Microfono musicale
Milano, 5 novembre 2010 - Voeuri no fa’ el critich, ghe n’è assee e i colonn bastarien no per da’ spazi a tucc quii che vorarissen fall, eppur te capita de fa’ i scarp a quell programm o a quell’alter. Lassom perd i sceneggiaa ciamà fiction in doa i attor gh’hann facc gradevol, important, giust (i direttor di casting sann quell che serv), peccaa che la vos e la recitazion la corrispond minga. Hinn lì che soffien. Tutt per vess natural. Ma l’è minga inscì. I me maester (squas tutt i grand attor) che vegniven da la genia di senza microfono, m’hann semper dit che per parì natural se dev recità cont spontaneità, ma semper recità, che voeur dì potenzià la vos, fass capì, fa’ i final de tutti i paroll . Se te voeuret rivà in fond a la platea. Se de no te senten nanca in prima fila. E l’istess l’è per l’uso di microfoni.
Finida l’Accademia andavom a fa’ i provin a la radio-rai (gh’era domà quella). Tutti cercavom de fa’ la bella vos. El regista se cjamava Salussolia. Di là dal vèder che divideva la sala regìa da quella in doa parlaven i attor el faseva segn de tirà su la vos. Inutil. Gh’era no la “spinta” del diaframma. Restava nient sui naster. Come adess. Vos debol, intonazion inesistent, sentiment piatt. Rimedi? Mett on film vecc dobbià dai doppiador de ona volta e te vett in broeud de scisger (solluchero). E semm rivà a Martedì. “Cossa el voeur quell lì?” “ Gh’è Fiorello (20’) e I soliti ignoti (30’)!” e poeu dialett fina a rivà al “Porta a Porta”. Sul second on reality e el Varietà “Battute?”. L’interrogativ ghe l’hann miss lor, inscì nissun el po’ di’ nient. Su la trii metten la Soap prima de Bianca Berlinguer. Che voeur dì ciappalla giamò indormentaa. Ghe sarìa Rai storia, Rai 4, Rai Movie, Rai Premium, Rai 5. L’hoo missa per ultim ma se te voltet il telecomando sul 23, però, te devet restà lì. L’è ver che la cultura la moeuv el cambiament, in politica, ma in TV quand se azzecca (come el diseva el noster magistrò) ona banda vincente l’è controproducente mudàlla.
mail: brivio.roberto@yahoo.it