Temp liber, el confort de l’estaa

Milano, 7 luglio 2018 - D'estaa, vers sera, se sa, tucc a hinn incentivàa a saltà foeura dal guss e andà liber per marciapè a fa’ la passeggiada senza el so’, senza el traffic del dì, domà, a seconda di quartier, cont la movida (nel sud la cjamen “struscio”), che la te dà duu confort: vess insema a tanti e quindi corr no certi pericol (lader, libidinos, mal intenzionàa;) e sentiss no l’unich pirla che l’ha decis de sortì de ca’ invecj che mettes davanti a la television per vedè l’eterno Conti, l’eterna trasmission de canzonett de musica gramma, cantà all’Arena de Verona, riferiment per cantant che vann a ciappà premi, ruzaa dai promozion di ca’ discografich che speren semper de fa’ colp de vendita. Ma chi va foeura el cerca post in doa se poeu’ mangià, guarda on poo, la carna a la griglia, i wurstel, i arrosticini abruzzes, e da on po’ de temp a sta’ part i arancini al ris, cont la mozzarella, al ragù, al pistacchio. Roba fritta in on oli ch’el sembra quell appena cambià in la macchina. Ma i fritture hinn la delizia di fioeu, quej che digerissen anca i sass e che hinn pien de anticorpi al punto che se ne veden ben pocch ai pronto soccorso per fass fa la lavanda gastrica.

Esageraa? No. Che importanza l’è se i banconist gh’hann in testa on strasc ch’el dovarissa toeu su i cavej e che invece i e sbatt de chi e de là ? Se lavoren cont i guant che dovarissen vess cambià ad ogni operazion specie se intima e che invece hinn vunc? E le polveri sottili in doa vann a finì? Sul cibo, pardon, food! E i mosch? I zanzar? Gh’è el scrupolos ch’el mettaria l’autan anca sui crauti, ma gh’è anca el menefreghista che el tollera i mosch su la merchandisa de mangià, quella esposta in sui bancon per l’eppi auar. I mosch, i tafan, i zanzar a hinn de per tutt, risparmien nient e se risparmien no,lassand oeuv a go-go. On dì hoo vist su on paviment di vermisoeu cor me disperaa. Eren larv de mosch in attesa de la trasformazion. Se pensi che poden vess in su le derrate alimentar me vegn on schivi fottonà (fotton, rabbia). Cerca’ de mazzai coppai magari te denonzien a la protezion de animaj. A l’istessa manera che la gent la cerca de mazzà el temp liber cont i divertiment, i codeghin, i luganeghin, i wurstel, e anca i bistecch a la griglia. Gh’è la griglia ricca e quella di pover, propri come el caffè che el po’ vess bon, extra e quell del genoeucc.

