Ettore Scola sul set de “Il mondo nuovo” tratto da “La Nuit de Varennes”
Milano, 3 ottobre 2019 - Mi g'hoo do amis che scriven ‘on play’ (se dis inscì). Minga sui giornal. Su la posta elettronica e poeu spedissen ai amis, a un longa filera de conoscent, a gent importanta, a professionist, ai lettor comun che forsi ghe dann pussè soddisfazion de on del mestee. Mi sont vun de quei. Leggi cont avidità quel che inventen e certi volt commenti el lor penser sui fatt che capiten tucc i dì e foo marcà l’arguzia, l’ironia, el sarcasmo e di volt la rabbia che hann miss giò su la carta. Vun se ciama (in ordine alfabetico) Stefano Torossi e l’alter Giorgio Zennaro. Vun el scriv a Roma, l’alter a Leros, on’isola greca in doa el passa primavera ed estaa. Torossi el se fa’ ciamà Il Cavalier Serpente. Su no se l’è Cavalier de la Repubblica, ma so con certezza che l’è serpent, a volti cattiv, ma semper obiettiv. El pubblica i so’ notazion ogni settimana. Zennaro el se firma cont nomm e parentèlla senza appellativ, ma el s’è impegnà a scriv ona “mail al giorno”. L’ha comincià ma l’era faticos e allora l’ha intitolà el capitol “una mail quasi tutti i giorni”. El parla de tutt, dai governi ai pension, dai cess a la ruera, dai vizi e stravizi a l’economia. Steven inveci el va’ ai fest, ai inaugurazion, ai presentazion, ai spettacol e mostre, e giò fett de cattiveri vers i vandali che hann organizzà mal ona mostra o qualsessia art, vers quei che rispetten minga monument, esposizion e alter. E per lu manca’ de rispett voeur dì anca organizzà mal, cont superficialità, senza approfondiment. Me piasaria che se incontrassen per scambiass i parer sul mond, sui grand che hann fa’ el bell e sui disgrazià che le rovinen, le deturpen, le fan foeura. Ogni tant ghe mandi i me articol in milanes che hinn cianfer rispett ai lor argoment, al moeud de scrivi e de fa’ cultura. Zennaro l’ è anca on humorist, on battutist. Ghe do’ del cabarettista prima manera, quand se cantava el social puttost che parlann. Ma travers la canzon la gent capiva el giust, i rivendicazion, i rimproveri, i desideri, i speranz de chi poneva i problema.
Torossi el gira Roma, el se incazza quand l’è giust fall, el riporta tutt con ragionevol osservazion. Cont precision el parla anca di buffet taccaa: accompagnà dai vinell da sball o dai Negroni, l’aperitiv ch’el preferiss. ‘Sta settimana l’ha intitolà l’articol “ L’Ultimo Plotone”, che per lù l’è minga quell di soldà che sbilzen foeura da la trincea, passen sui corp andà di compagn de baionètta, e corren a la conquista de ona postazion sparand, vosand, cercand el coragg in ona corsa disperada (varda la I guerra mondial, la II e poeu la terza, la quarta, fina a rivà adess che, i hann cuntà, al mond ghe n’è pussè de 60, e so minga quanti battali, quanti presonee, quanti tortur, quanti promess de finii tutt e mai pù borlagh denter. L’è come per i terremott, i calamitaa, i smottament, i bomb d’acqua, i tsunami, i migrant perdù. Paroll senza verità che metten insema “l’ultima volta” cont “el dev pù succed” “la ricostruzion la sarà fada prima del previst” cont “el governo el stanzia ona cifra” che i loeugh colpì vedarann a fadiga o mai, e giò on parlass adòss a fett. E allora, per tornà a bomba , da chi l’è formà l’ultim ploton? La rèunion l’era presieduda dal fioeu de Luciano Salce per commemorà un regista, attor e autor che in questi di’ s’el fudess viv el festeggeria 97 ann di 65 realment, el dis Torossi, vissù. E tira a man on oste: Otello Caporicci, padron de ‘na trattoria in via de la Cros, a Roma, ciamada “Otello alla Concordia” che contribuiva a mantegnì viv i futur grand attor e personagg che gh’aveven minga i danèe per pagass el mangià. Ghe faseva credit su la parola, senza domandà garanzii come fann i Banc, tanto guardinghe che te dann no on centesim se gh’ett no ona ca’ e poeu fallisen istess per cattiva amministrazion e investiment. I pittor e scultor ghe lassaven in cambio un’opera che impieniva paret e spazi de quader e statoi, ma i registi, i attor, i sceneggiator, i tecnici, ghe lassen domà i promess. L’è on ploton che poeu el se disperd, perché van de chi, de la, a cercà fortuna, a laourà, a diventà celebrità.
