Ernesto Calindri e Liliana Feldmann
Milano, 20 settembre 2020 - Me dispias che la sia partida definitivament. Me dispias de avegh minga faa ona visita, da febbrar. Me dispias che l’ultima volta di so’ 92 ann e i noster 50 de conoscenza la sarà vedella passà in d’ona cassa. Sì, chi vorarà l’andarà a fagh visita al Monumental in doa gh’hinn tanti alter attor che lee ha conossù e che tucc numm gh’èmm ammirà e adess onoremm, al Famedio, mi me auguri. Chi l’è? Sont adrè a parlà de Liliana Feldmann, morta el 15 settember ai 12 circa. Alla voeuna e mezza m’ha telefonà ona di so’ tosann. L’hoo dit subit al Tony Martucci, che cont lee l’ha passà ona vita artistica. S’eri in macchina cont la Raimondi. Gh’èmm fa’ la strada cont i oeucc bagnà. E i ricord subit hann ciappà el post di alter pensee. La prima volta che lee e la Sironi hinn vegnù al Refettorio, el primm cabaret che hoo avert a la serena a Milan, i spettacol fa’ in gir per la provincia organizzà dal Maramotti, el Cabaret estiv su on barcon in darsena, el spettacol al Liric. Gh’era Fabrizio, el me fioeu, 14 ann, che el faseva el tecnico audio. Ai vott e mezza el me va in crisi. Gh’aveva paura de vess minga all’altezza. Liliana l’ha ciappà da part: «Scomettiamo che ce la fai?».
Lu l’ha guardada, el s’è sugà i oeucc, l’ha fa’ on sorris, el s’è miss a la consolle… nanca on error. Al Gerolamo mi lee e el Mazzotti al piano. On deliri. On mes de esaurii. Gregori e Francesca, prima De Angeli e Sironi, poeu Brivio e Sironi, poeu Brivio e Raimondi. Istess copion e la Feldmann a digh a Grazia Maria Raimondi, t’è ciappà i stess intonazion dell’Evelina. E la sera del 31 dicember al Teater de piazza del Politecnico? Gent in pè che la saveva no de la nevicada che l’aspettava foeura. Liliana Feldmann e Sironi che canten ona version seria in milanes de la Marcia Turca de Mozart. Mi e Mazzotti che ghe sostituissom i foeui e lor duu che se trouven a cantà ona parodia de la parodia: «Quand el me fradel, l’era on giovincell, el sonava el piano el violin el violoncell, ma la soa specialitaa l’era de fa’ andà l’u…. gh’è nagott de dì, gh’è nagott de fa’, ma se al sabet sera se trattava de c….. » ecc. ecc. Hinn scappà in quinta dal ridd. E la bravura l’ha dimostrada col Calindri: Sul lago dorato? Sì, a Brusimpiano per ann assistida dai tosann: Antonella e Renata, primm ammiradris de on attrice drammatica, comica, cantante, dobbiatris, che la compagnava la bravura a la grazia a la classe a la signorilità.
brivio.roberto@yahoo.it