Milano, 9 settembre 2018 - Caro Diego Dalla Palma, parli de ti perché hoo leggiù la toa intervista sul stess giornal che ospita la mia pagina in milanes intitolada l’Angolo di Milano e credi de vess in tema a parlà de ti perché ti te set on canton de Milan, come tanti milanes arios che a Milan han lavorà, se sont faa on nomm, hinn diventà important, glorios de sentiss milanes. Gh’avevi ancamò el Refettorio in via San Maurilio, quand t’hoo conossuu. S’eri sta’ ingaggià a la Rai per ona produzion, me ricordi pu el nomm, e ti te fasevet l’aiuto scenografo costumista, o gio’ de lì. Te parlavet cont on accento veneto e te me set restà subit simpatic perché te me ricordavet la mia mamma, che de veneto la gh’aveva nient dato che “a ere furlane da la basse” “La basse a erin i paes dopo Udin”, di quii temp capoluogo, esempi S. Vito al Tagliamento, Casarsa (patria di Pasolini), Codroipo, Latisana, Morsano, San Paolo al Tagliamento, Portogruaro, Cordovado e “altris chi no requardi in chistu moment. La Alte a è la Cjarnie, San Daniel e il sio’ prosciutto, Tarvisio. Il Mar: Grado, Aquileja, Lignano, Bibione, ecc.”.

Te m'è parlà a la Rai de la toa vocazion de scenografo costumista e t’hoo subit fa’ la proposta de disegnamm i costumm d’on spettacol che dovevi rappresentà al teater Nuovo. Se trattava del famos “Milan Teater” ispiraa al liber de Pozzi e Manzella, titol omonim, ch’el faseva la storia di Teater de Milan nel 1700, 1800,1900. Te m’è mostra’ depoeu on quaj dì (serom nel 1972/73, credi) di disegn e i gh’èmm realizzaa. Devi ammett che spaccaven el…. ai passer (con el beneplacido de tucc quej che se interessen de usei). Ogni costumm on applauso. In del cast figuraven Grazia Maria Raimondi, Mirtom Vajani, Paolo Poiret, Gianni Cereghini, Mi, ona dounzena de alter attor e I Marionett del Gianni Colla che faseven in palchscenich la folla, i cortèi e personagg come el Cardinal Borromeo quand l’ha proibì de fa’ andà in palch i femmin. Da lì l’è nada la necessitaa de fa’ interpretà i donn da omen travestii. Usanza continuada in di oratori e portada in alt da I Legnanes, grandi professionist sia queij de la prima che de la seconda generazion.

L’esibizion del Gianni Colla dall’alt del pont per fa’ sonà el Trillo del Diavolo a ona marionetta in le vesti de Paganini, l’ha entusiasmà el pubblich al ponto de fall scatenà in on applauso de la durada de almen 10 minutt e minga a la fin ma a metà spettacol. La gent la vosava “Bis, bis”. Sunt sta’ costrett a fagh ripèt el Trillo. Ma stavolta, da vigliacch, ho pizzà on faro sul pont in doa el Maester Marionettista el moveva i fil taccà a do’ crus de legn. On tocchelin de mantovana tirà al soffit, la lus cont on faro de 2000 watt, ed ecco Gianni in Colla in azion, e sotta la soa marionetta che sviolinava a temp del registraa. El public entusiasta, matt, in pe’, minga on sempli applauso, ona ovazion. Incoeu diressom ona standing ovation compagnada da grida “bravo, bravo”. Vos che , ricordi, segutaven dì bravo quand a i ultim, intant che gh’era la presentazion general di attor, t’hoo ciamà foeura (l’ho semper fatt in di me spettacol quel de ciamà a vun a vun i attor che hann partecipà a la rezita) per datt la giusta soddisfazion come costumista. DA LÌ te gh’èet ciappà el volo. Te set vegnù via da la Rai, t’è derbì el negozi de via Madonnina, t’è comincià a fa’ spettacol in del cortil del stess negozi e chi l’è che el vegniva a intrattegnì el pubblic? Mi e la Raimondi. Hoo portà insema a lee on spettacol de Operetta fin a Enego in doa avevi affittà per un periodo de temp, on quaj ann prima, on para de stanz a ca’ de la toa mamma, per fa’ la settimana bianca cont i fioeu. Abitavi, allora, in ona villetta in quel de la Circonvallazion Idroscalo. Incendiada per on programma che gh’avevi fa’ a la television Svizzera dal titol “Cabaret per on periodo Nero”. Serom in pien periodo de eversion e forsi la mia critica l’era minga andada giò a quaj facinoros, a quaj vun da la testa càlda. Pensa che vun di me aiutant in famiglia l’era on amis de on to’ amis che mi avevi tegnù a dispèt de ona malattia infettiva durada trii mes de ospedal. T’è vorsù fa’ i robb pussè in grand, cont on spettacol de Amalia Rodriguez. E chi l’è che t’è minga ciamà? Mi e la Raimondi. Poeu l’è rivà el primm liber e Brivio l’è tornà in auge per la presentazion. Intant ch’el temp el passava sparaa, te se fasevet on nomm cont la toa bravura de truccador. T’è creà profum e on marchio internazional. Te seret popolar al pari del Fiorucci. E intant te perdevet quaj amis perché, giustament, te entravet in alter gir. Quanti volt te gh’èmm telefonà a voeuj, invidà per nient, cercà de dimostratt amicizia.

