Shopping in piazza Duomo a Milano
Milano, 10 gennaio 2021 - Domandi scusa ma nell’ultim articol me sont lassà andà a descriv on ‘immagin, dell’incontro di Re Magi cont la Madonna per avè el savor de ona donna che la gh’ha on fioeu che el piang quand el gh’ha famm, quand el voeur vess ninà, e ona mamma che se ved rivà trii personagg con regal “regal” che la stupissen. E allora scatta l’ironia che in pocch paroll la cambia la solfa de la melassa natalizia. T’è fa’nass el fioeu del Signor come on omm? E allora che omm in carna ed ossa sia cont tutti i difett di ommen. Gh’avarà temp per cress, predicà, creà la religion e a la fin diventà immortal con la mort nefanda che roman, e la popolazion in odio (ne basta vun, gh’èmm vist l’alter ier, per fa’ saltà i nerv a ona brigada) gh’han fa’ fa’. Sti moviment de folla i hoo leggiù in “Stefanino” de Palazzeschi, in “El fioeu tram” de Albert Wise. L’odio el se scatena e da’ origin a pericolos moviment de opinionist pront a tucc. El mal l’è che questa immagin l’ho descritta in italian. E contemporaneament in italian, duu pagin o prima on articolist ‘l sosteneva che el dialett l’è a drè a fini per via che i milanes hinn semper de men.
Devi dì el gh’ha minga tutti i tort ma che con ‘sto ragionament el vanifica l’operazion che tri ann e mezz fa’ el direttor Sandro Neri hann comincià cont entusiasmo. L’unich quotidiano che el cerca de penetrà tra la popolazion milanesa (Milano Metropoli) e della provincia (Monza Brianza) cont el dialett. Quel famos dialett che Franco Loi l’aveva trasformà in lingua e che lingua resta anca se piena de paroll italian che gh’hann minga la traduzion nanca in sui vocabolari. E ghe sont minga dom’ mi che scrivi, ma el Magni ch’el spiega moeud de dì. E da foeura personagg tipo l’Umberto Faini ch’el vorress rendel ancamò pussè facil. Canti e scrivi canzon milanes da ona vita e hoo semper trovà proseliti. La poesia l’è minga el me fort ma cont la prosa me divertissi e l’indirizz che metti a la fin l’è semper foriero (ecco la parola che se po’ minga voltà) de novità, nel senso che se troeuva semper on quaidun ch’el se lamenta, ch’el se esalta, che consiglia, che integra. Sarann in pocch, ma me piasaria che cont quei pocch se creass on moviment per fa’ cress la voeja de milanes. E allora ciamaria dal sciroeu di poetta seguaci del Franco Loi senza desmentegamm del Sessa, del Piermenegildo Bianchi, e de tutti quei (ghe n’ho ona raccolta) che cont la voeuja de salvà el milanes seguten a scriv. mail: brivio.roberto@yahoo.it