Caffè
Milano, 15 novembre 2020 - Chi te set? “Sont dell’opposizion e ti? “ “Sont dell’antinomia.” “Cossa l’è l’antinomia?” “ El contrari dell’opposizion.” “E l’antitesi?” “L’è la stessa roba.” “Ma se mi sont all’opposizion el governo in doa l’è?” “L’è a la contraddizion, a la contrapposizion” “Ma se l’è lu ch’el fa’ e disfa! Saroo mi a la contrapposizion o a la contraddizion.” “No, ti te seet all’opposizion. Te diset semper de no. Te seet in l’altra sponda.” “Uei, mi saroo semper all’antitesi, che voeur di contrari.” “Opposizion el voeur dì anca incompatibilità. El tò penser, donca, l’è incompatibil cont el mè.” “ Un moment. Leggi el vocabolari. Antinomia, compresenza di due affermazioni ugualmente dimostrabili ma che reciprocamente si escludono.” “T’el vedet. Si escludono. L’è per quest che semm mai d’accord. E s’el dis el vocabolari dell’antitesi?” “Figura retorica che consiste nel contrapporre in una stessa frase, termini di senso opposto. E poeu el coclud cont i paroll: contrasto, opposizione..” “Te vedet? Disom la stessa roba, domà che ti te set antinomich e mi antitèsich” “Ma se l’antinomia e l’antitesi hinn pari pari, se femm?” “Femm finta che ti te siet all’opposizion…” “Ma se disom la stessa roba, de qual opposizion te parlet.” “Ciappa el virus, per esempi. Ti te le vedet in ona manera, mi in on altra.” “ Com’è, l’è minga la baletta rotonda cont i spongion che ghe stan intorna come el risc?” “El risc?” “Si’, la scòrza de la castegna.” “I boccol?” “ Dai, ciammej boccol. Spongen de malarbett, come spong el virus.” “L’è destinà a indeboliss.” “Quest le disen i virologi, i saccenton, discors in di bar.” “Prego, foeura di bar. Stamattina ho ordinà on caffè, me l’hann passà sota i transenn cont el scontrin, l’hoo bevù semifrecc.” “A mi, inveci, la barista cinesa che quand ghe l’hoo ordinà la gh’haveva la scoa in man e la nettava el paviment che chissà chi ghe le sporca se la gent la sta’ foeura, la barista disevi, l’ha mirà mal, la tazzina l’è andada contra al naster miss de travers a la porta per fa’ minga che ghe sia on quaivun ch’ el entra, le borlà tutt in terra e addio caffè.” “A mi m’è capità in on ristorant Tekeuei. El camerer l’è scarliga’, tutto in terra.” “La soluzion?” “Derbì i ristorant, i bar, i teater, e i cinema, ‘sta volta cont on quart de la gent che poden contegnì.” “Uei, semm in antinomia e in antitesi tucc e duu.” “Te vedet? Basta mettegh on po’ de cultura e i problemm se risolven.”