj battuda per el cenon, forza. I convittaa spetten domà el moment de ridd intant che manden giò vin e pittocaja (antipasti).