Campane
Milano, 6 dicembre 2020 - In del ’43 gh’avevi 5 ann. Serom sfollà in del Friùl, in pièna sarabanda tedesca che cont la Tot la obbligava a laorà sul fiumm Tagliamento. Inscì’ anca in del ’44 e ’45. Tornà da militar e viv per fortuna, el me pa’ l’è vegnù a toeun per tornà a Milan. Gh’hoo in ment i Nadaa passà in quii ann. Fasevi el cereghett e servivi anca mi la Messa de mezzanott. On atmosfera particolar, on pregà convint, on cantà cont passion e a la fin a «cjase par vjodi i regai» (a ca’ per vedè i regall), che eren duu pomm, frutta secca, el liber de Minuzzolo e Giannettino, e la Dama. Quell che colpiva eren i campann, ver, che sonaven appèna appèna squas cont riguard per l’ora. Dal ’46 in avanti a Milan andavom semper a la Messa de mezzanott, o a la gesetta de San Carlin, in mezz al Lazzarett, ricover di appestàa manzonian, o a quella de San Gregori in la via omonima sede anca de on oratori in doa hoo passaa i ann pussè bej de la mia adolescenza, in doa hoo comincià a recità a scriv e a giugà a pallacanestro, nomm italian, minga l’odierno basket. La mia nonna de Villasanta la me diseva semper «l’è minga assèe corr quand sona i campann per podè dì de vèss on bon cristian».
‘Sta massima la var per quej che in ‘stì dì discuten perché el Governo el seguta a tegnì el coprifuoco di des (22) anca la nott de Natal. Sì, l’atmosfera, sì la tradizion, sì l’usanza, ma intanta chi faseva el zenon a la vigilia, la Messa de mezzanott la perdeva, chi a Messa l’andava no per abitudin la perdeva a bon cunt, chi l’andava a mezzanott ch’el porta pazienza per l’anticipo. Ghe sarìa de di’ che la Gesa l’è voeuna di primm a stagh adrè ai rego. I volontari incolònnen la gent anca per la Comunion! Se gh’è de pussè organizzaa?! L’entrada l’è a la spicciola, in sortida gh’è on po’ de rebelott, ma l’è question de minutt, e tucc cont la mascherina, i guant o el disinfettant, e senza fever. E nissun el protesta perchè el Nadaa l’è la festa de la pas. Basta imparà i so’ proverbi, i so’ aforisma:« Che porch d’on mond: a Nadal hinn tucc fradej, a San Steven tirèn foeura i cortej» «A Nadaa chi paccia e bev e ‘nega ne la grassa,/ chi tira la senta (cintura) e dorma sora on assa:» « El coeur in pas e on’onsa d’amor/ l’è on bon motiv de lodà el Signor» «La Messa de mezzanott l’è longa quand la devozion l’è curta» «Se fa bell el dì de San Gall, el fa bell finn’a Natal» «…e avanti savoia che Nadal te porta gioia» « … e anca adess che semm chi a patì/el Natal l’è pussè bell di dì».