Medici
Milano, 1 marzo 2020 - L’alter di’ sont andà dal dottor de base che gh’hoo fin da quand l’ha ciappaa la laurea, la specializzazion e l’è diventà el dottor de la Mutua. Uei, l’è minga on termine riduttiv. El dottor de la Mutua l’è quell che cont on’oggiada l’è in grado de fatt ona diagnosi. L’ è quell che el sa vita e miracol de la toa situazion sanitaria e che l’è in grado de suggeritt ona risanada anzi ona riqualificazion, come disen incoeu quand el Comun el gh’ha de mett man a ona soa ca’ piena de abitant che se lamenten perché ghe manca l’acqua, i servizi funzionen mal, i prà hinn pien de sporcizia e la ca’ l’è fatiscenta. Donca, la novità l’era che dovevom spettà de foeura nell’andron perché la Region in base al decreto ecc. impon de entrà in del studi domà a ona persona la volta. I alter spetten, anca tucc insema, anca fudessen cinquanta, davanti a la porta, in pè. E intant che spetten gh’hinn subit i protest di resident che voeuren minga vess contaminaa e pretenden che i mutuà staghen sul marciapè o sul praa. Ma lì vann giamò i can a sporcà anca se l’è proibii. D’altra part var menzionà el famos monologo del Walter Chiari ch’el recita “Che caghen se poden se poden no che crepen” in la soa imitazion del dicors alla Hitler. Sbirci in l’ambulatori ‘na carta del “dipcureprimarie” che la parla de ‘na procedura che la dis “ i medici che gh’hann da fa’ segnalazioni di sintomi respiratori , richiedere consulenze, contatti di casi deven scriv circostanziando i fatti a… ecc. ecc. le segnalaz. filtrate ecc. ecc. saranno passate al servizio competente… e poeu gh’è n’antra precisazion “ vi invito a non utilizzare ecc. per richiedere la tempistica di fornitura dei Dispositivi di Protezione Individuale. La Regione ha disposto l’approvvigionamento e gli stessi sono in fase di consegna, ATS ha predisposto il piano di distribuzione, ma ad oggi non siamo in grado di comunicare le date di distribuzione.” E semm in la region che la dis de avegh on servizi de primaria importanza. Spetten tutti che l’epidemia la finiss per alzà la bandera del vincitor depoeu che come precision tucc adotten el “Fai da tè” anca per i mascherin che el uatts ap fa’ vedè come recuperai con el scottex, duu elastick, e duu tocchelin de scotch. Se fodessom prima de la Brexit podarissom dì “Dio salvi la Regina” ma adésso, come el dis el me amis Giorgio Zennaro “ Dio salvi gli anziani” dal moment che tutt l’è in sui lor spall. L’Ospedal de riferiment infatti se ciama “Spall Anz i ani”.