A eren i ann ‘70 quand el sindich de Milan Carlo Tognoli l’ha ciamà Liliana Feldmann, Evelina Sironi e Roberto Brivio per da’ vita a quella che ancamò la sta’ in pè’ adess, cambiada de nomm, ingrandida, ma semper cont el proposit de impienì el temp liber di cittadin cont spettacol e ball. Minga i ball, i ball! Quej cont l’orchestra, cont i cantant melodich, quej del ball su la mattonèlla, dei cha cha cha che andem a fa’ quatter salt, dei valzer, tanghi, passo doble, passo trible e quattroble, figuraa. Da la prima manifestazion fatta cont el spettacol “Cicciaremm on ciccinin cont la Gioana”, portada poeu a Liric cont el titol “Milanesissimamente vostri”, n’hinn vegnì foeura a cent in tutti i paes. On po’ come la Notte Bianca. Fada ona prima volta tutti, ma propri tutti i Comun hann brascià su l’idea per falla anca lor. Adess te le troeuvet in ogni dove. I assessor al tempo libero e a la cultura e ai servizi sociali, se fann no mancà l’occasion de fa’ passà ai vecc trii o quatter or in sana allegria. Beh, su no se l’è sana o inquinada dai zampiron, pomad, baygon, candill, so’ domà che quej de l’età certa spetten el moment per svagass, cerchen on spazi in doa ballà, ridd, mangià e magara trovà l’avventura. Se contenten no dell’animazion (on quajvun che come el disk jokey i e fassa divertì guidand, menand, compagnand, inventand gioeugh, competizion, tenzon, tornej, confront, disfid), voeuren el brivido del coeur. L’hoo ciappada longa perché me par che la notizia la poda vess arricchida e minga lassada perd in duu righ de cronaca. E ‘sta volta parli no de Milan, ma de Monza, la terza provincia de la Lombardia per numer de abitant, ma che l’ha savù conservà anca on tono casalingo, de famiglia, cont attorna paesagg che sembren quader del Renoir, cont on dialett (el brianzoeu) squas milanes, cont tradizion che se mis’cen a ricord che van dal tram che partiva da Porta Venezia, el dirett a quell che faseva tutti i fermaa. Quand s’eri fioeu, i me nonni abitaven a Villasanta, cascina Cassinotti, in fond a la strada per la Porta San Giorgio. Ciappavom ‘sto tram che el sostituiva la carrozza coi cavaj eternada ne la canzon popolar “El postiglion de Monza/ el dis ch’el trotta pian/ ghe mett trii or e mezza da Monza a andà a Milan/adess cont i rodaj/gh’hann miss on bel tramvaj/ hinn semper quej i or , ma col manovrador”, tant per dì che i noster antennà saveven come fa ironia anca sui ritard di tramvaj. E in questa città da la Corona Ferrea, dall’Arengari, dal foss che l’attraversa, dal Domm, dal Comun ch’el sovrasta ona Piazza da metropoli cont el so’ parchegg sotterraneo che quand l’hann faa, scometti che l’è staa ampiament criticaa ma che adess le usen tucc cont soddisfazion, coi so’ ges, el so’ grande Parco, polmon de tutti i citta’ circonvicin, l’assessora ai servizi social Desirèe Merlini insema all’ideator de la manifestazion, direttor artistich de l’Associazion Radio Atva, Andrea Magro (chi se recorda no Babele: conferenz de artist, sportiv, grand personaggi che hann fa’ grand el ramo che i a fa diventà grand) l’ha vorsù ripèt cont la formula “E…state con noi” se “R…estate in città”.

Bella formula affidada per la realizzazion al Centro Ambrosini in via Solferino 32 . Minga duu dì. Tutta la stagion estiva 2018, luglio settembre. Sont andà a vedè ‘st’area storica dedicada a la memoria del pluricampion Ernesto Ambrosini, atleta di Olimpiadi de Anversa (1920) e de Paris (1924), e minga domà in quell, e l’hoo trovada grandissima. Hann faa on centro sportivo “memorabil” per celebrà la “memoria” del campion. Gh’è propri tutt, e sto’ no a elenca’, anca el Campus di Inizio Stagione(prima settimana de Settember) per “bambini/ragazzi delle scuole elementari e medie, tesserati e non a Ges Monza 1946 . El Ges, Gruppo Escursionistico Speranza, Prima categoria ai campionàa per dilettant della Figc (federazion italiana gioco calcio) che in 11 ann dell’ultima gestion, capeggiada da Francesco Vincelli, on president infaticabil, l’è andà in paregg. E inscì, adess, oltre al Ges Campus d’estàa per i fioeu (8.30/18 fin a metà Luj) gh’è “L’E…state con noi”. Sto’ minga chi a tirà a man i dat (6 in Luj che comprenden oltra al ball, 4 or cont l’Orchestra de Ornella Nicolini (11/7 - h20/24) e on concorso canoro (22/7-h20/24), 12 datt in Agost che comprenden do’ spettacol: “È l’ora di ridere” con Roberto De Marchi (2/8 -h 20/24) animator de tutti i giornad de ball e i “Canzon de I Gufi” nel “Roberto Brivio show” (10/8 - h 20/24). Conclusion in Settember cont ona serada cjamada “Babele romanzieri di un tempo” (2/9- h 20/24). Tutti i alter dì de “L’E…state con noi “ se “Re…state in città” dai 14.30 ai 18.30: Bar, ball, baccajà,balossadd, barcadd de divertiment all’ombra d’ona tensostruttura unica, solida, stabil, fresca e, pregio, senza tanti rimbomb che spacchen el co’.

brivio.roberto@yahoo.it