Parlà de can e di sò padron

Presentazion al Pirellone cont el Marco Tullio Barboni

Marco Tullio Barboni con Merlino

Marco Tullio Barboni con Merlino

Milano, 20 settembre 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Incoeu se fà nient senza ona presentazion. I compagnii de teater presenten el programma definitiv dell'ann, i conferenz stampa se moltiplichen, i edizion presenten dischi (se ciamen ancamò insci ) e liber in loeugh divers: osterii, parchi, alberghi important, teater, salon, vecc magazzin, capannon, perfina all'ex macell. Ghe manca che on liber che fa' i statistich di infortuni sui autostrad el sia miss in vendita al Pronto Soccorso e peu semm rivà al pel del top. Ma quest che voo a contav l'è ona presentazion de minga scherzà, seria, granda. Gh'è de mezz la Region, l'Accademia già Pontificia cont el so' President Franco Antonio Pinardi e la Viola Editrice del liber “A spasso con il mago. Merlino e io” scritt da Marco Tullio Barboni, sceneggiator, regista e scrittor che in ona intervista l'ha dit (volti tutt in milanes)“sont affezionaa a la mia seconda opera perché g'hoo avuu el moeud de parlà ancamò 'na volta del me bovaro bernès Arturo, ciamà Merlino nel liber. L'ha fa' part de la mia famiglia per 8 ann de fila”.

Ma chi l'è M.T. Barboni, che l'ha smoeuvù i collaborazion de La Region Lombardia, dell'Associazion nazional cavalieri al Merito della Repubblica Italiana e anca del patrocinio dell'Annuari del Cinema Italiano & audiovisivi. Chi l'è 'sto Barboni che el ved el temp che gh'ha de vegnì (futuro) come scrittor e autor de copion teatral da voltà in ingles e esportà in America Chi l'è 'sto regista che ha titolaa on so' corto “Il Grande Forse”, pellicola che vedaremm stasera a Pirellon Donca. L'è ona persona pièna d'ingegn. La soa storia l'è questa. Ul zio Leonida l'era on direttor de fotografia che l'Anna Magnani el tegniva in alta considerazion e stima. El pader Enzo, prima, operador alla macchina, poeu direttor de fotografia e depoeu regista cont el nomm E.B. Clucher, l'ha ligaa gran part de la soa fama ai film interpretaa da Bud Spencer e Terence Hill e ai fasoeu western (el comunicaa i e ciama fasoeu ma per mi hinn i spaghetti). L'ha frequentaa el set fin da fioeu e la segutà la carriera de la famiglia. La caratteristica del liber l'è el grand amor che el Barboni el gh'ha avuu e el gh'ha ancamò per el so' can. On amor universal che el tocca minga domà lù ma milion de personn nel mond che hann fa' de tutt per on animal , fedel, pien de amor, che el se distacca minga facilment dal so' padron, che disi, compagn de vita, de dolor e de gioia, allegher, scherzos, giugatton, “on bisgiò” (gioiello), dis la Silvana, on' amisa de ca' mia, “che el signor el m'ha fa' trovà e che el voeur pù distaccas de mi”. E l'è vera. Sont testimoni. Del rest ghe n'ho avuu quattordes de can. Forsi nient a che vedè con Merlino ma affezionaa e anca gelos. Ghe n'era vun, on Dalmata, che l'è sta' visin a la Raimondi, taccaa a ogni so' pass, in del temp che el me fioeu Matteo el cresseva denter de lee. I can, pussè che i gatt, se desmenteghen mai. El me amis Giorgio el tenn la foto del so' lupo su la scrivania de so' offizi.

El Giusepp, quand l'è mort el so' Schnauzer, m'ha telefonà disperà. Gh'ha fa' on tomba in del giardin e da des ann el se ricorda semper de mettegh on fior. El Carlin che el gh'ha la resgiora che de can ne voeureva no la fa' tant de appassionala al so' Piscinin (on Alano, alt squas el padron, ciamà piscinin perché quand l'aveva sciscia' el latt, per fall indormentà el cantava “De tant piscinn che l'era/ el ballava volentera/ el ballava su on quattrin/ tant che l'era piscinin/ de tant che l'era piscinin) che guai a chi ghe le tocca. Ricordi Gino Bettoni, el maester de piano e direttor d'orchestra che l'ha laorà cont mi ona donzena de ann, cont el so' Mirò, on barboncin bianc che el “sentiva” la musica. Ai proeuv e replic de l'orchestra (25 e a volt anca 35 element) el can l'andava a stravacass giò visin a ògni professor. El voreva provà tutti i strument se de no l'era minga content. El passava dai archi ai legn, dai percussion ai otton, dall'arpa al piano (gh'era anca quell, per certi moment de atmosfera) e quand pareva che ghe n'avess assee el se metteva de fianc al Direttor, settà sul cù, gamb drizz e faccia tesa che ogni tant la batteva el temp.

Me telefona  Johnny Brusatori, on me vecc amis che da Milan l'è andà a Roma per fa' la soa fortuna de attor, de dobbiador, de organizzator. El me dis “Ti piacciono i cani ” “Attori ” gh'ho responduu pensand che el gh'avess leggiù i me articol in doa parlavi minga ben di dobbiagg, di attor che sussuren, che se fann no capìi. “No, cani cani.” “Si, me piasen.” “Bene, se sei libero il 20 puoi avere l'opportunità di occupartene presenziando alla presentazione di un libro che parla appunto di un cane”. Gh'avevi no impegn ai dersett del vint. Hoo accettaa. Ed ecco che ghe sont anca mi a la presentazion del Liber, incoeu, vint Settember, ai dersett (17) al Pirellon entrada da via Fabio Filzi n° 22, per legg on quaj brano del liber. M'hann mandaa on dialogo tra Merlino e el so' compagn, ciamà Boss. Merlino l'incontra depoeu mort el Boss: “… cos'altro dovrebbe sorprendermi ” “Che parlo, per esempio” “Ci siamo sempre parlati io e te” “Col cuore, Boss. Solo tu anche con la voce…”. brivio.roberto@yahoo.it