E se dovessom parlà on cicin del futuro

Se dovessom parlà del futuro me bastaria rilegg “El Medioevo Prossimo Venturo” de Roberto Vacca e “Futuro Er(M)Etico“ de Paolo Denti

Libri

Libri

Milano, 22 novembre 2020 - Se dovessom parlà del futuro me bastaria rilegg “El Medioevo Prossimo Venturo” de Roberto Vacca e “Futuro Er(M)Etico“ de Paolo Denti. Basten i titol per immaginass quel che gh’è denter. Del primm n’émm giamò parlà e minga in “remoto”, ma dal viv cont la gent stravaccada sui poltronn de teater in giusta attesa del verbo, perché quand parlom de Vacca, se riferissom anca a quel ch’el dis. L’hoo conossu da giovin quand insema a Gigi Vesigna e a Gici Ganzini Granata - che la scrivevà i testi di disch Tavola Rotonda da mi realizzà nel ’70, irreperibil come hinn irreperibil i dirigent de la Ricordi, adess Sony, trasferìi a Tokyo - avevom trasformà in commedia el so “Il robot e il Minotauro”. Parli de on romanz che adess el sarìa de moda vist che el protagonista el reussiva a fa’ comunicà ona telescrivent in diretta cont el cervell. De Paolo Denti hoo fa’ ona recension de la seconda edizion “Di terra e altre lune”, vott stori, voeuna pussè bella dell’altra. Adess, semper per l’Editoriale Sometti l’ha pubblicaa “Futuro Er (m)etico” cont la M Maiusciola missa in parentesi per dagh importanza all’Etico, che el fa’ minga parte dell’etica reganiana tirada a man da on quai pissicologh on’ di’ prima di elezion a la Presidenza di Stati Uniti. I psicologh adess hinn sta’ sostituì dai virologh e doman dai tuttologh e i spacciatologh de parol.

E quell d’incoeu, el dis Denti, cont on sarcasmo sottil e venà de alto umorismo, l’è pussè avid e millantador. El spacciator parolascion passaa el torna in scena travesti’ de opinionist in del (voltà in milanes) “tentativ, fallimentar, de mett ancamò insema di fatt ch’hinn capità insema ad alter (contestualizzati) col permettess piasè de linguagg che ricorden i ann de quand vun el se permetteva ideii divèrsi”. Se tratta de on capitol cont VIII “avariazion”, pardon “variazion”. La settima la gh’ha come sòttitol “il disarmo dell’imbecillità”. Sont minga d’accord con la bandina del liber che la usa paroll d’abitudin. Per mi el liber propon con ironia continua, ona sbeffa che la seguta anca in di capitol seri come quell dedicà al pader, al Silenzi (quell di poetta che basen periferii e canten miserii cont esercizi de stile – quand la verità la te salta addoss e te set no come disfatten – quand per incontrà el Signor te devet slontanass da la Gesa) fina al consili final inviaa a la damazza www.it: se faga on viagg in di librerii che metten no in vedrina i pussè vendù de la settimana. On quaivun ghe borlerà addoss.

mail: brivio.roberto@yahoo.it