El selfie cont la nivola nera

Storia d’incoeu: vint in posa davanti a on bus che ’l brusava

L’evoluzione di un giovane skater

L’evoluzione di un giovane skater

Milano, 26 giugno 2018 - L'incipit in on liber, in on articol, l’è important. Tanti volt el basta quell per andà avanti spedìì ‘nfin a la fin. Ma quand te set davanti a on sacch de argoment l’è difficil trovà on inizi che i e tegna tucc. E allora te ricorret al classich “di tutto un po’”, “de tutt on poo”, ma se te guardet la definizion de “po’ “ te legget: “po’… vedi poco”, e poco el sta’ immediatament sotta e el gh’ha trii qualifich: aggettiv, avverbio e sostantiv maschil. Mi capissi che l’è giust per on vocabolari mett cossa la voeur dì ‘na parola, anca grammaticalment, ma on quajvun el me dev spiegà “po’… vedi poco” e poco el sta immediatament sotta. L’era minga mej dì tutt al “po’” ? Difficil? Ma no...«po, poco, agg, avv., s.m, poo, pocch, ciccin» e de seguit anca la precisazion «pop.contadino) zicch, sbrizz.». Pensa che se po’ (!?) tirann foeura on monologo da cabaret! Sì, perché l’è ora de ciappà el pubblic cont on po’ de cultura…vocabolaria. Se voeuressom fa di specifich podarissem sottolineà che poo e pocch impegnen on lenguagg usual, che ciccin l’è confidenzial, dialettal, e che zicch le diseva anca la portinara dell’oratori de San Gregori (ona veggetta de 90 anni, quand mi ghe n’avevi quindes) che la parlava milanes pur, s’cett. Las se cjamava Gina, da Virginia. Mia sorella Maria la dis che el nomm Virginia come el conventual de la De Leyva manzoniana l’è fantastich e che l’è on delitt ridùll a Gina o Ginetta, ma t’el set come hinn quej che stan attorna. Par che, tant per fa’ di confront, Elisabetta el sia obbligatori che el diventa Betta, che Luigi el se trasforma in Gino, Giovanni in Gianni o Vanni o Nanni, Veronica in Vero, Angelica in Angie, Federica in Fede, Massimiliano in Maxi o Massi, Fabrizio in Faby, Matteo in Teo, Antonino= Nino, Riccardo= Ricky, Lilliana = Liana, Lilly, Graziella-Gabriella= Lella, Maria Grazia= Betty, Giuseppe=Beppe, Pippo, Pino.  Notizia per i familii in scapusc finanziarii: el voster amis Pino se cambiarà quest’ann cont l’alber de Nadal. Ben, la sciora Virginia detta Gina l’era ona milanesona de tutt rispett, portinara lee, la mader, la nonna, la bisnonna. Quatter generazion de portinerii e nissuna che l’abbia faa la contadina, anche se la diseva “On zicch” per indicà ona spolverada de formagg grattaa, oppur on “sbrizz” per dì che la voeureva on gottin de latt in del caffè, ma on gottin gottin, nanca on cugiarin, on batt de al, quell de ‘na parpai (farfalla) che te passa visin ai orecc e senza vedella te sentet domà el svolazz, el sghiribizz. Dì baccan, frecass, bordelleri el saria tropp. ‘Sti termini a van ben per alter vol, quej di skates, su no come l’è la traduzion, ma hinn quej arnes sportiv formà da on assa con duu rodei che i appassionaa fan slittà suj marciapè. Ona volta se faseven con quatter roeud de ferr che gh’aveven i cossinett a sfera. Te se sistemavet de sora cont el stomich, i pè regolarment che ruzàven sul marciapè, ed te chì on Bob da città liscia o da strada in discesa. Adess le ciamen Skates Board e fann i gar pien de salt pericolos e miracolos in del stess temp. 

L'alter dì, vers i 7 (desnoeuv), sortissi da la stazion del Lambraa e senti on diavoleri. Gent che la vosa, che la inziga, che la ìncita, che la batt i man. Curios voo a vedè. Nel piazzal, guardand vers la via Pacini, a destra de la stazion gh’è ‘na scalinada cont ai lati on ripian de marmo che el sormonta i basell de circa on meter. Podaria vess ciamà “corrimano”, inveci l’era on “corripiede” o mej “corriskate”. Giovin e on quajvun minga tant, ciappaven la rincorsa saltand in sul ripian e scarligand con el Skate fina a sotta, cercand de restà in pè nel saltà el dislivell. Borlonaven in terra, cercand de piccà no el co’, ma el cù sì, se alzaven e tornaven su per i scall a fa ancamò el tentativ de finì in pè. Quej che restaven drizz finiven in mezz a la gent che la vosava “bravo, bravo”. Gh’eren anca duu fioeu che gh’aveven naca des ann. Campion. Borlaven mai. Semper in pè per la corsa final in mezz a la gent che i e paccava cont simpatia sui spall; colp che senz’alter a eren pussè doloros che se fudessen rotolà. El di dopo, nient. Te voeuret vedè, me sont dit, che on quaj ghisa visà dal solit protestatari che l’ha in odio la confusion, l’è rivaa a romp i ball a ‘sti giovin che ris’ciaven sì de fass mall, ma men de quej che hoo vist in sui stess scalinn, stessa stazion, rincojonì dopo ona siringada. L’assessor allo sport el dovariss progettà “spiazzi” anca per ‘sta passion. Sont minga stà pront a faa ona foto per documentà ona notizia de cronaca bianca come questa. Gh’hoo ona tal avversion per el cellular che m’è gnanca vegnù in ment. Scommetti che se avessi tenta’ de scattalla sarìa ancamò li a fotografà el… nient, ormai. Invidi quej che riessen a fa’ cont el telefonino de tutt.  L'alter dì, semper a Lambrà, i treni a eren in ritard. Quel di 2.05 (14.05) che vegniva da Saronn per andà a Albairate-Vermezzo, l’era stà cancellà, quell di 2.35 (14.35) l’era in ritard prima de des minutt, poeu de quindes, poeu de vinticinq e l’hann cancellà, quell di 3.05 (15.05) se saveva no se el gh’aveva voeuja de fa’ e intant vedi el classich fumm de on incendi vegnì da l’altra part de la stazion, de drè el binari 12. Ona nivola nera come el carbon. Magari l’è on treno me disevi. Hoo savù dopo che el s’era incendià on autobus in la via sotta la ripa che la portava ai binari. Nissun ferì, nissun mort, per fortuna. Ma hoo trovà de matt che ona vintena de personn se fasessen el selfie cont la nivola nera, che pussè nera la podeva no vess, come sfond. Foto, controll che la fudess vegnuda ben, selfie anca di ona intera famiglia, pader, mader, du fiolitt de vott o des ann, e ona carozzina cont denter, prusmi (presumo), on alter fioeu. Eren cines. Mandaran i foto uatts app in Cina, senz’alter, con la didascalia: “On ciccinin de fumm. Ghe l’hoo dit ai viaggiatol de stà attent quand pizzen la sigaletta. Plima se ven giò dal Bus. Ciao, ciao.”

brivio.roberto@yahoo.it