Manuel Frattini
Milano, 25 ottobre 2019 - Ricordi che Federika, la mia tosa, la gh’aveva quattordes ann quand gh’èmm comincià a andà a scola de Tip Tap in ona sala de via De Amicis dersett. El maester l’era Chuk Wider, on ballerin del corp de ball de Gin Kelly. Da on poo de ann el s’era trasferì in Italia quand de Tip Tap se parlava no. Subit ingaggià in different compagnii de rivista el faseva on numer strepitos. L’ha conossù ona italiana, ballerina anca lee, cjamada Tata, e insema hann tra’ in pe’ ona scola in ona cantina cont doccia e servizi in via Sapeto (cors Genova) per poeu trasferiss in via De Amicis. Chi gh’era in la scola olter numm? Manuel Frattini. Lù l’era giamò al livell superior tant da comincià a laorà tra i professionisti del temp. El gh’aveva anca, come disen i fransè, le fisich du role e la volontà de diventà grand, come l’è success. Chuk e Tata aveven formà on ballet de vott tosanett (15 ann de media) che faseven insema a ona mascotte, l’unich mas’c on ròsc de ball fantastich. I hoo scritturaa e portà in gir insema ai genitor (l’era obbligatori).
Ogni tant pensavi a on quai solista e la scèrna l’andava semper su Manuel Frattini. Senti giamò quaivun mormorà “ma quel Brivio lì l’era denter de per tutt! dis lù.” Fortuna che gh’hoo i registrazion del ballett in azion in on para spettacol de Musical e Operett che hoo portà in gir per l’Italia. On estàa, l’era quell del ‘92, s’eri all’Idroscalo a rappresentà ona selezion de Operett, in scèna gh’era giusta Manuel Frattini ch’el faseva on numer complicaa de tip tap, vun de quei che se veden in di film de Gin Kelly o de Fred Astèr, quand la riva dal camerin trafelada la mia tosa che l’aveva appena finì de cambiass, per dimm che l’era mort Gianni Magni, aneurisma ecc. L’hoo comunicaa al pubblich tra la costernazion general condivisa dal Frattini. Gh’è resà tra numm semper el ricord de quell moment e n’èmm parlà ogni volta che andavom a trovall in camerin depoeu ona prima di musical che le vedeven protagonista, compres Pinocchio. El teater italian l’ha pers on grand protagonista, vun de quej che gh’hann el nomm che resta. brivio.roberto@yahoo.it