I Ciappter Ileven
Milano, 5 marzo 2020 - Martedì mattina, vers i noeuv, me telefona Marco Lo Conte, on amis giornalist, per domandamm se voeurevi che me fasess ona videointervista su la vegia e la noeuva Milan cont l'appendice a questi dì particolar che veden la città mezza svoeujada.
Curios 'me 'na Cavra (pòver animal, bistrattà dal Sgarbi e considera' al pari di Talp ch'hinn òrb) ghe doo on puntell in piazza Cavour, davanti a quell'edifizzi cjama' ancamò Palazz de la Stampa. “Per forza” ghe disevi “Gh'era el Corrier Lombardo, La Notte, l'agenzia AdKronos, il Giorno, la Famiglia Artistica, President Arardo Spreti, (l'è nel so' palchscenich che hoo incontrà el Valter Pinetti alias Valdi, appèna diventà avvocatt, che el tentava de fass i oss come attor), l'offizzi de Mario Casalbore, i linotype, i tipografii con la rotativa”.
Marco el me vardava come se fodessi on monument a la memoria. E mi de rincar “Il Sole no. L'era ancamò distaccaa da “24 ore“. Le stampaven ogni 12, in ona traversa de via Procaccini.” Come te fet a recordass de tutt me diseva el Lo Conte. Me piaseva fa' la part de la memoria storica. S'eri fioeu, nel '45, ma me ricordi che al post del caseggiaa che ospitava la libreria Cortina, el cinema Cavour, gh'era on baraccon cont ona birreria in doa ballaven el Boogie Woogie e sonaven el Jazz. “Renzo Cortina! Ti pensa che nel 70, dislenguàa (sciolti) I Gufi perché l'era Agost e el faseva cald, mi e Renzo gh'èmm inventaa i Cabaret Letterari. Mi trasformavi trenta pagin d'on liber in ona sceneggiada e, musicada da Ario Albertarelli, insema a Auguto Mazzoti al piano, Umberto Tabarelli come attor e Maria Brivio dicitora, i e rappresentavom gratis ai client, la sera, nel sotterrani. Passaa i trenta pagin me fermavi e disevi “ se vorì conoss el seguit comprii el liber. Renzo Cortina ve farà on scunt”. E de dì, quand andavi per mettess d'accord le trovavi a parlà cont Ruggero Orlando. Senta' giò tucc e duu al bar visin, che l'aveva inventà i primm panini cald imbottii e tutt Milan l'andava lì a mangiai (gh'era semper la fila), voreven che mi recitassi El Champagne. On monologo in francès maccheronich che avevi inventaa nel fa' on cabaret letterari, appunto. Peccaa che ne' al libree ne' all'Orlando podevi dì “se vorii savè el seguit comprii el liber“. mail: brivio.roberto@yahoo.it