Se fa svelt a di’ sta’ a ca’ toa

Milano, 15 marzo 2020 - L'è giamò ‘na settimana che personagg inviden la gent a sta’ a ca’ per minga corr pericol de vess contagiada, sintomi la toss persistente, la fevera alta, i oeucc sberlusent, la gnagnera, la respirazion difficoltosa, lassass andà. Sont passà in piazza Cavour e propri de drè al “grand omm” hoo vist do’ torr fa’ cont scatol de carton, ona tettoia de ondulux, sostegnuda dal fondal de recinzion di Giardini Pubblici, e on tizio ch’el dormiva quattà da on para de piumon. L’ha tirà su la testa propri quand passavi mi. D’impeto gh’hoo domandà se l’era obbligà a restà semper lì per paura che on quaivun de la soa levadura ghe robass el post. Me guarda e me dis “prima de tutt sont a ca’ mia; second obbedissi al decreto del Conte; terz mej chì che all’Hotel Manin distant cinquanta meter voltà el canton; quart me manca nient, nanca i doppi servizi” el me mostra do’ orinari da veggia ringhera “ e per ultim…” el seguta “ voeuri propri vedè chi venn chi a scalzamm da la mia ca’.” E nel dì la soa el s’è tira’ su la coerta piumada e l’ha segutà a dormì. 

Quanti ghe n’è che gh’hann eletto el domicilio per strada. E quell l’è la ca’ in doa riuniss per dagh a tra’ al President del Consili. In piazza XXIV Magg gh’è ona camera con libreria, davanti a ona banca n’hoo vista voeuna cont la cusina, a fianc dell’Hoepli in la via omonima i banc del bar-ristorant hinn prenotà comprensiv de cartoni. In una riunion condominial un inquilin de quei taol el m’ha dit che l’era lì perché all’Hotel de front gh’era minga post. In la galleria del Cors e in quella davanti a la libreria Hoepli, la sera te fann passà domà se te ghet on autodichiarazione che la palesa l’intenzion de minga sostà o cerca’ ca’ in quel sito. Adess, per vint dì ancamo’ stann lì: marocchin, african, asiatich, italian. On ghisa, ciamà pomposamente “polizia local”, l’ha tentà l’alter dì de mandaj via. Gh’hann respondu che éren lì su preghiera del Governo, e anca de Fiorello, de la Litizzetto, e alter altolocati attor ai qual me unissi anca mi: Stii a ca’, stii a ca’. Del rest abiten in pieno centro, senza paura che ghe robben el post, senza bisogn de sottomèttes al tampon, anzi quaivun el s’è offert per andà a fall personalment in di famigli de la zona, cont i vestii comprà ai cassoni giald de la strada. Se podariss cambià fisionomia e presentass addirittura a Montecitorio, in doa i opposizion giamò critichen, perché in ‘sta Italia da Bar tucc hinn bon de fa’ mej di alter.