El noster Stefano el parla de duu moment essenzial de la vita, la gioventù e la veggezza. L’è lì che la generosità la se dev fa’ vedè. Chi se recorderà el tornerà, quand el sarà in su la piazza anca nel periodo de mezz. I tosann de Otello seguten a gestì la trattoria, e tanti ann fa’ voeuna de lor, Gabriella, on dì la settimana (mercoledì), per onorà la memoria del pader mecenate, la derba el tavolon social (inscì le cjama el noster giornalista, musicista, scrittor). Ecco riformass el cenacol e el ploton. Di noeuv se san no i nomm, ma di vecc se conoss tutt, nomm, cognòm, vita, mort e miracol: Ugo Gregoretti, Ettore Scola, Giorgio Arlorio, Vittorio Gassman, Ugo Pirro, Mario Monicelli, Tonino Delli Colli, Furio Scarpelli, Gillo Pontecorvo, Piero De Bernardi, Silvana Pampanini, Elsa Martinelli… El mej del cinema italiano, anzi el dis Torossi “Il Cinema Italiano” e mi ghe gionti “Una parte del Cinema Italiano”, per minga fa’ tort ai alter ch’hinn minga citàa.
E nel stess temp me vegn in ment ona domanda: a Milan ona roba simil gh’è stada? Mah. Mi savevi conossevi i ristorant frequentà dai artist del dopoguerra. So’ che gh’era ona pension in Galleria del Corso, in doa te trovavet musicist, macchinist, laorador dello spettacolo, che la faseva credit fin tant che ciappaven la paga, se la ciappaven. Che in di ann ’60 gh’eren ristorant e trattorii frequentà da chi l’era “quart” e poeu l’è diventà “terz, second, primm”, che tanti de questi ristorador faseven e fann ancamò credit, che i paret, parli di loeugh che hinn ancamò in pè, hinn pien de fotografii con dedica, incornisaa. Foto che fann la storia del Teater, del Cinema, de la Letteradura. Ma ‘sta tradizion vera e propria del taolon-mensa, la conossi no. Ma te voeret che in ‘sta città che tutt el mond el conoss per el so’ “coeur in man”, ghe sia mai sta’ on post tipo “Otello” ch’el faseva credit a perd? E quanti ristorant, pension, trattorii, sartorii , in tutt el paes gh’avarann avù l’ultim ploton. Numm i e cognossum minga ma ogni paes che ne conserva i ricord el dovariss mandamm notizi per onorà quej che quand gh’eren no i Teleton televisiv eren generos e tegniven minga i mann in saccoccia strengiù in d’on pugnell de sòld, de ghèll. I ricord de ona città industrial e commercial come questa se riassumen in on incontro tra du affarist. “Come la va?” “Mal” “Salut?” “No, affari” “Ma come, t’è vinciù trii mes fa 500.000 euro ai gratta e vinci!” “l’è vera” “ E duu mes fa t’è vinciù 10.000 euro ai cors de cavall!” “ L’è vera” “ E ier in borsa t’è vinciù 10.000 euro!” “L’è vera. Ma incoeu, nient.” brivio.roberto@yahoo.it