Allegria e tristezza sono regolate dagli stessi geni - foto Igor Stevanovic / Alamy
Milano, 3 dicembre 2020 - Con tutti i ròb drammatich che gh’hinn a ‘sto mond te ven addoss on magon de fatt passà la voeuja de rid, fa’ del sarcasmo, dileggià, sgarbellà, insomma fa’ quell che faseven giornal come l’era el Travaso, el Male, Candido, e alter che ricordi nanca pù. Me metti a dì che hoo mai vist ‘n esercit de virologi come incoeu? Me metti a toeu in gir tutti quej che creden de vess el verbo e pontifichen su tusscòss? Su quej che parlen mal de tucc, anca de la propria mader e per avè on intervista confesserien a la tv l’immaginari inconfessabil? Ricordi “Scusate è tutto qui” , on spettacol che hoo miss in scena al teater Cristallo in via Castelbarco, diventà on supermarket, cont Walter Chiari, Patrizia Caselli , Grazia Maria Raimondi e on’orchestra de vott professor sotta la bacchetta del M° Gino Bettoni. L’hoo replicà l’ann depoeu al Carcano d’estàa cont el titolo Long drink e on sabet sera, Teater esaurii, Walter Chiari el se rintana in albergo e el vegn no. El me dis che datasi l’ecatombe per la frana in val di Fiemme el se sentiva minga de fa’ rid. Guardomm la question domà dal pont de vista de on còmich che el se refuda de fa’ el còmich per la tristezza de ona circostanza: gh’è de dagh reson.
Ecco, incoeu me senti in la stessa situazion. Eppur, inpunemanch, me vegnen in ment situazion comich anca se l’è on moment delicaa. Esempi: s’eri a la Posta. Fasevi la fila come tanti alter, foeura, al frecc , Davanti a mi ghe n’era almen quindes. Vorevi andà via ma la Raimondi la preferiva che se fermassov. “Succed semper che on quaivun el se stufa.” la me fa’. Ecco che immagini on omett cont quindes bidon per brustolì i castegn, acces. Ne mett vun al fianc de ciaschedun domandand cinq euro de nolegg ògni mezzora. L’ha rifudà nissun. Intant che spettavom l’ha incassà almen 50 euro. In ona giornada ne avarà tirà su almen cinchcént. Spes? donca: ammortament di bidon, legna o carbon, castègn cont i lor sacchett de carta per la polizia, trasport cont el furgon. …. femm dusent50? Dusentcinquanta de guadagn. In tutta Italia gh’hinn pussè de 5000 comun cont l’offizi postal. Se la vos la gira nassarann fabrich per bidon, piantagion de castègn, sciostree, nolegg de furgon. Alter che i Bit Coin. E d’estaa? Sorbètt, nolegg di ombrellon, piscinett per bagnass, cappèll de paja, ventilador. E in Primavera? In Autunn? Uei, zucch e melon… la soa stagion!
mail: brivio.roberto@yahoo.it