Controllore in autobus
Milano, 4 febbraio 2020 - Gh’e tròpp de dì. Partissi da la multa perché hoo sbaglià el bigliett del Bus da Brughèe a la Metrò. Inveci de comprà quell de 1.65 gh’avevi quell da 2 euro. El controllor 8000 e on quaicoss, l’ha vorsù no scoltà i me reson. El m’ha ciappà per on lader, on sfruttator de le Autoguidovie s.p.a. Gh’hoo dit che ghe n’avevi do’ de bigliett da 2 euro. Che si è tegniss. No “lei è in contravvenzione, mi dia i documenti”. Ghi hoo da’ ma hoo fa’ mal. I document se dann domà ai forz dell’Ordine, Polizia e Caramba. Gh’hoo dit anca che l’autista, dal moment che in di fermad gh’è no ona rivendita de bigliett, el dovariss tegnì on blocchett de scorta e vendii a chi ghe l’ha no. Nanca per sogn, troppa fadiga. E ti guarda la gent che la salta i tornell de la metrò senza che nissun el se moeuva! Poeu quand veden on vecc scior, educà, ghe curen a drè per fa’ vedè ch’hinn spietaa. Parli minga domà per mi. Parli cont la vos de tutti quei che se lamenten. E ghe n’è tanti. Hoo da’ on’oggiada a la ricevuda che el m’ha lassaa. 176.60 euro. 175 la sanzion e 1.60 el bigliett.
Semm in ona gabbia de matt. Dovarissi pagà 109,375 volt el cost del bigliett. Minga el doppi o il triplo. Mi diminuissi la pension per pagà ‘na multa onerosa perché gh’avevi on bigliett de importo superiore ma che l’andava ben no su quella tratta senza tegnì cunt che ai fermaa del Bus se po’ minga comprai datosi che i edicol i e tegnen pù, e, al pari di tabacchee, hinn lontan. Senti la vos de ‘sto addetto a la sbusatura di bigliett, che se ciama obliterazione, “ ma lei deve essere previdente”. Hoo scritt a la sezion segnada su la ricevuda lassada dal solerte funzionario. Va ben, per ona volta tant, s’eri cont on bigliett sbagliaa. Paghi la multa. Anca des volt el bigliett. Ma 109,375 volt, nanca se me metten denter. Sont minga mi el lader. E nanca el volontari dispòst a quattà i bus de la gestion di Bus. Bell: i bus di Bus. Come i bus di Banc, quej di Comun che chissà in doa metten i danèe di macchin multàa, dal moment che i bus de la strada hinn semper lì a rovinà i balester. G’aveva reson el Walter Valdi cont la soa “Busa Noeuva che ier la gh’era no”.