Smog? Respirazion alternada

Basta cont i domenegh altern ne la circolazion di macchin, gh’è la soluzion

Smog a Milano

Smog a Milano

Milano, 11 marzo 2018 - Quand se scriven articoj che parlen de tutt, senza on indirizz alter che quell de taccass ai fatt, in doa e quand, te spaziet da on argoment all’alter senza tanti preambol, te fet nomm e cognomm e magara te ne desmenteghet on quaivun. L’è el cas de Carlo Casalini che quand hoo parlà dii “Sem ch’inscì coi Scusaritt” el sembrava che me fussi attribuì l’idea de faj lavorà con mi, quand inveci l’è stada soa. Robba de ridd, quisquilie, pinzellacchere, come diseva Totò, comic de razza che se el fudess staa in ‘Merica el sarìa passaa come “universal comic”, invece l’è restaa in Italia, on po’ in Francia e anca in Sudamerica. Eppur miss a confront con i comic d’olter oceano, scisciabobom. Inventiva, genialitaa, improvvisazion, mimica. Senza cuntà i soggett, semper de prima qualità anca se denunciaven fin dal titol la presa per i fondell de ‘n argoment, de ona sitoazion social, comprésa la parodia di film important de cassetta.  Ma tornemm a Casalini. L’è on fioeu de 60 ann, umil, ma come la dis ona prefazion de Alberto Casiraghi, (conossù come editor del “Pucinoelefante” che el te componn on liber in cartoncin come se faseva ona volta in tipografia e te ne stampa ona vintena de copj de on valor inestimabil. L’ha stampaa per tucc: Grand e piscinitt), l’è ona di figur pussè original e emblematic del panorama cabarettistic italian. Nassù in Lombardia e gh’ha avù semper ona caratteristica rara, quella de scaldà el public cont la fiamma ossidrica prima de ogni spettacol. Ona invenzion del so’ repertori l’è quella de sonà tutti i strument... scordà. Hoo leggiù on so’ liber, pocch propaganda’ per la soa innata modestia, in doa el parla de l’inquinament a Milan. El sembra stran ma Casalini l’ha risolt el problema. Basta cont i domenegh altern ne la circolazion di macchin. El propon ona respirazion differenziada. Lunedì, mercoldì e venerdì respiren domà quei che gh’hann el numer sulla C.I. (carta identita) pari, martedì, giovedì, sabet domà quej che gh’han el numer dispari. La domenega, giornada de ripos el respirerà nissun, e il 29 febrar, ogni quatter ann, respiraran domà quej con on special contrassegn. 

L’ha compost anca aforisma. “Ho vist on tronco malàa al punto de avè la troncopolmonite” Insomma ona scopèrta. Peu el s’è mis a collocà i artist in di local. El so’ che ghe dà fastidi vess ciamà collocador, ma quand vun el te mett in d’on local, fudess anca on minister, el te colloca. E inscì l’è risultàa per el Museo in doa ho recità i me monologhi ier sera. A Gallaraa. Sì, l’è minga Milan, ma mi sont milanes e el fatto che vaga in quella città a cantà o a fa’ el cabaret la qualifica come meneghina, perché mi, sia ben cjar, parli milanes o italian pur. Podarò DÌ che hoo lavorà in d’on museo per volontà de Maurizio Castiglioni che el s’è mis ancamò in pista con on noeuv Cafè Teater. E guarda caso in mezz ai quader del ‘600/700/800 del primm pian n’ hoo trovà vun che m’ha portà squas a ca’ mia a Brugheri: l’ascension de Paolo Andreani a Villa Moncucco. Un quader de fantascienza a quej temp, 1780 o giò de lì. L’è minga rivà fin la Gallaraa, l’aerostato, ma el Francesco Battaglioli l’ha faa on olio su tela, 100x75, original, conservaa in ‘sto Museo archeologico storico artististico de la Società Gallaratese per gli studi Patri, fondada nel 1896, centvintidu ann fa’. 

La sede? L’ex convento de san Francesc (XIII sec.). El cronista Luigi Riva el scriveva: “ 21 Febbraio 1784. Fecesi in tale occasione in Milano molte feste ed allegranza, massime nel Teatro essendo tempo Carnovalesco. In oltre in questi giorni fecesi volare un Groso Ballone, che erasi introdoto in questi tempi in Italia portato un tale ingegno della Francia, ed il primo fù questo in Milano, del quale sen fecero poi molti altri.” A gh’hinn discordanz de date, ma l’è passaa tanto temp che a hinn giustificaa. Per esempi l’ascension, ospite Giuseppe II, la podaria vess quella del 13 Marzo 1784, avvenuda nel parco de Moncucco in doa gh’e’ la Villa Andreani Come s’è vist el Sabet l’è semper movimentà.  Spettacol de monologhi, visit di Musej, partecipazion a fest de compleann... qual? Ma quella dell’onnipresent Renato dal Compare che cont l’occasion de sprèmm el sang da la gent ne ha invidada tanta al so’ compleann, tutt sponsorizzàa, per on foodaperitivspettacol. Gh’era ona filera de attor e cantant de la vecchia guardia, tutti so’ amis, che han partecipaa in passaa a rappresentazion de beneficenza in di ospedal. Gh’era l’Alberto Anelli, El Beruschi, mi cont la Grazia Maria Raimondi, mia sorella RaiMaria, el Cadeo, guarda tì Cotto e Beatrice, la Cecchetti, el Dallara, la Fiorino, la Giovanna, el Gian Pierretti, el Pecav, Paky, la Rampin el Memo Remigi, Smaila, Truffi, el Tonino, i Viganò Brothers, la Viviani, el Visentin, Violi, Virago, la Zanicchi. Ona bella mappada de artist. Passaa tucc al microfono hann portà via on inter podisnà, dai 12.30 ai ses or. E chi n’ha cantà voeuna, chi do, chi la traa in pè on discors, chi ona poesia, chi ona schitarrada; i dottor important hann dit nient per mancanza de temp. Ma tutti hann festeggià Renato cont on coro general “E sempre sia lodato quell’uomo che ha pagato, lodato sempre sia la soa… sponsorizzeria.” Tra la campagna raccolta sang, i spettacol benefich, i viagg in carrozza e cavaj, i cantad sui tram, el complean, a la fin Renato l’era esausto. L’ha dit “Abbiamo finalmente ridato” e l’è andà a dormi in ona camera dell’Hotel Klima che l’ha ospità tucc cont el so’ International buffet. 

brivio.roberto@yahoo.it