Il progetto "Bambini senza paura"
Milano, 4 marzo 2018 - Quand l'hoo conossuda l’era direttrice de on settimanal che l’andava a la grand . Fioeu e intellettual gh’aveven la soa testada in del co’ e nel coeur. El protagonist, ch’el dava el nomm al giornal, el gh’aveva on oggètt diventà el simbol de ona sicurezza astratta. L’era ona covèrta…appunto la covèrta de Linus. Adess el po’ vess on magattèl, on piatt del buon ricordo, ona giacca che senza de quella se gh’ha minga el coragg de andà in scena, ona pipa da girà in man, on amulett, on menabon, ona pigotta, on diavoleri, ona ciav, ona penna, ona sigaretta mai pizzada, l’è semper indicaa come …la covèrta de Linus. Donca Linus el settimanal, el direttor… lee, la Fulvia Serra. On donnin che te fet no fadiga a vedell penchè l’è gigantesch. Ai primm temp la se la tirava on po’. Ma l’era giust che le fasess. El settimanal che dirigeva l’era in sacoccia o in borsa de tanti che la vita i aveva portà sotta el segn del comand! Peu, “cambià l’editor se cambia anca el direttor” l’ha dovù lassà el post a on alter. Ed ecco che pur restand la coverta de Linus semper on simbol universal, ormai, el giornal l’ha perdù quella freschezza che el gh’aveva prima e adess l’è come tanti. Ma lee, indomita, la s’è missa a trà in pè ‘na rivista per fioeu ciamada MILO, scritta e disegnada anca da fioeu. Sti a senti’ la nomenclatura de presentazion: “mensil de divertiment e attenzion per i primm lettor del mappa-tondo”. Gertie edizion . E denter, cont i avventure de Milo, personagg creà da Gabriella Giandelli, gh’eren i disegn di fioeu, i stori di fioeu e di papagrand (nonni). E adess cossa l’ha traa in pè la sciora Fulvia Serra cont el fradel Franco? in d’on canton de Milan visin a piazzal Lorett? Hann organizzaa on film de animazion intitolà IQBAL, el fioeu senza paura che el smaschera e denonzia on sistema pien de corruzion, de retorica, abus, ingiustizii, e el crea ona presa de coscienza che l’è fada de amicizii, paroll, fantasii e condivision. Ciolla l’è on film seri, a disegn animaa, (se dis cartoon) ch’el gira per concors, ch’el ciappa premi su premi e ch’el fa’ part del mond “Bambini Senza Paura”. L’è ‘na geniada. “Vialter grand perdii temp a dimostrà cont i armi de avegh paura l’on de l’alter e inscì comincen i guerr, i battaj, i prepotenz, i persecuzion di fioeu (perché l’è persecuzion anca quella de insegnagh lor a faa del mal), a maltrattaj, a dagh pesciaa, a copaj, a curaj no, a dagh no de mangiaa, a faj no giugaa, a tarpaghi la fantasia, a consideraj fioeu suratutt perché dimostren de vess pussè grand di grand che sembren grand e inveci a hinn piccol e miserevol, stupid, maleducaa, violent, stuprador anca de la vita, invidios, e inconcepibilment bacaa. “Bambini Senza Paura”, per mi che foo part dell’età diventada come quella di fioeu, l’è on grand moviment che el manda in malora tutti i moviment di grand. Ver, de fioeu, pien de speranza, de vita, de voeja de trasformà el mond e fall diventà pussè bon, caritatevol, e integra’ la gent, senza usà tanti paroll e spettà che la vegna bòna. E de peu se po’ cattà fondi per i progett charity destinaa all’infanzia, regalà el “Passaport di Fioeu Senza Paura”, entrà in di gioeugh , imparà ad avè consapevolezza, legalità, immaginazion, sogn, volontà, condivision, responsabilità, azion, sostenibilità, partecipazion, mett in gioeugh el fioeu che l’è in ti, per stagh insema, lavorà insema, moeuves insema, e reclamà el “diritt all’infanzia” senza paura. L’è ona mission. Quella de stimolà la partecipazion del pubblic e invidall a usà la forza aggregante de la cultura, dell’art, dell’intratteniment, perché se dev mai smett de avegh indignazion, de usaa el gioeugh e l’immaginazion per affermà cont consapevolezza ‘sto diritt all’infanzia de tutti i fioeu. El concept del film el dis “Dal sogn all’azion insema se po’”. IQBAL: Bambini Senza Paura, dirett da Michel Fuzellier e Babak Payami, Gertie produzion, l’è pussè d’on film. La storia l’è semplice. ‘Sto minga chi a cuntalla. Me par pussè important riassumm la soa filosofia. “El protagonista animà da on sens de giustizia el dimostra de vess bon a ribellass di vessazion di adulti per affermà i so’ diritt e quej de tutti i fioeu del mond.” L’hoo dit che l’è on moviment! El gh’ha per progett la promozion de ona scola in Pakistan dedicada a Iqbal Masih, bors de studio ciamaa “Il tappeto di Iqbal” e destinaa ai fioeu di familii che gh’hann bisogn, cattà foeura in di territori pover del mond. Istruzion a distanza: cors de preparazion in arti e mestee per accompagnà i piccol student all’età del laorà senza passà per el sfruttament infantil. On portal ch’el serva da riferiment a tutti i iniziativ ligà al laorà di minor. E poeu ancamò serie de storj a fumetti, cont on taj comico-avventuros che poden descriv la possibiltà de “rapporti tra culture diverse”, ona serie Tv, e-book a fumetti, e liber e album de figurin con anca i ritratt de chi el continua a combatt contra la schiavitù e el lavor minoril. Tutt per on tutt dedicaa a i fioeu, che hinn el noster patrimoni e la nostra ricchezza. La domanda l’è “ perché mettej al mond e peu faj soffrì per robb che fan part del noster egosimo, de la nostra incapacità de interrelazionass, de viv in pas, e l’abilità de segutà a robà de tutt?” La risposta l’è “femmij e mettemij in condizion de viv, de giugà, de cress san e cont el cervell giust”. Cossa fann de la ricchezza senza podè allevà i fioeu cont gioia? Tra i fioeu de tutt el mond che frequenten i noster scoll chi l’è ch’el fomenta l’appartheid? I grand. I fioeu stan ben insema anca se de color divers. E se capissen anca senza savè la lengua, roba fondamental per chi el viv in on paes che l’è minga el so’. E cont la lengua l’educazion, el rispett di legg, usi, costumm, religiosità del paes ospitant, ch’el dovariss pretend l’educazion, la nettada e l’amor per tucc. Uei, se el film IQBAL el m’ha ispirà tutt quest, onor a la Fuvia Serra che insema al fradel Franco han faa la produzion.
brivio.roberto@yahoo.it