Me riferissi a ponto dell’intervista quand te diset, a proposit del furto in la toa ca’ de Enego “ Non ho ricevuto neanche una telefonata…”. Beh, quaivun, semper Mi e la Raimondi, l’avariss faa. Gh’era minga bisogn de vess tra “quelli che ho amato di più”, come te diset ti. Ma el pensèe de sentiss rispond da ona segreteria telefonica o, pesg, imbroccà minga el numer o pesg ancamò el penser che te podess fregatt men che men, l’ha tegnì lontan minga domà numm ma chissà quanti alter. Comunque piang no, lamentess no. Semm semper chi, come amis de la prima guardia, pronti a stringett i man, a datt solidarietà. Su no perché i grandi nomm t’hann dit nient. Magara ti avevet lassà perd. TEL SET come a hinn i attor e i cantant. Loff. Se gh’è minga ‘na foto o ona possibilità de publich relazion, stan in la tana. L’è el mond che el va’ inscì, car el me car fioeu, ona volta l’era divers. Gh’hoo faa ona stòria sull’argoment. A la fin de on spettacol de beneficenza faa al Pio Albergo Trivulzio, o vist i solit do’ ospiti (95e 97ann) e vun el tegniva in man on tocch de grana dal pes considerevol. El diseva al compagn “Questo è Parmigiano reggiano, l’unico formaggio afrodisiaco perché non contiene acido ascorbico. Ona volta te ne mangiavet on tocchelin inscì e te gh’avevet subit l’alzabandera. Adess basten no, do chili e mezz” “ Eh, te gh’et reson” ghe fa’ el compagn “ L’è pù el grana de ‘na volta”! Cont i ann cambià tutt, l’atmosfera, i moment de speranza e quej de sconfort, i moment de tension e quej de pas. Anca l’adrenalina l’è mai la stessa. La se scarega con violenza alterna ma semper cont minor veemenza. La riflètt anca lee prima de mettess in pista.

El diseva, Pietruccio de i Dik Dik (77), l’alter dì quand se semm trovà a proposit de on musical su la vita del ròsc (gruppo) insema a quella de i Camaleonti, che se dev minga parlà del passaa quand se mett in pè on progett. Se gh’è l’urgenza intellettual che la ruza da denter, se dev badà (l’è o l’è minga l’era delle badanti), se dev curà, stà attent a, realizzalla, portalla a coo, se de no (altrimenti) la te tormenta, la diventa on penser fiss. Walter Chiari l’era on generos. Andavi a toeull tutti i dì ai do’ (14) quand, finida la trasmission cont el Renzo Villa in doa el faseva De Regge, al post de Campanini gh’era Cino Bottelli, e squas semper se fermavom all’autogrill de Lainàa a mangià. L’attorniaven gent de tutti i sproposit. Gh’era semper onm quaivun che ghe domandava ona barzelletta. Walter la cuntava! Intant che mangiavom ghe domandavi “Ma perché te se sbattet via inscì. Se po’ no da tutt a tutti” “Quelli “ el me faseva cont la soa vòs in gola “sono la mia Banca.”. Vera o no el gh’aveva reson. Quei eren el so’ pubblich de allora, del doman, del futur, e andaven trattaa ben, perché podeven comprà el bigliett.

Gh'è nient alter caro Diego. I personagg de la storia hann semper trovà on canton per staccà la spina, per riposass. Scommetti che se te voeuret te le trovet anca ti? Te gh’et bisogn de rigenerass? E ti fall. Perd minga l’occasion. Giusta che gh’è staa el furto troeuva l’occasion per fa’ on bel ritir, quei che se faseven a Triuggio. Meditazion, preghiera (se te Credet), mangià in silenzi, e poeu ancamò meditazion, camminad in di corridor, ona quai lettura, magara Dante, Petrarca. E come ti tutti quej che gh’hann bisogn de taccas a on accumulador perchè gh’han la batteria scaregha. Basta no quella de la macchina, anca se l’è noeuva. Ghe voeur ona carega de poesia, de lettur classis, de discors cont l’infinito, de necrologi, de misticismo…necrologi? Si perché chi i e compila el dis tutt quell che el scompars l’ha faa in vida. Me par che ghe sia da imparà propri da quej che hann daa tanto alla vita per falla pienament con gust e letizia, come el diseva Francesc, el Sant, minga el Papa, che se el va avanti inscì tra pocch el diventerà Martire. Come quej ch’hinn mort per ona Patria che si e meritava no. brivio.roberto@yahoo.it