Paolo Monelli con la maglia del Monza calcio
Milano, 21 marzo 2018 - “El postiglion de Monza/ el dis ch’el trotta pian/ ghe mett trii or e mezza/ da Monza andà a Milan”. Beh, forse trii or e mezza a eren tropp, ma duu or se se trattava de on dirett, e do’ e mezza se l’era on local, sì. I carrozz partiven dai bastion de Porta Venezia e rivaven giust al centro de Monza dopo vess passaa per el Rondo’ de Sest San Giovann, che el se ciamava inscì perché i tram giraven su ona rotonda per podè tornà indrè. Me recordi che dopo el capolinea de Monza mi insema al me pà e la mia mamma, andavi a ciappà la corriera ne la piazza del monument in bronz (Trento e Trieste) per andà a Villasanta in doa abitava la me nonna Angela e me nonno Carlo, specializzaa a fa’ el risott giald in d’ona caldera sul foeugh del grand camin per tutta la genìa. Su no se gh’èren i partìi de calcio, ma senz’alter perché el Monza el gh’ha pussè de cent ann (1912). Inscì el m’ha fa vedè el president Nicola Colombo dai offizi del so’ stabiliment (Co.ge.fin S.p.A.). Le cognussi perché da temp vorevi savè on quajcoss sul so’ Monza, squadra amada al ponto de investìgh sora on bell po’ de danè e cont sforz e giogador valid falla passà da la serie D a la C. Gh’hoo domandà se el gh’ha l’ambizion de volella vedè in serie B e in serie A. “L’ambizion la gh’è” el m’ha ditt, “ma el sarìa interessant che anca a el Comun gh’avess el stess desideri, e insema a lu a ona cordada de industrial, de sponsor, pronti a lassamm minga sol a portà avanti on sogn” “On sogn” ghe disi “che ona volta el pareva vess diventà realtà quand la squadra l’è rivada in serie B” . El fa’ on sospir e el se spertega in on sorris “Mi ghe seri no, me pader lè stà consiglier prima de passà al Milan e se le ricorda pussè. Hoo leggiù abbastanza per fissall in la mia memoria. Se el President de quell temp l’ha avù questa soddisfazion, ghe n’hoo voeuna anca mi: semm passàa alla serie C. Neuf giron e i squader che gh’hann vinciù el propri s’hinn affrontà in on torneo e el Monza l’è rivà primm. Uei el gh’ha dà ona battuda al Ravenna! Per ‘ stà vittoria se semm guadagnàa la stella de mett al centro majetta.” “Perché lu, scior President, se hoo ben capì dai discors ch’èmm fà, el ritegn che i vittorii de la squadra podarissen avegh anca on interess uman e cultural oltra che sportiv. Insomma, vinc ghe basta no. Me par che lu el picca soratutt anca sul fatto de volè ona popolazion che la tegna in cunt el stadio come ona ca’ ” “Cerament” el fà “la soa ca’ de la domenega, in doa amass, uniss, divertiss, avegh anca contrast, rappresentà dai do’ squader, a ogni partida, rivalità che poeu dovarissen finì cont ona stretta de man sia in di spogliatòi che in sui spalti.” “A hinn san propositi che ghe fann onor, al di là de quej de vinc ‘na partida come l’ha faa l’altrer .” “ Devi confessà che domenega…” Voo avanti mi “ch’el me scusa se me sont miss in di so’ sentiment”. L’ha slargà la bocca in d’on sorris, de soddisfazion, e insema a lu el so’ pà, Felice, ch’el rappresenta la grande famiglia del calcio brianzoeu. “Disen tucc salvom el dialett, salvom i costum, i usi. Ma salvom anca lo sport. Se dev dà la forza ai noster squader de vinc, de vess in prima pagina, minga cont i scandall ma cont i vittorii e el bon giogà. El scior Colombo l’ha dit che “El Marchio del Monza l’è tornà a vess figo” quand Luigi Fabbri contitolar de la Base Ald de Monza l’ha consegnà alla società ona Smart Nera. L’ha dit “Semm al Monza( 1912) perché a l’è on club calcistico, on ambient giovin, on sodalizio san. Numm trasmettom tramite el Monza el messagg che la mobilità fatta cont intelligenza la po’ da’ vantagg seri al territori.” El president Colombo parla de altri accordi che l’è drè a ciappà. L’è content de quell che el comincia a moeuvess, “compres la squadra che on quaj risultà, merit anca dell allenador Marco Zaffaroni, la comincia a dà”. Colombo el se lamenta dell’imprenditoria brianzoeula che intervèn al minimo. El voraria che i fatturaa cont tanti zeri di aziend del territori portassen investiment anca sui sport Monzes. I tifos vorarissen vinc semper, se sà. Hann de capì che per rivà a certi risultaa ghe voeuren tanti danèe. “El Monza l’ha incassà da la vendita di bigliett, fina a ‘sto moment, 57 mila euro. A Pisa, in la partida contra el Monza, han incassà 60 mila euro. El voeur dì che numm femm miracol”. L’assessor allo sport Andrea Ardizzoni el dis che “lamentass per el Stadi, per el public che l’è no on grand frequentador e che i sponsorizzazion a hinn pocch, l’è minga ona bona immagin per el Monza.” Me ven de sostegnì “ Ma allora el Comun che el sia el primm a da’ ona man consistente a on President che el gh’ha nel coeur la squadra!” Mi voeuri recordà, però, che i me articol riguarden minga tant la storia e i possibilitaa politich-economich che vegnen foeura tutti i volt che se parla de calcio. El me interess l’è quell de evidenzià che el sport l’è ona risorsa importante per l’Italia. Migliaia de personne ghe laoren sora: giornalist, protagonist, editor, tecnich, giogador de prima, de seconda e de terza, senza parlà de quej che giughen e organizzen per passion, gent che se gionta lateralment, scrittor, commentator, televisiv, scole sportiv, fioeu e grand, dònn e mas’c, operari, giardinier, affiancador, manutentor, ideator, politich, dirigent d’azienda, osservador, praticant professionist e dilettant. On mond el gira intorna al calcio e a tutt el sport in general. Perché perd el temp in discussion de lana caprina? El sport, cont el calcio in prima linea, l’è come el teater, come el cinema, quell di amator, specialment, impegna el temp. E se se comincia da fioeu ona alta percentual l’è salvaguardada dai bruttur de la vita, che, comunque, la var semper la pena de viv lontan dai ozii, dai vizi, dai bullismi, e dai pregiudizi. Mi sògni. Sont semper stà Interista. E sogni che la mia squadra nerazzurra la vincia tutt, come l’ha faa, di volt, nel so’ glorios passàa. Ma vivi anca in provincia de Monza Brianza e se devi considerà ona seconda squadra del coeur eleggi el Monza e sògni come el President Colombo che la vaga in B e depeu in A. A proposit i tifos dell’Inter a hinn interist, quej del Milan, milanist, e quej del Monza? Monzist?