Dario Fo portò in scena una versione inimitabile del Dulcamara dell'Elisir d'Amore
Milano, 16 maggio 2019 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Disgrassamet, allungament, potenziament, basta toeu 'na pillola che la costa nient. Hoo faa on para d'ann fa' la regia de L'Elisir D'Amore, on Opera composta da Donizetti. El venditor ambulant dell'Elisir el se ciama Dulcamara e el gh'ha la fortuna de vess diventà on simbol di cialatanerii che te proponeven in certi mercà, piazz, giardin, parchi. Fa' ricress i cavej, fa' andà giò la panscia, dimagrì anca de trenta chili in on mes, diventà da brutt anatroccolo a cigno, da scorbatt a rossignoeu, da oca a cri parlant, da impotent a stallon, da usellitt a usellon, da nient de bon a conquistadores, da timid a mangiadonn, da pover a scior l'è el sogn squas letterari de on umanità frustrada dal tropp laorà, dai pocch danè, da la mancada qualificazion professional, da la scontentezza per fa' minga quell che se voraria fa'. Quand pensavi a l'Elisir, depoeu avè vist la messa in scèna viscora (vivace) fada da Dario Fo, cercavi ona ciav de lettura noeuva e nell istess temp ligada ai temp di temp, che comprenden anca quest che vivom incoeu. L'idea ma l'han dada i messagg che te riven sul cellular, i consili a fass abbindolà dai paroll che te dimostren come te set stà' stupid a ciappà no in considerazion la possibilità de fa' quest o alter domà cont l'acquisto regalà ( ma l'è on regal o on acquisto ) de on flaccon pien de pillol: bleu per robb che riguarden el sesso, ross per il dimagrament, beige per fatt ricress i cavej, giald per guarì da la pendolarità, verd per guadagnà danè, bianc per fatt trovà l'amor, arcobaleno per guarì da tutti i malann.
Quand te faa l'ordin e te nanca comincià la cura, te riva on messagg cont on 'regal'. Compera subit on alter flaccon per continuà la cura ona volta che te stett per finì i pillol dell'acquisto primario. “Potresti non trovarne più in commercio” “vess bloccada la vendita dal Ministero de la Sanità” “El saress on peccà interromp la cura, e allora fa' 'na scorta che te garantissa la continuazion”: slongà, dimagrì, fa' cress, datt la carica libidinosa, calmà i bollenti spiriti, per chi te voeur propinà la pinoletta l'è la stessa roba. Inscì' el Dulcamara, el venditor di Elisir in del Far West, l'imbonitor in di fest di paes. Mal el fa no'. Hinn pillol del bicarbonà che el fa' digerì. E se on quaivun el se lamenta gh'e' semper la formula “rimborsato se dopo 30 giorni l'effetto non ci sarà stato”. Adess al va' de moda el Zaffran, lo Zafferano. Mi savevi ch'el serviva per fa' el risott a la milanesa! No. El te fa' anca perd fina a 50 chili in trii mes. Minga a cas se dis che l'è ona pianta pussè preziosa dell'or. Sincerament credevi che fudess el Tartufo. No, l'è el Zaffran. L'accelera i process digestiv, el preven el montonà (accumulo) i calorii foeura de misura (eccessive) in di cellull grass (adipose). Azion che da' noeuva vita e energia, fòrza. Come alter prodòtt. El Zingiber el sbassa el colesterolo cattiv. El fa' andà pussè in pressa el metabolismo di liquid e di carboidrati e l'aumenta el consumm energetich. Par che anca el Fico d'India el fassa dimagrì datosi 'l'alto contenuto di fibre' che garantissen la sensazion de sazietà. Attenti a mangial no cont la scorza.. Gh'è poeu el Fen greco che te elimina el grass e facilita el rafforzament di muscol. El sbassa el zuccher in del sang e inziga (stimola) la produzion di succhi digestiv e la rigenerazion di tessuu. Gh'è nanca bisogn de la filanda. L'Arancio amaro inveci el ferma la sensazion de famm, inziga el metabolismo e 'l'attività psichica del fisico'. El The verd sbassa el livell del colesterolo cattiv, el petit e permett de mantegnì on fisich snèll. La TirosinaL- ridù la stanchezza e inziga i process de acquisizion dell'energia dal tissù grass. T'è capì el Dulcamara, cont i so' bottigliett dal prezzi intorna ai 50 euro, scontà (disen che l'è regalaa), cossa el te regala La salud, la vida, i cavej, la potenza sessual, e se el va avanti a concionà anca i dent e el ricambi di ball. El te ricambia la serotonina e la dopamina. Manca che te inocula l'insulina e te set a post. Ma l'imbonitor l'è furb. El dis che el prodotto va' minga ben per tucc. Gh'hinn quej ch'hinn refrattari all'azion. Ma l'è ona percentual minima. Te voeuret propri vess ti a rientrà nel percent Sì. Chissà perché Propri mi. E sont convint che se spedissi indrè el flaccon, come disen, me rispondaran che “rientrando nella casistica di quelli che non potranno mai avere vantaggi dal prodotto, non ho diritto all'estrema garanzia del ritorno-rimborso” E poeu la ciosa furba ma furba da morì: “sont sicur che ti te saret pussè che content. Me spetti che ti te sarìa incantaa. Te perdaret chili 7 volt pussè del solit (la formula l'è valida per tutt come hoo giamò dit) e sarann divers anca tutti i to' esamm”.brivio.roberto@yahoo.it