Da Brughèe a Caponagh in ballon

Montagh sora e partì, avventura che anca incoeu late lassa a bocca averta

Un viaggio in mongolfiera ancora oggi mantiene un fascino irresistibile

Un viaggio in mongolfiera ancora oggi mantiene un fascino irresistibile

Milano, 15 marzo 2019 -  La mongolfiera  o Ballon la m'ha semper lassà a bocca averta. El piasè de montagh sora e partì per destinazione ignota el fa part di pericol de la natura, per mi. Gh'è semper l'improvvis de ona corrent d'aria ascensional che la te porta chissà in doa. Ma disen che la scaggia che la subentra la smorza la spavalderia. Domà quand te fa' vegnì la mossa te comincet a considerà che viaggià in quel moeud l'è pocch salutar per via di servizi che gh'hinn no. L'è per quest che depoeu on periodo de rodagg hann inventà on alter ballon che han ciamà dirigibil. In effett le doveven ciamà “digeribil” in quanto l'erà pussè facil per la digestion e te gh'avevet l'impression de viaggià pussè comod che in aereo. Ma el gh'aveva alter difett e inveci de giustaj hann lassà perd a piesè dell'aereo. Pfuiii. Come l'è difficil fa' dell'umorismo su la Mongolfiera! Hoo cercà on quajcoss in tutti i scritt de Achille Campanile, ma hoo trovà nient.

Vun che l'ha ciappada seriament e che el gh'avariss mai fa' del Ballon oggetto de comicità l'è stà el Conte Andreani anzi l'illustre Cavaliere milanese Don Paolo Andreani. L'era minga on pret. L'era on ardimentos. Me capita de fa' on spettacol al Museo Archeologico Storico Artistico della Società Gallaratese per gli Studi Patri in via Borgo Antico, 4 Gallarate (VA) e troeuvi ona ristampa anastatica. Andemm a fond sull'anastatica, perché gh'hinn paroll che se scriven e i lettor, a volt, ne sann minga el significaa. Mi l'hoo trovà cont fadiga perché i vocabolari le porten no. Anastatich l'è on tipo de riproduzion litografica de “opere stampate tipograficamente nella quale si fa il trasporto direttamente dallo stampato alla pietra per ottenerne una nuova matrice”. Adess ne so' pussè de prima! Ma guardi anca a on altra definizion del Dizionari Enciclopedich: Anastatica, sorgere, risurrezione. “perché la pianta morta e secca sembra rivivere posta in acqua”. T'è capì Hann fa' riviv Il Viaggio Aereo dell'Andreani in ona ristampa Anastatica a cura de Massimo Palazzi e scritta dal canonico Carlo Castelli. Viagg partì da la villa Moncucco de Brughèe per atterrà a Caponagh (Caponago) a la cassina Seregno. “Nello scendere però la macchina urtò da un lato in un alto gelso onde alquanto inchinossi dall'opposta parte. Ciò non impedì però che la barca toccasse terra, onde potessero da essa uscire illesi e sicuri i coraggiosi viaggiatori”. Mi, per reson svariaa capiti spess a Brugheri e on dì partecipi a ona conferenza-canzon de la Compagnia della Mongolfiera fondada nell'April 2011 per tegnì viv 'on avveniment (13 Marz 1784) considerà come nascita dell'aviazion italiana. Da quell dì el Sergio Maino, fa' de tutt per l'associazion, m'ha pù mollà. Ma sont content perché me troeuvi in mezz a gent che ghe pias volà e che la sostegn, come la veggia cronaca de Luigi Riva intitolada “Annali di Gallarate” , che gh'hinn stà utilizzà ballon aerostatich ben 12 ann prima di fradei Montgolfier . “21 Febbraio 1784…Fecesi in tale occasione in Milano molte feste ed allegranze, massime nel Teatro essendo tempo Carnovalesco. In oltre in questi giorni fecesi volare un Grosso Ballone, che erasi introdoto in questi tempi in Italia portato un tale ingegno della Francia, ed il primo fù questo in Milano, dei quali sen fecero poi molti altri”.

Dal 1784, ann dell'impresa storica him passaa dusentrentacinq ann. L'è success de tutt, alter che el baron de Munsciausen, che l'è minga tedesch ma de Monscia, visin donca a loeugh de la spedizion proeuva del Ballon, Brughèe. Semm andà in su la Luna, semm adrè a fa' i cunt (salaa) per fa' viagg interlunari, gh'èmm forsi la possibilità de andà su Marte e on quaj alter pianeta e sont sicur che a la fin studieran, cont i material come se dev, ona forma de Ballon. Tant per restà in la fantasia de Fulvio Bella, scrittor e politich, sindacalist, poetta e narrador, che l'ha scritt ona stòria, da legg el sedes (16/3) ai dersett (17) in Comun, che la traversa el temp, el spazi, per cùntà de on Cont ( l'Andreani) che l'ha fa' on'impresa, per quij temp, impossibil, pièna de ris'c e de azzard, tant che se la prima volta l'aerostato l'è finì contra on moron, on'altra el s'è incendià. Fulvio Bella el ghe mett denter raffront, paragon, el parla di debit sostenù per mett in pè tutt l'armamentari, de quej fa' in tanti bordell d'Italia “Non tanti quanto oggi”. Tra i battud bizarr l'ha miss quella che riguarda la sessualità che second lu l'è stada rovinada da on immagin: “Archimede” l'inventor “ ch'el salta foeura dal bagn, cont l'affari ch'el donda, vosand Eureka eureka. E olter a l'ascension del “ rostato” come l'han ciamà certi contadin che faseven la carna in braséra in d'on pràa visin, l'è lì che l'è nassù el famos “grass de rost”, el cunta su del tempiett portà a Brughèe da Lugan, via fluvial, a tocch e montà visin a villa Andreani, propri sul canton de vial Lombardia.

Leggenda? No. Par che la sia stada anca la prima collaborazion europea. Fulvio Bella el dis de avè leggiù, ghe par, che tra i operari ghe fudess anca vun ch'el vegniva da la Svezia e suppònn che el sia sta' vun di so' discendent a inventà l'Ikea, “tant che n'hann miss voeuna a Carugaa”. E se Sabet sedes de Mars se “legg” in Aula Consiliar, depoeu i discors, i officialità, l'intervent del sindich Troiani (“… quel fioeu cont la fassa de la repubblica cisalpina l'è drè a scovrì ona targa che la porta el me nomm…”), domenega 17 dai noeuv ai dodes Balloon Teater cont el socio pilota Marco Marin e alter, della Compagnia della Mongolfiera impegnaa, vestii fin settcent, dai quindes (3 d.m.) a organizzà i voli frenati gratuiti al Parco de Villa Fiorita. Mi ghe voo e porti i me nevod a fa' on gir del mond de fantasia in la cesta a vint meter de altezza.