On Nadal in strada. Semm in temp

Semm ancamò in temp a organizzall

Luminarie di Natale a Milano

Luminarie di Natale a Milano

Milano, 15 dicembre 2020 - Semm ancamò in temp a organizzall, on Nadal in strada. Manchen domà des di. Mi me vestissi da S.Giusepp, La mia tosa da Madonna, el Boeu e l’Asen, do’ figurant che parlen no, el Bambin ona statoetta perché i minor deven minga vegnì a voltra, tucc su ona pedana sostegnuda da des manopattini elettrich, trii che tegnen la sponda destra, trii la sinitra, duu davanti e duu de drè e al seguit pegor, occh, gain, can, boeu, asnin, cavall, contadin, pastor, on rosc de angiul e via per i strad de Milan a impienii la vita natalizia confortà dai luminerii e a cantà, cont la mascherina per trattegnì le ‘bollicine di saliva’. In fond al cortèo, ona banda de firlinfutt potenziada da on para de trombett, trii trombon, e quatter pive che sonen “Piva Piva l’oli d’oliva, gnacca gnacca l’oli ch’el tacca, hoo mangià tri boeu e ‘na vacca, ona sgorba de insalata, ‘na pignatta de fasoeu…oh che odor, oh che odor”.

Perché a Nadal la gent la mangia. E datosi che gh’hinn i restrizion l’ha sistemà i compagn de taola. Se banchètta a ca’ di duu nonni? Gioedì 24 a mezdì, 4 invid. Venerdì 25 alter quatter invid, sabet 26 alter quatter e domenega 27 i ultim quatter. Inscì inveci de fa ‘na mangiada se ne fann quatter. Poeu trii dì per fa foeura i avanz e la mangiada final, semper a mezzdì, per evità la pesantezza de stomich. La canzon popolar milanesa l’ha immortalà on classich disnà: “ E hann mangià per la gran famm/ 80 chili de salamm/40 gainn 50 cappon/ sei porscei e sett monton/ quatter mastei de lasagn cald/ trii padej de risott giald/ trii cavagn tra uga e per/ quatter navasc de cafè ner/ E hann bevù sti gran meschin/ squarciagola brent de vin/ e finida la gran lappa/ gh’hann svoeujà on bidon de grappa.” Se dis che el grande Piero Mazzarella, l’ultim di Tecoppa, ‘l gh’avess in coeur ona canzon che la descriveva la zena d’on certo conte Cassoeula, doa “La contessa de vermej l’ha mangià sesmila usei/el barun de Montalban cento chili de bon pan/ la Pinetta del Ronchett l’ha mangià cent cottolett/ el Ginetto del Consili l’ha fa foeura cent conili/ La Marianna de precott l’ha mangià centvint risott/ e la miè de Polliroeu l’ha mangià on quart de boeu/ E intant che mangiaven beveven beveven, beveven quel bon/. “ La canzon la va avanti fina a quand, tacchen coi piatt, i cadregh, i gamb del lett, l’appartament e finìssen per bev d’on fiaa… squas on liter de bicarbonà.