Coronavirus Toscana: i dati del 26 luglio 2022
Milano, 18 ottobre 2020 - Gregoriooo! «Si’, Francesca». «Cossa te penset de la paura che ghe metten addoss i cosiddetti media cont informazion de tutti i color?» «Semm numm che gh’émm paura. Hinn minga lor che ghe la metten». «Ma lor rincaren la dose col numer di contagiàa che l’aumenta, ch’el se ferma, ch’el ricomincia, cont i ospedal che gh’hann pu de post se el va avanti inscì, cont la terapia intensiva che la strabocca, cont i vaccini che, quand ghe saran, basterann minga, che la gent cercherà de fassej fa’ piena de dubbi, che l’Italia gh’ij ha giamò ma l’Alta Sanità la ghe cred no e allora hinn fermi in di container…» «Francesca, ferma quel fiumm de paroll, de dubbi e pensa a quell che te diset. D’indoa el venn foeura quell notiziari che t’è sparà? Da la carta stampada che l’ha semper fa’ el so’ mestèe?» «Troppi dottor, troppi sentenz, troppi restrizion. E se ti e fet gh’è chi reclama, se ti e fet no el reclama histess, e perchè el governo l’è debol, e perché l’è trop fort, e perché el gh’ha i so’ interess, e salvà l’economia, e fa morì i vecc, e se te saret i scoll i mamm reclamen, e se ti e saret no reclamen histess. E el laorà del doman el dev cambià, e s’el cambia no ‘ndemm in piazza, e quej che spetten la ghigliottina in di slargh, e chi vorarissa che i governant fasessen la fin del Robespierre. L’è on caos, Gregori. E mi ne podi pu».
«E allora cerca ‘na risoluzion. Ma dimm ona roba. D’in doa te tiret foeura ‘sta cultura? Dal...» «Dal telefonin?!» «Eccola. Troppi notizi, troppi tendenz e contratendenz, troppi si e no, troppi consili, troppi moeud de pregà, de pensà, de considerà. Gh’hinn minga domà i Dulcamara de la pubblicità, ma gh’hinn anca quej de la politica, de la vita. Tutti che venden el lor Elisir d’Amore. El fudess almen amore. Per mi l’è on impast de saccenterii». «E no, Gregori. A mi i Sòcial hann risveglià la coscienza Sociàl». «El to’ co’ l’è in voltaico. Da quan t’è capì che te podet intervegnì in tusscoss te mettet el bec anca in doa de dovarisset minga mettell, Francesca». «T’el chi el maschilista. Perché sont ona dona te credet che sia minga bona de ragionà?» «No, Francesca. Ma el dubbi, come la calunnia, come la busia, l’è on venticello ch’el fa stordì, fa’ sgonfià i cervell. El diventa on tron, ‘na lusnada, ‘na tempesta, on temporal, ‘na baraonda general che fa l’aria rimbombar. Come un colpo di cannone, tutt el mond el fa tremà, come tanti, come tì’!» «Gregorio!» «No, Francesca, hoo scherza’».